Read tetala Joani 14 Bible Online

Joani 14 - tetala bible

Joani 14

¹Etema anyu tawudidimaki: nyetawo Unyashungu, nyumbetawo ndu dimi.

²Lu luudu la Papa eko mvudu efula. Utunduyala aha osoku, tshiki lakanyutela, ne dia dimi lambutsho dia ntunyolongoswela dihuli.

³Naka dimi lambutsho dia ntunyolongoswela dihuli, dimi layukalula la ndjunyulungula, dia nyu ndjala lene ayumuyala.

⁴Nyu mbeyaka mbuka katamatshu.

⁵Tomasi akawutela ati: Khumadiondjo, shu hateyi lene atayatshu. Ukundi eyasu mbuka na?

⁶Jesu akawutela ati: Dimi leli mbuka, mete la lumu. Nduku untu laya le Papa, tshikima uma le mi.

⁷Utunduyala nyu nyakambeyi, tshiki nyu nyakeyi ndu Papa. Kakiane nyu nyambuweya, ndu nyakawenyi.

⁸Filipo akawutela ati: Khumadiondjo, utenya Shesu, ku dikambu so diayukuka.

⁹Jesu akawutela ati: Dimi laki la nyu edja, ku we atambeyi, Filipo? One lakamenyi, akenyi Papa. Ukundi wataye wati: Utenya Shesu?

¹⁰We hetawo wati: Dimi leko lʼutema wa Papa, la Papa eko lʼutema ami? Aui watumunyutelaka, hatuwataka dime, keli Papa leli lʼutema ami, katutshaka elimu andi.

¹¹Nyumbetawo nyati: Dimi leko lʼutema wa Papa, la Papa eko lʼutema ami. Kuyanga aha osoku, nyumbetawo ne dia elimu ene etu.

¹²Mete, mete, kanyutelami nti: One lambetawo, ndu ndi ayutsha elimu watumutshaka. Ndu elimu wuleki ene mbayundutsha, ne dia dimi layutsho le Papa.

¹³Kene tshe kayunyolomba lu lukumbu lami, dimi layukitsha, ne dia Papa atumbwami le Ona.

¹⁴Naka nyu nyayolomba dikambu lu lukumbu lami, dimi layuditsha.

¹⁵Naka nyu nangakami, nyayukitanyia elembe ami.

¹⁶Dimi layolomba Papa, ku ndi ayunyusha Ukimanyidi ukina, one layuyala la nyu pundju,

¹⁷Nvuma ka mete. Keli wa la kete haweyi mbulungula, ne dia vo hawuwenyi, hawuweyi. Nyu mbeyaka, ne dia ndi atuyalaka la nyu, ndu ayuyala lʼetema anyu.

¹⁸Dimi halanyutshiki ditshiki. Dimi layuya le nyu.

¹⁹Etenyi ka tshitshe ketu, ku wa la kete hawomenyi ntu, keli nyu nyatomenaka. Ne dia dimi leko la lumu, ku ndu nyu nyayuyala la lumu.

²⁰Lushi loso, nyu nyayeya nyati: Dimi lʼutema a Papa, la nyu lʼutema ami, la dimi lʼetema anyu.

²¹One leli la elembe ami, ndu latekitanyiyaka, ndi kananga. Untu lananga, ayulangema le Papa. Dimi layulanga, layuyaenya le ndi.

²²Judasi (aha Isakariyote) akawumbula ati: Khumadiondjo, dikambu diakona diambuya dia we ndjaenva le su, aha le wa la kete?

²³Jesu akûkaluya diui ati: Lamʼayunanga untu, ndi ayukitanyia diui diami. Papa ayuwulanga, shu tayuya le ndi, tayudjase la ndi.

²⁴One lahanangi, hakitanyia aui ami. Diui diukanyu, diaha diami, dieko dia Papa lakantumi.

²⁵Dimi lambunyutela akambu aso lamʼekimi la nyu.

²⁶Keli Ukimanyidi, Nyuma kʼOlolo, layutuma Papa lu lukumbu lami, ndi ayunyetsha akambu tshe, ayunyuhula aui tshe wakamanyutelaka.

²⁷Dimi lambunyutshikela ki. Ki kami kamumunyusha. Aha uku watushaka wa la kete mbamumunyusha to. Etema anyu tawudidimaki, tawukaki woma.

²⁸Nyu nyakuki diui diakamanyutela nti: Dimi layutsho, ku layukalula le nyu. Utunduyala nyu nyakanangi, tshiki nyutongenangena, ne dia dimi layutsho le Papa, ne dia Papa ambundeka.

²⁹Dimi lambunyutela dikambu so la ntundu dio diatayala, dia nyu mbetawo lamʼayudiuyala.

³⁰Dimi handjunyutela akambu efula ntu, ne dia umbuledi a kete nye eko lu ndjayi. Ndi kema la ema lʼutema ami.

³¹Keli dimi latutshaka uku elembe wakambisha Papa, dia wa la kete weyi vati: Dimi latulangaka Papa. Nyuneli, tutshu.