Read tetala Joani 17 Bible Online

Joani 17 - tetala bible

Joani 17

¹Lamʼakati Jesu akambu aso, ndi akedia ashu utsha lʼulungu, akati ati: Papa, etena kambukuka. Utumbuli Onʼaye, dia Ona akutumbuli,

²uku akayawusha wulu wa mbulela antu tshe, dia ndi mbisha tshe wakayawusha lumu la pundju.

³Lumu la pundju lone, eli nkeya, weme Unyashungu wa mete, la Jesu Kristu, lakayatumi.

⁴Dimi lakakutumbula la kete, lakashidiya ulimu wakayambisha wa ntsha.

⁵Kakiane, Papa, untumbuli la ntundu kaye la lutumbu laki la mi kame la ye ntundu andja watatungama.

⁶Dimi lakenya lutumbu laye le antu wakayambisha uma le wa la kete. Waye mbakiwo, we kakambishawo. Vo wakakitanyia diui diaye.

⁷Kakiane, vo mbeyaka vati: Diango tshe diakayambisha diambuya uma le ye,

⁸ne dia dimi lakawasha aui wakayamvutela. Vo wakalungula; wakeyi mete vati: Dimi lakayi uma le ye. Vo wambetawo vati: We kakantumi.

⁹Dimi lambalombela. Dimi halalombela wa la kete, keli wane wakayambisha, ne dia vo weko waye.

¹⁰Tshe weli wami, weko waye, la wane tshe weli waye, weko wami; la dimi lambutumbwama le wo.

¹¹Dimi kema la la kete ntu, vo weko wa la kete, ku dimi luyayi le ye. Papa kʼEkila, ulami wane wakayambisha lu lukumbu laye, dia vo ndjala otoi uku wesu.

¹²Lamʼakimi la wo, dimi lakalamaka lu lukumbu laye, lakayambisha. Dimi lakalamaka wane wakayambisha. Nduku otoi awo akashisho, tshikima ona eshishwelu, dia afundelu nshidiyama.[66]

¹³Keli kakiane, dimi lambuya le ye. Lambuta akambu aso la kete, ne dia ongenongeno ami aluli lʼetema awo vame.

¹⁴Dimi lakawatela diui diaye. Wa la kete wakahetsha, ne dia vo kema wa la kete, uku wemi kema la la kete.

¹⁵Dimi halombe nti: Uwanya la kete, keli lambukolomba nti: Uwashimbeli uma lu kolo.

¹⁶Vo kema wa la kete, uku wemi kema la la kete.

¹⁷Uwakidia lu mete. Diui diaye dieko mete.

¹⁸Uku akayantumi lʼatei a wa la kete, okone mbakamatumi lʼatei a wa la kete.

¹⁹Dimi lambuyakidia lu dikambu diawo, dia ndu vo wayakidia lu mete.

²⁰Dimi halombela wane atu, keli lambolombela ndu waku wayumbetawo lu diui diawo,

²¹ne dia vo tshe wayali otoi. Papa, uku weye lʼutema ami, la dimi lʼutema aye, ndu vo wayali lʼetema asu. Okone wa la kete wetawo vati: We kakantumi.

²²Lutumbu lakayambisha, mbakamawasha, dia vo ndjala otoi uku wesu otoi:

²³dimi lʼetema awo, la we lʼutema ami, dia vo tshe ndjala paka otoi, ne dia wa la kete weyi vati: We kakantumi, kakalangi uku akayanangi.

²⁴Papa, dimi nangaka wane wakayambisha ndjala la mi lene ayumuyala, dia vo mena lutumbu lami lakayambisha, ne dia we akanangi la ntundu kʼetatelu kʼandja.

²⁵Papa kʼuluwanyi, wa la kete kunkeya, keli dimi lakakeyi, la wane wakeyi vati: We kakantumi.

²⁶Dimi lakawaewuya lukumbu laye, layuwaewuya ntu, dia ngandji kambukaye ndjala lʼetema awo, la dimi lʼetema awo.