Read tetala Etsha wa Atumami 13 Bible Online

Etsha wa Atumami 13 - tetala bible

Etsha wa Atumami 13

¹Lʼekelizia wa lʼAtiyoka kaki amvutshi la embetsha, kumbu yawo Baranaba, la Simeyona, lakawetaka vati: Ningere, la Lukiyo, usi Kurene, la Manaena, lakuli la khumʼekanga Herode, la Saulu.

²Lamʼakawakambela Khumadiondjo ulimu, ndu lamʼakawakili mbu ya nde, Nyuma kʼOlolo akati ati: Nyonsonwele Baranaba la Saulu dia ulimu wakamawaeti.

³Lamʼakawakili mbu ya nde, vo wakalombe, wakawahe anya, ku wakatumi.

⁴Okone Baranaba la Saulu wakatshu la Selukiya. Vo wakamo uma leko, wakateho la Kupiro.

⁵Lamʼakiwo la Salami, vo wakatela antu diui dia Unyashungu lu temwelo diʼasi Juda. Ndu Joani akatshindela.

⁶Lamʼakawakindula lu kete sho tshe edja ndu la Pafo, vo wakatani usi Juda omotshi leko, kanga aloho, umvutshi a kashi, lukumbu landi Bara-Jesu.

⁷Ndi akayalaka la umbuledi, lukumbu landi Serengiyo Paulu, kanga yimba. Serengiyo Paulu aketi Baranaba la Saulu, akayangi mbuka diui dia Unyashungu.

⁸Keli Elimasi (nkadimula ati: Kanga aloho) akasike, akayangi munganyia umbuledi uma lu mbetawo.

⁹Ku Saulu, letawo ntu vati: Paulu, lakaludiama la Nyuma kʼOlolo, akawendi tee;

¹⁰akati ati: We ambulula la kashi la uhukusanu, we onʼa uhimbanyi, utunyi wʼakambu tshe wʼololo, we haheko munganyia antu uma lu mbuka yʼololo ya Khumadiondjo?

¹¹Ulungi, lunya la Khumadiondjo leko le ye, we ayutukuyala tshungu, henyi unya. Kemʼedja lungi la udjima akuhutamela. Ku ndi akakendakenda atayangi wane wa mbolombola la lunya.

¹²Lamʼakenyi umbuledi dikambu diakatshama, ndi aketawo, akambi dia wetshelu wa Khumadiondjo.

¹³Paulu la wane wakatatshokaka la ndi wakamo uma la Pafo, wakateho la Perenga ka la Pamufuliya. Joani akatshiki, akakalula la Jerusalema.

¹⁴Keli vo waketi uma la Perenga, wakakumi la Atiyoka wa la Pisidiya. Vo wakoto lʼetemwelo lushi lʼekila, wakadjase.

¹⁵Lamʼakawashili mbala elembe la aui wʼamvutshi, embuledi wʼetemwelo wakatu mela diui vati: Anyasu, naka nyu la diui dia ndaka antu, nyalaki

¹⁶Paulu akemala, akahahiya lunya; akati ati: Nyu asi Isariyele la nyu wane wuka Unyashungu woma, nyuhukami.

¹⁷Unyashungu a wudja one wa Isariyele wakasonola watshesu, akawaunyiya lamʼakiwo lʼEdjibitu,[84] akawanya uma lu kete sho la lunya la wulu.[85]

¹⁸Uku deku akumi anei mbakandatawaembaka lʼusui uku wali.[86]

¹⁹Lamʼakandamani wedja esambeli lu kete ya Kanana,[87] ndi akawasha kete yawo ukito[88] uku deku kama nyei la akumi atanu.

²⁰Lʼokongo diku, ndi akawasha embadi[89] edja ndu le umvutshi Samuele.[90]

²¹Lʼokongo diku, vo wakalombe khumʼekanga.[91] Unyashungu akawasha Saulu, onʼa Kisha, uma lu diuhu dia Bendjamina,[92] yediko ya deku akumi anei.

²²Lamʼakandawunya,[93] ndi akunyia Davidi dia ndjala khumʼekanga, one lakandati ati: Dimi lambutana Davidi, onʼa Jese, one lalangami; ndi ayutsha akambu tshe uku lulangu lami.[94]

²³Uma le tukanula tandi mbakela Unyashungu Ushimbedi Jesu le asi Isariyele, uku daka diandi.

