Read tetala Etsha wa Atumami 1 Bible Online

Etsha wa Atumami 1 - tetala bible

Etsha wa Atumami 1

¹Teofilo li, buku dia ntundua[1] diakamafundi diku, ne dia akambu tshe wakatatela Jesu ntsha ndu mbetsha,

²edja ndu lushi lakandosama lʼulungu, lʼokongo a lamʼakandashili mbidjangela atumami wakandasonola uma le Nyuma kʼOlolo.

³Le waku wakandayaenya la lumu lʼokongo wʼasui andi uma lu ahimbelu efula. Ndi akenama le wo yediko ya nshi akumi anei. Ndi akataka akambu wa diulelu dia Unyashungu.

⁴Lamʼakandasangana kame la wo, ndi akakokomiya ati: Tanyumoki uma la Jerusalema, keli nyukungi daka dia Papa,[2] diakanyuki uma le mi.

⁵Ne dia Joani akabatizaka lʼashi, keli nyu nyayubatizama la Nyuma kʼOlolo,[3] aha nshi efula umaka kakiane.

⁶Okone lamʼakawasangana kame, vo wakawumbula vati: Khumadiondjo, undi, we ayulwela Isariyele diulelu lu etena kakona?

⁷Ndi akâkaluya diui ati: Aha dikambu dianyu dia mbeya tena kana enonyi wakashikike Papa lu wulu andi.

⁸Keli nyu nyayulungula wulu lamʼayuya Nyuma kʼOlolo le nyu. Nyu nyayuyala emenyi ami lu Jerusalema, lu Judiya tshe la Samariya edja ndu lʼekumelu ka kete.[4]

⁹Lamʼakandashili mvuta aui aso, lamʼakawawendaka, ndi akosama utsha lʼulungu. Dingi diakulungula uma lu ashu awo.[5]

¹⁰Lʼetena kakawendaka utsha lʼulungu tee, lamʼakandatatshokaka, nyulungi, apami ahendi wolotshi ahondo wa wema, wakemala lasuki la wo.

¹¹Vo wakati vati: Nyu asi Ngalili, dikambu kuna diemalanyu, ku mendaka lʼulungu? Jesu one, lambosama lʼulungu uma le nyu, ayuya wuhu ako, uku awenanyu atatshu utsha lʼulungu.

¹²Ku vo wakakalula utsha la Jerusalema uma lʼukungu, wetawo vati: Ukungu wʼEweli, weli lasuki la Jerusalema, uku lokendo la lushi otoi lʼekila.

¹³Ku lamʼakawakalula leko, vo wakambela lu luudu la ladiku, lene akawadjaseka, Petero, Joani, Jakoba, Andere, Filipo, Tomasi, Baratolomayo, Mateu, Jakoba, onʼa Alafayo, Simona Kanga-Saki, Judasi, onʼa Jakoba.[6]

¹⁴Vo tshe wakakolamela nomba lʼutema otoi, kame la amantu, ndu la Mariya nyangu Jesu la anangu.

¹⁵Lu nshi sho, Petero akemala lʼatei a anyandi (waki ului wʼantu kame uku lukama la akumi ahendi), akati ati:

¹⁶Analingu, diaki la afundelu nshidiyama kakati Nyuma kʼOlolo ntundu lʼunyo wa Davidi, ne dia Judasi laki olombodi a waku wakandi Jesu,

¹⁷ne dia ndi akalema la su. Ndi akalungula etenyi kandi lʼulimu one.

¹⁸(Untu one akakundja ekambo la difutu dia kolo kandi. Ndi akako ekhukhumadi, akate kʼatei; esohi andi tshe wakatumbi.

¹⁹Dikambu so diakeyama le asi Jerusalema tshe. Okone vo waketi ekambo kako lʼoteketa awo vati: Aleledama, nkadimula ati: Ekambo ka Dikila.)[7]

²⁰Ne dia ambufundama lu buku diʼEsambu ati: Edjaselu kandi kayali hwe; Untu tadjaseki loko,[8] La ukina akiti ulimu andi.[9]

²¹Okone uma lʼatei wʼapami wakakendakendaka la su tena tshe diakotoka ndu diakatumbaka Khumadiondjo Jesu lʼatei asu,

²²umaka batiza ka Joani[10] edja ndu lushi lakandosama utsha lʼulungu,[11] dieli la omotshi ndjala omenyi kame la su lu eulwelu kandi.

²³Vo wakeme ahendi, Josefu, letawo vati: Barasaba, letawo ntu vati: Justo, la Matiyasi.

²⁴Ku vo wakalombe, wakati vati: We Khumadiondjo, leya etema wʼantu tshe, lʼatei wʼantu ane ahendi, utenya one lakayasonodi,

²⁵dia ndi nkita dihuli la ulimu one ndu utumami diakatshiki Judasi, ne dia ndi ntsho lu dihuli diandi.

²⁶Vo wakawaukela uwali. Uwali akandi Matiyasi. Ku ndi akalema kame la atumami dikumi la otoi.