Read tetala Joani 16 Bible Online

Joani 16 - tetala bible

Joani 16

¹Dimi lambunyutela akambu aso, ne dia nyu nyatukutakanyema.

²Vo wayunyutundja uma lu temwelo. Ee, etena kayuyala, lamʼayukana untu layunyudiaka ati: Dimi lambutshela Unyashungu ulimu.

³Vo wayutsha akambu aso, ne dia vo haweyi Papa, hawumbeyi.

⁴Keli dimi lambunyutela akambu aso, ne dia nyu mbauho lamʼayuyala etena kawo, uku akamanyutela. Dimi kunvutela akambu aso lʼetatelu, ne dia dimi laki la nyu.

⁵Keli kakiane, dimi lutatshu le One lakantumi. Ku nduku untu amumbula ati: Utsha lendi atayatshu?

⁶Keli ne dia dimi lambunyutela akambu aso, mbambulula etema anyu la lunyangu.

⁷Keli dimi lambunyutela mete nti: Ololo dimi nyutshwela. Naka dimi hatshu, ku Ukimanyidi hayi le nyu. Keli naka dime lambutsho, layunyutumelandi.

⁸Lamʼayunduya, ndi ayutshumuya wa la kete dia akambu wa kolo, la dia akambu wʼololo, ndu dia dialelu:

⁹dia akambu wa kolo, ne dia vo hawumbetawo;

¹⁰dia akambu wʼololo, ne dia dimi layutsho le Papa, nyu hanyuyomena ntu;

¹¹dia dialelu, ne dia umbuledi a kete nye ambulumbuyama.

¹²Dimi la akambu akina efula wa nyutela, keli nyu hanyeyi mbalungula kakiane.

¹³Keli lamʼayuya Nyuma ka mete, ndi ayunyolombola lu akambu wa mete tshe. Ne dia ndi hayati, keli ndi ayuta paka akambu wayunduka. Ndi ayunyutela akambu wahatayi.

¹⁴Ndi ayuntumbula, ne dia ndi ayosa akambu ami, ayunyutelawo.

¹⁵Diango tshe dia Papa dieko diami. Dikambu diako mbanyutelami nti: Ndi ayosa akambu ami, ayunyutelawo.

¹⁶Etenyi ka tshitshe, ku hanyuyomena ntu; etenyi ka tshitshe ntu, ku nyayomena.

¹⁷Ambeki andi amotshi wakambwana vati: Diui diakona diatutelandi so ati: Etenyi ka tshitshe, hanyuyomena; la etenyi ka tshitshe ntu, ku nyayomena; la diui dikina ati: Ne dia dimi layutsho le Papa?

¹⁸Ku vo wakambwana vati: Diui diakona diatandi so ati: Etenyi ka tshitshe? Hateyi kene katandi.

¹⁹Jesu akeyi ati: Vo nangaka mumbulami, ku ndi akawambula ati: Nyu nyambumbwana dia diui diakamatshi nti: Etenyi ka tshitshe, hanyuyomena, la etenyi ka tshitshe ntu nyayomena?

²⁰Mete, mete, kanyutelami nti: Nyayulela, nyayunkumbula, keli wa la kete wayongenangena. Nyayuyala la lunyangu, keli lunyangu lanyu layukadimo ongenongeno.

²¹Lamʼatata umuntu lono, ndi ndjalaka la lunyangu ne dia etena kandi kambukuka. Keli lamʼayunduta ona, ndi huho shoko yandi ntu, ne dia ongenongeno andi dia untu ambuto la kete.

²²Okone nyu la lunyangu kakiane, keli dimi layunyena ntu, ku etema anyu wayongenangena. Nduku untu ayunyohotola ongenongeno anyu.

²³Lushi lako, nyu hanyumumbula dikambu. Mete, mete, kanyutelami nti: Dikambu tshe diayunyolomba Papa lu lukumbu lami, ndi ayunyushadio.

²⁴La ntundu nyu konomba dikambu lu lukumbu lami. Nyolombe, nyayulungula, dia ongenongeno anyu aluli.

²⁵Dimi lambunyutela akambu aso lu wela. Etena kayuyala lamʼayumuyala hanyutela akambu lu wela ntu, keli dimi layunyutela akambu wa Papa hwe.

²⁶Lushi loso, nyu nyayolomba lu lukumbu lami. Dimi hanyutela nti: Dimi layunyolombela Papa;

²⁷ne dia Papa ndame nyulangaka, ne dia nyu nyambunanga. Nyu nyambetawo nyati: Dimi lambuya uma le Papa.

²⁸Dimi lakayi uma le Papa, lambuya la kete. Dimi layumo la kete, layukalula le Papa.

²⁹Ambeki andi wakati vati: Enda, kakiane we ambututela akambu hwe, we hawati lu wela.

³⁰Kakiane shu tambeya shati: We mbeyaka akambu tshe, hahumbi untu nkumbula dikambu. Uma lu dikambu so, mbambutetawo shati: We ambuya uma le Unyashungu.

³¹Jesu akawambula ati: Nyu nyambetawo kakiane?

³²Enda, etena kayuyala, ee, kambuyalaka, lamʼayuwunyudianganya, untu laandi, untu laandi. Nyu nyayuntshika dime, keli aha dime, ne dia Papa eko la mi.

³³Dimi lambunyutela akambu aso, dia nyu ndjala la ki lʼutema ami. La kete, nyu la asui, keli nyongenengene! Dimi lambuleka wa la kete wulu.