Read tetala Etsha wa Atumami 15 Bible Online

Etsha wa Atumami 15 - tetala bible

Etsha wa Atumami 15

¹Antu amotshi wakayi uma la Judiya; waketsha anyasu vati: Naka hanyahema ehekeli uku etshelu ka Mose,[109] nyu hanyeyi nshimbamela.

²Lamʼakawadji la Paulu la Baranaba tamu, la mumbwana la wo embula, vo wakasonola Paulu la Baranaba la akina, dia vo ntsho la Jerusalema le atumami la dikumanyi lu dikambu diako.

³Ekelizia wakatshindela, waketi la Fonikiya la Samariya, wakatatelaka antu dia ekadimwelu kʼetema kʼasi wedja. Vo wakatamanya ngenyangenya anyawo tshe.

⁴Lamʼakawakumi la Jerusalema, ekelizia ndu atumami la dikumanyi wakalungula. Ku vo wakasanyia akambu tshe wakatshela Unyashungu.

⁵Keli amotshi wa lu leke lʼAfarise wako waketawo, wakunela, wakati vati: Eko uhumba wa mbahemia ehekeli, la mbatela dia vo nkitanyia elembe a Mose.

⁶Atumami la dikumanyi wakasangana name dia mumbwana dikambu diako.

⁷Lamʼakawambwana efula, Petero akemala, akawatela ati: Anyasu, nyu mbeyaka nyati: Unyashungu ambutshaka esonwelo edja lʼatei anyu, dia asi wedja wuki lukumu lʼololo uma lʼunyo ami, wetawo.[110]

⁸Unyashungu, leya etema, akayala omenyi awo, akawasha Nyuma kʼOlolo[111] uku akandatusha.[112]

⁹Ndi kuntutshikitanya la wo, akedia etema awo dia mbetawo kawo.

¹⁰Ya ukundi ahimbanyu Unyashungu, dia nyu mbidja lokoho lu kingu yʼambeki, laki watshesu kumbeya memba kuyanga shu?

¹¹Keli shu tambetawo shati: Shu tayushimbamela uma lu ngandji ka mamba ka Khumadiondjo Jesu uku vo.

¹²Antu tshe wakalembohala ki, wakahukamaka uku akataka Baranaba la Paulu, dia tulimbitelu la akambu wa mamba wakatshi Unyashungu lʼatei wʼasi wedja uma le wo.

¹³Lamʼakawalembohala, Jakoba akahula diui ati: Anyasu, nyumpukami!

¹⁴Simeyona akasanya okone akakendela Unyashungu asi wedja ntundu, dia nsonola antu amotshi uma lʼatei awo dia lukumbu landi.

¹⁵Dikambu ne dieko pupu la aui wʼamvutshi, uku ufundami ati:

¹⁶Lʼokongo wʼakambu aso, dimi layukalula. Dimi layuhika etumbu ka Davidi ntu, kakanyuko. Layolongosola diango diato diakalana, layukieme.

¹⁷Ne dia antu wutshikadi, wayangi Khumadiondjo, Ndu asi wedja tshe wetama lukumbu lami,

¹⁸Mbata Khumadiondjo, Lakalimbitshiya akambu ako umaka nshi yʼedjedja.[113]

¹⁹Okone dimi nkanaka nti: Tatohenyahenyaki asi wedja wambukadimo le Unyashungu.

²⁰Keli tuwafundeli dia vo nkimo ndjalanya la dikishi,[114] munanyi,[115] nyama yakawahini lu kingu ndu la dikila.[116]

²¹Ne dia lu nonga yaketi, Mose akayalaka la antu wakasambishaka akambu andi lʼusumba la usumba. Aui andi watalemaka lu temwelo nshi yʼekila tshe.

²²Atumami la dikumanyi ndu ekelizia tshe wakakani vati: Ndeka ololo shu nsonola anyasu amotshi, tatumi kame la Paulu la Baranaba utsha lʼAtiyoka. Vo wakasonola Judasi, lakawetaka vati: Barasaba, la Silasi, waki antu a waki lʼatei anyawo.

²³Vo wakafundela mukanda okone vati: Atumami, dikumanyi la anyawo wambutumela anyanyu wʼasi wedja weli lʼAtiyoka ka la Sudiya la Kilikiya moyo.

²⁴Takuki vati: Amotshi wakamo uma le su, wambunyohenyahenya lʼaui, wambulanya etema anyu. Shu kumbatela aui aso.

²⁵Lamʼakatadji sheki, shu takakani shati: Ndeka ololo shu nsonola apami wanyutumela kame la elangimi asu, Baranaba la Paulu,

²⁶antu waketawo nkimo nyumu yawo ne dia lukumbu la Khumesu Jesu Kristu.

²⁷Okone tambutuma Judasi la Silasi, ndu vo wayunyutela aui pupu lʼenyo.

²⁸Ne dia ndu Nyuma kʼOlolo ndu shu takakani shati: Kema ololo shu nyukitshiya wutshu a wuki, wuleki akambu weli uhumba.

²⁹Nyoseke diango diakawalambula dikishi, dikila, nyama yakawahini lu kingu, la munanyi. Naka nyambuyakimela lu akambu aso, nyu nyayutsha ololo. Moyo.

³⁰Lamʼakawalakana la wo, vo wakatshu lʼAtiyoka, wakatusanganya ului wʼantu, wakawasha mukanda.

³¹Lamʼakawawali, vo wakangenangena, ne dia esambelu kakawasambi.

³²Judasi la Silasi vame waki ndu amvutshi, okone vo wakalaki anyawo aui efula, wakakikitsha.

³³Lamʼakawatshikala nshi motshi leko, vo wakalakina la anyawo ki, wakakalula le wane wakatumi. [117]

³⁴Keli Silasi akakani ati: Ndeka ololo dimi ntshikali lane.

³⁵Ku Paulu la Baranaba wakatshikala lʼAtiyoka, wetsha la wasambisha antu lukumu lʼololo la diui dia Khumadiondjo, ndu antu akina efula.

³⁶Lamʼaketi nshi motshi, Paulu akatela Baranaba ati: Tutshu kakiane dia ntenda anyasu lʼusumba tshe wakatati diui dia Khumadiondjo, tutendi kana vo la wulu.

³⁷Baranaba akalangi ntsho ndu la Joani lakawetaka vati: Mako.

³⁸Keli Paulu akakani ati: Kema ololo shu ntsho la untu lakatutshiki lamʼakisu la Pamufuliya,[118] ndi kuntsho la su lʼulimu.

³⁹Tamu ta wulu takayala, ku vo wakatana: Baranaba akose Mako, akateho la ndi utsha la Kupiro;

⁴⁰ku Paulu akose Silasi, lamʼakukitsha anyawo lu ngandji ka mamba ka Khumadiondjo, ndi akatshu.

⁴¹Ndi aketi la Suriya ndu la Kilikiya, akakikitsha ekelizia.