Read tetala Etsha wa Atumami 10 Bible Online

Etsha wa Atumami 10 - tetala bible

Etsha wa Atumami 10

¹La Kayisariya kaki pami kemotshi, lukumbu landi Koneliyo, laki olombodi wʼului wʼalimbi wakawetaka vati: Wʼasi Italiya.

²Ndi aki untu ololo, akukaka Unyashungu woma, ndi la wa lu luudu landi tshe. Ndi akashaka antu diango efula la ketshi, akalombaka Unyashungu nshi tshe.

³Lamʼaki unya lʼeshidi esatu la dikolo, ondjelo wa Unyashungu akawotwela; akaweti lʼenelo ati: Koneliyo!

⁴Ndi akawendi tee, akuki woma; akati ati: Khumadiondjo, nemʼeku? Ondjelo akawutela ati: Dombelo diaye la diango diatuyushanaka la ketshi diambumbela uku euhwelu lu ashu wa Unyashungu.

⁵Kakiane, utumi apami la Jopa, watuyi la Simona, lukumbu landi lukina Petero.

⁶Laka Simona, olongosodi a dikuhu, kuhangindi. Luudu landi leko lʼumamu wʼashi a waki.

⁷Lamʼakamo ondjelo wakateketaka la ndi, ndi aketi ekambi andi ehendi, ndu dimbi diʼololo, diakayalaka lasuki la ndi nshi tshe.

⁸Lamʼakandawatela akambu aso tshe, ndi akatumi utsha la Jopa.

⁹La wedi a pindju, vo wakatshu lu mbuka. Lamʼakawasukana lʼusumba, Petero akambela ladiku dia luudu dia ntolomba. Unya aki lʼatei wʼote.

¹⁰Ndi akuki ndjala, akalangi nde. Keli lamʼakawalongosolaka ma, ndi akako la yimbatshimba.

¹¹Ndi akenyi ulungu ambudiho, la engo uku dihondo dia wuki diayahulo uya la kete, diukimamedi lu atshuku adio anei.

¹²Loko kaki wehu tshe wa nyama yʼekulu enei, la diango diayakutula la kete la fudu ya lʼulungu.

¹³Ndi akuki diui ati: Petero, eto! udiaki, uli.

¹⁴Keli Petero akati ati: Kema, Khumadiondjo, dimi halatolekaka engo kʼengo, ndu keli mindu.

¹⁵Diui diakayi le ndi etena ka hendi ati: Tetaki kene kakedia Unyashungu wati: Engo kʼengo.

¹⁶Wakatshi osoku tena satu. Kemʼedja, engo kako kakâkaluyama utsha lʼulungu.

¹⁷Lamʼakakanana Petero lʼutema ati: Ukundi eli enelo kenyimi keku? Ku apami wakatumi Koneliyo, lamʼakawashili mumbula luudu la Simona, wakemala la suku;

¹⁸waketi, wakambula kana Simona letawo vati: Petero mpanga loko.

¹⁹Lamʼakakanaka Petero dia enelo keso, Nyuma akawutela ati: Enda, apami asatu wakuyanga.

²⁰Keli unela, uhulo lʼesi. Utshu la wo, tukandakandaki, ne dia dimi lambatuma.

²¹Petero akahulo le apami ako, akati ati: Enda, dimi layanganyu one. Dikambu diakona diuyenyu?

²²Vo wakati vati: Koneliyo, olombodi wʼalimbi, untu ololo, luka Unyashungu woma, lukumu landi leko ololo lu wudja tshe wʼasi Juda, ondjelo wʼekila akawutela dia nketa lakandi, la dia mbuka aui aye.

²³Okone Petero akawaeti, akahangia. La wedi a pindju, Petero akunela, akatshu la wo; ndu anyawo motshi uma la Jopa wakutshindela.

²⁴La wedi a pindju, vo wakakumi la Kayisariya. Koneliyo akalungula, aketi wa lu khumbu kandi tshe la engenyi andi.

²⁵Lamʼakuto Petero, Koneliyo akulungula, akayakosha lʼekulu andi, akotemola.

