Read tetala Etsha wa Atumami 12 Bible Online

Etsha wa Atumami 12 - tetala bible

Etsha wa Atumami 12

¹Lu nshi sho, khumʼekanga Herode akandi asi Ekelizia amotshi dia mbasuya.

²Ndi akadiaki Jakoba, onangu Joani, la yombo.

³Lamʼakandenyi ati: Dikambu ne diambongenyangenya asi Juda, ndi akandi ndu Petero. Nshi yako, yaki nshi ya Ma Diaha la Edya.

⁴Lamʼakandawundi, ndi akukimo le enongo enei wʼalimbi dia mbulama. Ndi akalangi dia mbela le antu lʼokongo wʼElekanelu.[83]

⁵Dia dikambu so, mbakalamema Petero lu lukanu, keli ekelizia kumpeko mbolombela Unyashungu.

⁶Lʼutshu a lushi lakalangi Herode ntundja Petero, Petero aketami lʼatei wʼalimbi ahendi, ukelekami molola ehendi. La suku kaki alami wakalamaka luudu la lukanu.

⁷Nyulungi, ondjelo wa Khumadiondjo akemala la le ndi, ku usasi akahete lu luudu. Ondjelo akahumela Petero lu luhandju, akawemula; akati ati: Unela esadi! Ku molola wakamo uma lu anya.

⁸Ondjelo akawutela ati: Olote uya, udji tupapa. Ndi akatshi osoku. Ku ndi akawutela ati: Udji koti diaye, undjeli.

⁹Ndi akatumbi, akuyeli. Ndi kumbeya ati: Kene katsha ondjelo mete keto; keli ndi akakani ati: Enelo kenami.

¹⁰Lamʼakawalekana elamelu ka ntundu la ka hendi, vo wakakumi lu lukuki la luwulu ladihulawo utsha lʼusumba; lo lakadiho. Ku vo wakatumbi, waketi lʼosese wame. Kemʼedja, ondjelo akutshiki.

¹¹Lamʼakeyi Petero dikambu diako ololo, ndi akati ati: Kakiane, dimi lambeya mete nti: Khumadiondjo ambutuma ondjelo andi, ambuntshungula uma lʼanya wa Herode.

¹²Lamʼakandatakanaka yimba dia dikambu diako, ndi akakumi lu luudu la Mariya, nyangu Joani, laki la lukumbu landi lukina Mako. Loko kakasangana antu efula wakalombaka.

¹³Lamʼakandakokola lu lukuki, ukambi a umuntu, lukumbu landi Roda, akatshu, aketawo.

¹⁴Lamʼakanduki diui dia Petero, ndi kundjihula lukuki ne dia ongenongeno, keli akalawo utsha lu luudu; akati ati: Petero one emadi la suku!

¹⁵Vo wakawutela vati: We ambudjo. Keli ndi akakokomiya ati: Mete. Vo wakati vati: Ondjelo andi oso!

¹⁶Keli Petero akatetemala nkokola. Lamʼakawadihula, vo wakawenyi, wakambi.

¹⁷Keli ndi akahahiya lunya dia vo nembohala. Ndi akawatela uku akutshungudi Khumadiondjo uma lu luudu la lukanu. Ndi akati ati: Nyuteli Jakoba la anyasu akambu ane. Ku ndi akamo, akatshu lu dihuli dikina.

¹⁸La pindju, alimbi wakahalaka dia mbeya wuhu wambuyala Petero.

¹⁹Herode akuyangi, keli ndi kumbena. Ndi akambula alami, akati dia mbadiaka. Ku ndi akamo uma la Judiya, akatshu utsha la Kayisariya, akatudjase leko.

²⁰Asi Tura la asi Sidona wakanyangia Herode wulu. Ku vo wakekesanela la Balasto, ulami a diango dia Khumʼekanga. Vo wakayi le Herode la utema otoi, wakalombe dia ndjala ki, ne dia leke la khumʼekanga lakaleshaka leke lawo.

²¹Lamʼakakuki lushi lakawasonola, Herode akalote ahondo wa diulelu, akadiase lu kiti ka diulelu, akahangohangwela.

²²Antu wakadji dielu vati: Diui dia etemolatemola kemotshi, aha dia untu!

²³Kemʼedja, ondjelo wa Khumadiondjo akokomola, ne dia ndi kuntumbula Unyashungu. Dikusu diakawoto lu dimba, ndi akavu.

²⁴Keli diui dia Unyashungu diakuli, diakafuli.

²⁵Baranaba la Saulu wakakalula uma la Jerusalema lamʼakawashidiya nkimo diango. Vo wakayi la Joani, lukumbu landi lukina Mako.