Read tetala Joani 20 Bible Online

Joani 20 - tetala bible

Joani 20

¹Lushi la ntundu la lubingu, Mariya wʼusi Mangadala akayi la diumbu la kesekese, eki hyutshihutshi, yanyi yatawale. Ndi akatani dive diambunyama uma la diumbu.

²Ku ndi akalawo le Simona Petero la le umbeki ukina wakalangaka Jesu; akawatela ati: Vo wambunya Khumadiondjo uma lu diumbu, hateyi lene akawawetamisha.

³Ku Petero akatumbi ndi la umbeki ukina, wakatshu utsha la diumbu.

⁴Vo ahendi wakalawo kame. Umbeki ukina akaleki Petero luwangu, akakumi la diumbu ntundu.

⁵Ndi akemala, akalingela loko, akenyi ahondo wa linene walemi, keli ndi komboto loko.

⁶Ku Simona Petero akayi ayuyeli lʼokongo, akoto lu diumbu. Ndi akenyi ahondo wa linene walemi,

⁷ndu kitambala kaki lʼote a Jesu, kaki kumbalena la ahondo wa linene, kaki wombo lu dihuli dikina.

⁸Ku ndu umbeki ukina lakakumi ntundu la diumbu, akoto lʼokongo, akendi, aketawo.

⁹Ne dia laso ku vo watalimbitela diui diʼafundelu ati: Dieli la ndi dia mbulo uma lu nyoi.

¹⁰Ku ambeki wakakalula la wakawo.

¹¹Keli Mariya akemala lʼandja a diumbu alela. Lamʼakandalelaka osoku, ndi akalingela lu diumbu.

¹²Ndi akenyi andjelo ahendi wudjashi, wolotshi ahondo a wema, omotshi lʼote, ukina lʼekulu, lene aketami udu a Jesu.

¹³Vo wakawumbula vati: Umuntu, kalelaye na? Ndi akawatela ati: Ne dia vo wambunya Khumemi, haleyi lene akawawetamisha.

¹⁴Lamʼakandati osoku, ndi akasikiso, akenyi Jesu emadi, keli ndi kumbeya ati: Jesu.

¹⁵Jesu akawumbula ati: Umuntu, kalelaye na? Ayangaye na? Umuntu akukani ati: Ulami wʼekambo. Ndi akawutela ati: Uwandji, naka we akawunyisha, umvuteli lene akayatuwetamia, keli ntuwose.

¹⁶Jesu akaweti ati: Mariya! Mariya akasikiso; akawetawo lʼoteketa wʼasi Heberu ati: Raboni (nkadimula ati: Umbetsha).

¹⁷Jesu akawutela ati: Tumunandaki, ne dia dimi latambela le Papa. Keli utshu le analingu, utuwateli wati: Dimi layumbela le Papa, Shenyu, le Unyashungu ami ndu Unyashungu anyu.

¹⁸Mariya wʼusi Mangadala akayutela ambeki ati: Dimi lakenyi Khumadiondjo. Ndi akamvutedi akambu aso.

¹⁹La dikolo dia lushi loso, laki lushi la ntundu la lubingu, lamʼaki ambeki lu luudu, la kuki yudihami ne dia woma wʼasi Juda, Jesu akayi, akemala lʼatei awo. Ndi akawatela ati: Ki kayali la nyu!

²⁰Lamʼakandati diui so, ndi akawaenya anya la luhandju. Ku ambeki wakangenangena lamʼakawenyi Khumadiondjo.

²¹Ku Jesu akawatela ati: Ki kayali la nyu! Uku akantumi Papa, osoku mbanyutumami.

²²Lamʼakandati diui so, ndi akafufi lumu, akawatela ati: Nyulunguli Nyuma kʼOlolo.

²³Antu tshe wayunyudimanyia kolo, wayudimanyiama kolo yawo. Antu tshe wayunyutshikela kolo yawo, wayutshikala lu kolo yako.[75]

²⁴Keli Tomasi, omotshi a lʼambeki dikumi la ahendi, lakawetaka vati: Diasa, taki laawo lamʼakayi Jesu.

²⁵Ku ambeki akina wakawutela vati: Shu takenyi Khumadiondjo. Keli ndi akawatela ati: Naka dimi hamenyi fu yʼesumadi lʼanya andi, hambidji luhita lu fu yʼesumadi, la lunya lu luhandju landi, ku haletawo.

²⁶Lʼokongo a nshi enanei, ambeki andi waki lu luudu ntu, ndu Tomasi aki la wo. Lamʼakadihama kuki, Jesu akayi, akemala lʼatei awo. Ndi akati ati: Ki kayali la nyu!

²⁷Ku ndi akatela Tomasi ati: Udji luhita laye lane, enda anya ami. Usimbuli lunya, uludji lu luhandju lami. Tuyalaki la tamu, keli etawo.

²⁸Tomasi akûkaluya diui ati: Khumemi, la Unyashungu ami!

²⁹Jesu akawutela ati: We ambomena, mbambuyetawo. Wane wahatenyi, ku wambetawo, weko la otshoko.

³⁰Jesu akatshi tulimbitelu tukina efula lu ashu wʼambeki, tahafundami lu mukanda one.

³¹Keli akambu aso wambufundama dia nyu mbetawo nyati: Jesu eko Kristu, Onʼa Unyashungu; la dia nyu ndjala la lumu lu lukumbu landi lamʼayunyetawo.