Read tetala Joani 8 Bible Online

Joani 8 - tetala bible

Joani 8

¹Ku untu lʼuntu akakalula utsha lakandi. Keli Jesu akatshu lʼUkungu wʼEweli.

²Jesu akayi la kiesekese lu etemwelo ntu. Antu efula wakayi le ndi. Ndi akadjase, akawaetsha.

³Afundji la Afarise wakayi la umuntu omotshi lakawandi lʼuseka. Lamʼakawaweme lʼatei,

⁴vo wakawutela vati: Umbetsha, wakandji umuntu one lʼuseka, tshukʼanya.

⁵Mose akatutela lʼelembe ati: Nyuki wuhu wʼantu aku ave.[37] Keli we, ukundi wataye na?

⁶Wakati osoku, wuhimba, dia vo ndjala la dikambu dia mbosongwela. Keli Jesu akanyama, akafundi lu kete la luhita.

⁷Lamʼakawakolamela mbumbula, ndi akanyo, akawambula ati: One laha la dikambu dia kolo lʼatei anyu, atatela mbuka dive.

⁸Ndi akanyama ntu, akafundi lu kete la luhita.

⁹Lamʼakawuki diui so, vo wakamo otoi otoi, wakatatela uma le one lakaleki ekumanyi pulu ndu le one la ndjihelu. Wakatshiki Jesu ndame la umuntu kamʼakindi lʼatei.

¹⁰Jesu akanyo, akawumbula ati: Umuntu, lendʼewo na? Nduku untu lukamisha?

¹¹Ku ndi akati ati: Khumadiondjo, nduku untu. Jesu akati ati: Ndu dimi hakamia. Tshoka, tutshaki kolo ntu.

¹²Jesu akawatela ntu ati: Yanyi ya wa la kete mbemi.[38] One landjela, hakendakenda lu udjima, keli ndi ayuyala la yanyi ya lumu.

¹³Ku Afarise wakawutela vati: We ambuyata. Diui diaye kema mete.[39]

¹⁴Jesu akâkaluya diui ati: Naka dimi ndjataka, keti diui diami mete kedio; ne dia dimi mbeyaka uma lene uyemi, ndu utsha lene atamatshu. Keli nyu hanyeyi uma lene uyemi, ndu utsha lene atamatshu.

¹⁵Nyu nyatulumbuyaka uku dimba. Dimi halumbuya untu.

¹⁶Ee, naka dimi latulumbuyaka, keti elumbwelu kami keko mete, ne dia dimi kema dime, keli dimi la Papa lakantumi.

¹⁷Lu elembe anyu nfundama ati: Diui dia emenyi ehendi dieko mete.

¹⁸Dimi latuyataka, ndu Papa lakantumi atumvutaka.

¹⁹Vo wakawumbula vati: Lendʼeli sho na? Jesu akâkaluya diui ati: Nyu hanyumbeyi, hanyenyi Papa. Utunyumbeya, tshiki nyu mbeyaka ndu Papa.

²⁰Aui aso mbakandati lu dihuli diʼekitshelu, lamʼakandetshaka antu lʼetemwelo. Nduku untu akawundi, ne dia unya andi atakuki.

²¹Jesu akawatela ntu ati: Layutsho, nyayunyanga, nyayuvo lu kolo kanyu. Nyu hanyeyi ndja lene atamatshu.

²²Ku asi Juda wakati vati: Ndi mvutaka ati: Nyu hanyeyi ndja lene atamatshu, undi, ndi ayuyadiaka?

²³Ndi akawatela ati: Nyu nyeko wa lasi, dimi leko la lʼulungu. Nyu nyeko wa la la kete nye, dimi kema la la kete nye.

²⁴Dimi lakanyutela nti: Nyu nyayuvo lu kolo yanyu. Naka nyu hanyumbetawo nyati: Dimi keli ndi, nyu nyayuvo lu kolo yanyu.

²⁵Ku vo wakawumbula vati: Akona eye? Jesu akawatela ati: Dimi keli ndʼako lakamanyutela umakʼetatelu.

²⁶Dimi la akambu efula wa mvuta ndu wa numbuya lu dikambu dianyu. Keli one lakantumi, eko mete. Akambu ako wakamuki mbatelami wa la kete.

²⁷Vo kumbeya vati: Ndi ambuwatela dikambu dia Shi.

²⁸Jesu akawatela ati: Lamʼayunyunyia Onʼa untu, nyayeya nyati: Dimi keli ndi. Ndu dimi dime halatshi dikambu, keli latutaka akambu wakambetsha Papa.

²⁹One lakantumi eko la mi; ndi kuntshikami dime, ne dia dimi latutshaka akambu watongenyangenyaka nshi tshe.

³⁰Lamʼakandati aui aso, efula wakawetawo.