²⁴Jesu atayi, Joani akasambishaka asi Isariyele tshe dikambu dia batiza ka ekadimwelu kʼetema.[95]

²⁵Lamʼakayangi Joani nshidiya ulimu andi, ndi akati ati: Ukundi akananyu? Dimi laha ndi.[96] One layayi lʼokongo ami, dimi kema ololo wukukimi nkelekula okodi a sabata yandi.[97]

²⁶Anyasu, tukanula tʼAbarahama, la nyu wane wuka Unyashungu woma lʼatei anyu, le su kakatumama diui ne dia panda.

²⁷Ne dia wane wudjashi la Jerusalema la embuledi awo, kumbeya kuyanga aui wa amvutshi watalemaka nshi yʼekila tshe. Vo wakashidiya aui ako lamʼakawawamia.

²⁸Kuyanga vo kumbutana la dikambu dia ndi mvo, vo wakalombe Pilata dia mbudiaka.[98]

²⁹Lamʼakawashidiya akambu tshe wakafundama lu dikambu diandi, vo wakunanula uma lʼutamba, wakawetamia lu diumbu.[99]

³⁰Keli Unyashungu akawulula uma lʼatei wʼedu.

³¹Wane wakayi la ndi uma la Ngalili utsha la Jerusalema, wakawenyi nshi efula.[100] Kakiane vo weko emenyi andi le antu.

³²Tambunyela lukumu lʼololo la daka diakawalaki watshesu,

³³ati: Unyashungu akashidiya daka ne le anʼasu, ne dia ndi akulula Jesu, ndu uku ufundami lʼusambu a hendi ati: Onʼami keye, Elo kukutshimi.[101]

³⁴Ne dia ndi akawulula uma lu nyoi, hakalula ntu lʼehondelo. Ndi akati ati: Dimi layunyusha etshoko wʼekila, Ndu wa mete, wakamalaki Davidi.[102]

³⁵Ne dia ndi akati ndu lʼusambu ukina ati: We hakimo lʼEkila dia ndi mponda.[103]

³⁶Lamʼakashidiya Davidi ntsha akambu wakalangi Unyashungu lu lolonga landi, ndi akavu, akakhundama kame la watshendi, akahonde.

³⁷Keli one lakulula Unyashungu komponda.

³⁸Anyasu, nyeyi nyati: Wambunyutela dikambu dia edimanyelu ka kolo yanyu uma le untu one.

³⁹Ndi ambuyindja untu tshe lawetawo lu akambu tshe, waki elembe wa Mose kumbuyindja.

⁴⁰Okone nyewo, dikambu diakawati lu aui wʼamvutshi diatukuyala le nyu, ati:

⁴¹Nyendi, nyu amonyodi, nyambi, nyuvu; Ne dia dimi lambutsha ulimu lu nshi yanyu, Ulimu wahanyakuki mbetawo, naka untu ayunyutela.[104]

⁴²Lamʼakawatumbi, vo wakasengasenga Paulu vati: Kumututela aui aso lushi lʼekila layayi.

⁴³Lamʼakahandjo antu, asi Juda efula la embetawudi wa dikambu diʼasi Juda wakayi le Paulu la Baranaba, wakakokomiya vati: Nyutshikali lu ngandji ka mamba ka Unyashungu.

⁴⁴Lushi lʼekila lukina, asi usumba efula wakasangana dia ndjuka diui dia Unyashungu.

⁴⁵Keli lamʼakenyi asi Juda elui wʼantu, vo wakuki kandjema. Wakadji tamu tʼakambu wakati Paulu, wakotenge.

⁴⁶Paulu la Baranaba wakatela antu diui la dihunga, vati: Diaki la su dia ntanyutedi diui dia Unyashungu ntundu, ne dia nyu nyakadituni; nyame nyambuyalumbuya nyati: Hatukuki nungula lumu la pundju. Nyulungi, shu tambukadimo le asi wedja.

⁴⁷Ne dia Khumadiondjo akatosengola okone ati: Dimi lambukukitsha usasi wʼasi wedja, Dia we ndjala panda le antu, Edja ndu la kuma ka kete.[105]

⁴⁸Lamʼakuki asi wedja diui so, vo wakangenangena. Vo wakatumbula diui dia Unyashungu. Wane wakasonwama lu lumu la pundju, waketawo.

⁴⁹Diui dia Khumadiondjo diakadiangana lu leke lako tshe.

⁵⁰Keli asi Juda wakatombosha amantu wʼololo waki la lukumu, ndu dihangamendi dia lʼusumba, wakatombosha antu dia nsuya Paulu la Baranaba, la dia mbatshanya uma lu leke lawo.

⁵¹Keli vo wakahumela ditshu diʼuma lu akaka awo,[106] wakatshu la Ikoniyo.

⁵²Ambeki wakaluli la ongenongeno ndu la Nyuma kʼOlolo.