²⁶Keli Petero akawunyiya ati: Unela, ndu dimi keli untu.

²⁷Lamʼakandateketaka la ndi, ndi akoto, akatani antu efula loko.

²⁸Ndi akawatela ati: Nyu mbeyaka nyati: Dikambu dia usi Juda mbekesanela la usi wudja ukina, kana mboto lu luudu landi, eko ekila. Keli Unyashungu ambomenya ati: Tetaki nduku untu wati: Untu kʼuntu, kana kanga mindu.

²⁹Uma lu dikambu so, mbuyemi. Lamʼakawambetshi, dimi konseka. Okone lambunyumbula diumbetshinyu.

³⁰Koneliyo akati ati: Nshi nyei yambeta, lamʼaki unya uku lʼushidi one, lamʼakamalombaka lu eshidi esatu lu luudu lami, nyulungi, pami kemotshi akemala la ntundu kami olotshi ahondo wa ngaingai.

³¹Ndi akati ati: Koneliyo, Unyashungu ambuka dombelo diaye. Ndi mbuhoka diango diatuyushanyaka la ketshi.

³²Okone utumi diui la Jopa dia nteta Simona, letawo vati: Petero. Laka Simona, olongosodi a dikuhu, kuhangindi, lʼumamu wʼashi a wuki.

³³Okone mbakamakutumela diui esadi. We akatshi ololo, ne dia we ambuya. Shu tshe teko lindu kakiane lu ashu wa Unyashungu, dia mbuka akambu tshe wakakutela Khumadiondjo.

³⁴Petero akafula unyo, akati ati: Mete, dimi lambeya nti: Unyashungu kema la shonodi yʼantu.[79]

³⁵Keli ndi mbetawoka wa lu wedja tshe, wane wawuka woma la watsha akambu wʼololo.

³⁶Ndi kakatumela asi Isariyele diui, kakasambisha lukumu lʼololo la ki uma le Jesu Kristu (ndi keli uwandji wa kete tshe).

³⁷Nyame mbeyaka diui ne, diakadiangana la Judiya tshe, akatatela uma la Ngalili, lʼokongo a batiza kakasambishaka Joani,

³⁸dia Jesu yʼusi Nazareta, uku akuludia Unyashungu la Nyuma kʼOlolo ndu la wulu. Ndi akakindulaka atatshi akambu wʼololo, atakonoya wane tshe wakasuyamaka le uhimbanyi, ne dia Unyashungu aki la ndi.

³⁹Shu teko emenyi wakambu tshe wakandatshi lu leke lʼasi Juda, ndu la Jerusalema. Vo wakudiaki, wakuhane lʼutamba.

⁴⁰Unyashungu akawulula lushi la satu; aketawo dia ndi menama,

⁴¹aha le antu tshe, keli paka le su, shu wane wakasonwama le Unyashungu, uku emenyi; shu wane wakalekaka la ndi, wakanokaka la ndi lam akandulo uma lu nyoi.

⁴²Ndi akatokokomiya ati: Nyusambisha antu, nyuwaenya nyati: Ndi akasonwama le Unyashungu, dia ndjala umbuledi a wasena la wakavu.

⁴³Amvutshi tshe wambuwuta vati: Untu tshe lawetawo, ayulungula edimanyelu ka kolo lu lukumbu landi.

⁴⁴Lamʼakati Petero aui aso, Nyuma kʼOlolo akahulwela tshe wakuki diui.

⁴⁵Wane waketawo, waki ambahemi wa ehekeli, wakayi le Petero, wakambi, ne dia wakatshulwela ndu asi wedja ushasha a Nyuma kʼOlolo.

⁴⁶Ne dia vo wakawauki wateketa lu eteketa ekina; watumbula Unyashungu. Ku Petero akâkaluya diui ati;

⁴⁷Untu akona aki la wulu wa nshimba wane wakalungula Nyuma kʼOlolo uku shu, dia mbatizama lʼashi?

⁴⁸Ndi akati ati: Wabatizami lu lukumbu la Jesu Kristu. Ku vo wakôlombe dia ndi ntshikala la wo nshi motshi.