³¹Jesu akatela asi Juda wakawetawo ati: Naka nyu nyayutshikala lu diui diami, keti ambeki ami mete mbenyu.

³²Nyu nyayeya akambu wa mete, ku akambu wa mete wayunyutshungula.

³³Vo wakûkaluya diui vati: Tukanula tʼAbarahama mbesu.[40] Shu kundjala fumbi yʼuntu edja ndu kakiane. Ukundi wataye wati: Nyu nyayutshungo?

³⁴Jesu akâkaluya diui ati: Mete, mete, kanyutelami nti: Untu tshe latutshaka kolo, eko fumbi ka kolo.

³⁵Fumbi hatuyalaka lu luudu pundju, keli Ona katuyalaka loko pundju.

³⁶Okone naka Ona ayunyutshungula, mete nyu nyayutshungo.

³⁷Dimi mbeyaka nti: Tukanula tʼAbarahama mbenyu. Keli nyu nyatuyangaka ndjakami, ne dia diui diami kema la dihuli lʼetema anyu.

³⁸Dimi latutaka akambu wakamenyi uma le Papa, ndu nyu nyatutaka akambu wakanyenyi uma le shenyu.

³⁹Vo wakûkaluya diui vati: Abarahama keli tshesu. Jesu akawatela ati: Utunduyala tukanula tʼAbarahama mbenyu, tshiki nyututshaka uku akatshaka Abarahama.

⁴⁰Keli kakiane nyu nyangaka ndjakami, dimi lunyutedi akambu wa mete, wakamuki uma le Unyashungu. Keli Abarahama kuntsha osoku.

⁴¹Nyu nyatutshaka uku atutshaka shenyu. Vo wakawutela vati: Shu kumbuto lu luseka; teko la Shesu otoi, ee, Unyashungu.

⁴²Jesu akawatela ati: Utunduyala Unyashungu keli Shenyu, tshiki nyutunanga, ne dia dimi lambuya uma le Unyashungu. Dimi kundja lu lulangu lami, keli ndi kakantumi.

⁴³Okoko wana wahanyashihudia aui watami? Paka ne dia nyu kema la wulu wa nunga diui diami.

⁴⁴Ana wa uhimbanyi shenyu mbenyu. Nyu nangaka ntsha uku shenyu. Uma lʼetatelu ndi aki udjakanyi. Ndi hatemalaka lu mete, ne dia mete kema lʼutema andi. Lamʼatandi kashi, ndi atutaka akambu weli lʼutema andi ndame. Ne dia kanga kashi kendi, ndu shi kashi.

⁴⁵Keli ne dia dimi latutaka mete, mbahanyambetawo.

⁴⁶Akona ayunyimbula dia dikambu dia kolo? Naka mete katami, ukundi ahanyambetawo?

⁴⁷Untu a Unyashungu atutaka akambu a Unyashungu. Nyu hanyuwauki, ne dia nyu kema wa Unyashungu.

⁴⁸Asi Juda wakûkaluya diui vati: Shu kumvuta mete shati: Usi Samariya keye, ndu kanga odienge, uka?

⁴⁹Jesu akâkaluya diui ati: Dimi kema la odienge, keli latolemiaka Papa, nyu nyatomonyolaka.

⁵⁰Keli dimi hayangi lutumbu lami dime. Ukina eko latuyangaka, latulumbuyaka.

⁵¹Mete, mete kanyutelami nti: Naka untu ayukitanyia diui diami, ndi havu pundju.

⁵²Asi Juda wakawutela vati: Kakiane shu tambeya shati: Kanga odienge keye. Abarahama akavu, ndu amvutshi. Keli we mvutaka wati: Naka untu ayukitanyia diui diami, ndi hunganela nyoi pundju.

⁵³We kuleki tshesu Abarahama lakavu, ndu amvutshi, uka? Akona ayafanya la ndi?

⁵⁴Jesu akâkaluya diui ati: Naka dimi layuyatumbula, lutumbu lami leko anyanya. Papa kutuntumbulaka, one latunyutaka nyati: Unyashungu asu mbendi.

⁵⁵Nyu kumbeya. Utunduyala dimi layuta nti: Halaweyi, dimi lutuyala kanga kashi uku nyu. Keli dimi mbeyaka, la latukitanyiaka diui diandi.

⁵⁶Tshenyu Abarahama akangenangena dia mena lushi lami. Ndi akalenyi, ku akangenangena.

⁵⁷Ku asi Juda wakawumbula vati: Deku diaye diatakuki akumi atanu, we akenyi Abarahama uka?

⁵⁸Jesu akawatela ati: Mete, mete, kanyutelami nti: La ntundu watuti Abarahama dimi laki kamemi ane.

⁵⁹Ku vo wakatongona ave dia mbuka, keli Jesu akayashe, akatumbi uma lʼetemwelo.