Read tetala Etsha wa Atumami 11 Bible Online

Etsha wa Atumami 11 - tetala bible

Etsha wa Atumami 11

¹Atumami la anyawo waki la Judiya wakuki vati: Ndu asi wedja wambulungula diui dia Unyashungu.

²Lamʼakayi Petero la Jerusalema, ambahemi wʼehekeli wakadji la ndi tamu,

³wata vati: Okoko wana wakayatshu le wane wahatahema ehekeli, ndu wakayali la wo ma?

⁴Keli Petero akatatela mbatela dikambu diako ati:

⁵Dimi laki lʼusumba wa Jopa lalomba. Lamʼakimi la yimbatshimba, dimi lakenyi enelo: engo kakahulo uku dihondo uma lʼulungu, diukimamedi lu atshuku anei; diakampulwela.

⁶Lamʼakamadiendi tee, dimi lakadilimbitela, lakenyi nyama yʼekulu enei ya la kete, la nyama ya lʼukunda, la diango diayakutula, la fudu ya lʼulungu.

⁷Dimi lakuki ndu diui diamvutela ati: Petero, eto! udiaki, uli.

⁸Keli dimi lakati nti: Kema, Khumadiondjo, nduku engo kʼengo, kana ka mindu, kakoto lʼunyo ami.

⁹Keli diui diakayi uma lʼulungu etena ka hendi ati: Tetaki kene kakedia Unyashungu wati: Engo kʼengo.

¹⁰Dikambu so diakatshama tena satu. Diango tshe diakakutwama utsha lʼulungu ntu.

¹¹Nyulungi, kemʼedja, apami wakawatumi le mi uma la Kayisariya wakemala la ntundu ka luudu lone akisu.

¹²Nyuma akamvutela ati: Tshoka la wo, tuyalaki la shonodi. Ndu anyasu ane asamalu wakatshindela; takoto lu luudu la pami kako.

¹³Ndi akatutela uku ak ndenyi ondjelo emadi lu luudu landi, ndu uku akandawutela ati: Utumi antu la Jopa watuyi la Simona, lukumbu landi lukina Petero.

¹⁴Ndi ayukutela aui wa nkushimbela, we la wa lu luudu laye tshe.

¹⁵Lamʼakamatatela nteketa, Nyuma kʼOlolo akahulwela, uku akandatuhulwela ma lʼetatelu.

¹⁶Ku dimi lakuho diui dia Khumadiondjo, diakandati ati: Mete, Joani akabatizaka lʼashi, keli nyu nyayubatizama la Nyuma kʼOlolo.[80]

¹⁷Okone naka Unyashungu akawasha ushasha uku akandatusha, lamʼakatetawo Khumadiondjo Jesu Kristu, dimi laki na, dia nsemanela la Unyashungu?

¹⁸Lamʼakawuki akambu aso, vo wakalembohala, wakatumbula Unyashungu; wakati vati: Unyashungu ambusha ndu asi wedja ekadimwelu kʼetema utsha lu lumu.

¹⁹Wane wakahandjo ne dia asui wakayala dia nyoi ka Stefano,[81] wakatshu la Fonikiya la Kupiro la Atiyoka. Vo kumvutela nduku untu diui, tshikima asi Juda atu.

²⁰Keli amotshi awo waki asi Kupiro la asi Kurene wakayi lʼAtiyoka, wakasambisha ndu asi Ngirika lukumu lʼololo la Knumadiondjo Jesu.

²¹Lunya la Khumadiondjo laki la wo. Antu efula waketawo, wakakadimo le Khumadiondjo.

²²Lukumu la dikambu diawo lakakumi lʼatui wʼekelizia waki la Jerusalema, ku vo wakatumi Baranaba pulu ndu lʼAtiyoka.

²³Lamʼakandakumi, lamʼakandenyi ngandji ka mamba ka Unyashungu, ndi akangenangena, akakokomiya vo tshe ati: Nyumamemi Khumadiondjo la esangwelu lʼetema.

²⁴Ne dia ndi aki untu ololo, lakaluli la Nyuma kʼOlolo ndu la mbetawo, ku antu efula wakasanganyema le Khumadiondjo.

²⁵Okone Baranaba akatshu la Taraso dia ntuyanga Saulu.

²⁶Lamʼakandatuwushula, ndi akayi la ndi lʼAtiyoka. Vo wakasanganaka la ekelizia utundu wʼeleku. Vo waketsha antu efula, wakatatela mbeta ambeki vati: Asika Kristu lu Atiyoka.

²⁷Lu nshi sho, amvutshi amotshi wʼuma la Jerusalema wakayi lʼAtiyoka.

²⁸Omotshi, lukumbu landi Angabo,[82] akemala. Nyuma akawenya ati: Ndjala ka kasha ka wulu kayuyala lu kete tshe. Mete, to kakayi lu nshi ya Kolodiyo.

²⁹Ambeki tshe, untu la untu uku wulu andi, wakasanguya dia ntumela anyawo wakaladi la Judiya diango dia mbakimanyia.

³⁰Vo wakatshi okone: wakatumela dikumanyi diango lʼanya wa Baranaba la Saulu.