Read tetala Joani 3 Bible Online

Joani 3 - tetala bible

Joani 3

¹Ufarise omotshi akiko, lukumbu landi Nikodemo. Ndi aki umbuledi omotshi wʼasi Juda.

²Pami kako akayi le Jesu lʼutshu, akawutela ati: Umbetsha, shu mbeyaka shati: Umbetsha wuyi uma le Unyashungu mbeye, ne dia nduku leya ntsha tulimbitelu tatshaye tone, tshikima Unyashungu keli la ndi.

³Jesu akûkaluya diui ati: Mete, mete, kakutelami nti: Untu heyi mena diulelu dia Unyashungu, tshikima ndi ambuto ntu.

⁴Nikodemo akawumbula ati: Lamʼeli untu ekumanyi, ukundi ayundeya mbuto? Ndi ayeya mboto etena ka hendi lʼutema a nyangu, ku ndi mbuto ntu?

⁵Jesu akûkaluya diui ati: Mete, mete, kakutelami nti: Untu heyi mboto lu diulelu dia Unyashungu, tshikima ndi ambuto le ashi la le Nyuma.

⁶Luto le dimba, eli dimba; luto le Nyuma, eli Nyuma.

⁷Tambaki dia diui diukutedimi nti: Dieli la ye dia mbuto ntu.

⁸Loheledi latopepaka lene alangalo. We mbukaka luhelu lalo, keli we heyi lene ayalo la lene atsholo. Untu tshe luto le Nyuma, eko osoku.

⁹Nikodemo akukiluya diui ati: Ukundi ayuyala akambu aso?

¹⁰Jesu akûkaluya diui ati: Umbetsha wa Isariyele mbeye, ku we hashihudia akambu aso?

¹¹Mete, mete, kakutelami nti: Shu mvutaka dieyasu, shu mvutelaka antu dienasu, ku nyu hanyetawo dia nyutelasu.

¹²Naka nyu hanyetawo akambu wa la kete wanyutelami, ukundi ayunyetawo akambu wa lʼulungu?

¹³Nduku untu lakambela lʼulungu, paka lakahulo uma lʼulungu, Onʼa untu ndame.

¹⁴Uku akunyia Mose ului lʼusui,[10] osoku dieli la Onʼa untu dia munyiyama;

¹⁵ne dia untu tshe lawetawo, ayali la lumu la pundju.

¹⁶Ne dia Unyashungu akalangi wa la kete utamanya, mbakandawasha Onʼandi etoi lakanduti, dia untu tshe lawetawo, tavokaki, keli ayali la lumu la pundju.

¹⁷Ne dia Unyashungu kuntuma Onʼandi la kete, dia ndjulumbuya wa la kete, keli dia wa la kete washimbameli le ndi.

¹⁸One lawetawo halumbuyama. One lahetawo ambulumbuyamaka: ne dia ndi kumbetawo lukumbu la Ona etoi a Unyashungu.

¹⁹Elumbwelu kene ati: Yanyi yakayi la kete, keli antu wakaleki nanga udjima, uleki yanyi, ne dia etsha awo waki kolo.

²⁰Untu tshe latutshaka kolo, atuhetshaka yanyi. Ndi hatuyakaka lu yanyi, watukutshumuya dia etsha andi.

²¹Keli untu tshe latutshaka akambu wa mete, atuyakaka lu yanyi, ne dia etsha andi wenami vati: Wakatshama le Unyashungu.

²²Lʼokongo wʼakambu aso, Jesu la ambeki andi wakayi lu kete ya Judiya. Ndi akatshikala la wo leko abatiza antu.

²³Ndu Joani akabatizaka lʼAyinona, lasuki la Salima, ne dia ashi efula waki leko. Antu wakayi, wakabatizama.

²⁴Laso ku Joani atadjama lu lukanu.[11]

²⁵Ambeki wa Joani wakadji la usi Juda omotshi tamu lu dikambu dia ndjaedia.

²⁶Vo wakayi le Joani, wakawutela vati: Umbetsha, ulungi, one laki la ye la wedi a Jorodana, lakayatelaka antu dikambu diandi, atubatizaka, ku antu tshe watuyakaka le ndi.

²⁷Joani akâkaluya diui ati: Untu heyi nungula dikambu, tshikima vo mbuwusha uma lʼulungu.

²⁸Nyu nyame nyeli emenyi wa aui wakamati nti: Dimi kema Kristu,[12] keli lakatumama la ntundu kandi.

²⁹Utshuki a wadi keli kanga wadi. Keli ongenyi wʼutshuki a wadi lemadi la luka diui diandi, atongenangenaka efula ne dia diui diʼutshuki. Okone ongenojigeno ami ambulula.

³⁰Ololo ndi ambeli, dimi nkitikiti.

³¹One luyi uma lʼulungu, keli ladiku dia tshe. One leli la kete, eko la la kete; ndi atutaka akambu wa la kete. One luyi uma lʼulungu, kuleki tshe.

³²Ndi atutaka akambu wakandenyi la wakanduki. Nduku untu ambetawo diui diandi.

³³One letawo diui diandi, akadji djimbitelu yandi ati: Unyashungu eko mete.

³⁴Ne dia one lakatumi Unyashungu, atutaka akambu wa Unyashungu, ne dia ndi kunkimo Nyuma la yediko.

³⁵Papa atulangaka Ona. Ndi akakimo akambu tshe lu anya andi.[13]

³⁶One letawo Ona, eko la lumu la pundju. Keli one lahakitanyia diui dia Ona, henyi lumu la pundju, kele ka Unyashungu keko le ndi.