Read tetala Etsha wa Atumami 16 Bible Online

Etsha wa Atumami 16 - tetala bible

Etsha wa Atumami 16

¹Paulu akakumi ndu la Derebe, ndu la Lustera. Nyulungi, umbeki omotshi aki leko, lukumbu landi Timote, onʼa usi Juda a umuntu, laketawo, keli shi aki usi Ngirika.

²Ndi aki la lukumu lʼololo le anyasu waki la Lustera la Ikoniyo.

³Paulu akalangi ntsho la ndi. Ndi akawose, akawahemia uhekeli, ne dia asi Juda waki lu beke diako, ndu ne dia vo tshe wakeyi vati: Shi aki usi Ngirika.

⁴Lamʼakawakindula lu esumba, vo wakawatela elembe wakadji atumami la dikumanyi diaki la Jerusalema, dia vo mbekitanyia.

⁵Okone ekelizia wakakikitshama lu mbetawo, wakafulanelaka la lushi la lushi.

⁶Lamʼakashimbi Nyuma kʼOlolo Paulu la Timote mvuta diui la Asiya, vo waketi lu leke la Firungiya la Ngalatiya.

⁷Lamʼakawakumi lu welelo wa Musiya, vo wakayangi ntsho utsha la Bituniya, keli Nyuma ka Jesu akashimbi.

⁸Ku vo waketi uma la Musiya, wakakumi la Toroa.

⁹Paulu akenyi enelo lʼutshu. Pami kemotshi kʼusi Makedoniya akemala osengasenga ati: Yaka la Makedoniya, uyutukimanyia.

¹⁰Lamʼakandenyi enelo, kemʼedja shu takayangi ntsho utsha la Makedoniya. Shu takakani shad: Unyashungu kambuteta leko dia ntasambisha lukumu lʼololo.

¹¹Lamʼakatunela la watu uma la Toroa, takasimbo utsha la Samotarake. La wedi a pindju, shu takakumi la Neapoli.

¹²Uma leko, shu takakumi la Filipi, usumba wuleki wuki lu leke la Makedoniya, ndu malu wʼasi Romo. Shu takahangi nshi motshi loko.

¹³Lushi lʼekila, shu takatumbi lʼandja a lukumbu, takatshu lʼumamu wʼokedi, lene akatakani shati: Leko keli dihuli dia dombelo. Shu takadjase, takateketa la amantu wakasangana leko.

¹⁴Umuntu omotshi, lukumbu landi Ludiya, usundjishi wʼahondo wa tilili, usi usumba wa Tuyadra, laki otemodi a Unyashungu, akuki aui asu. Khumadiondjo akadihula utema andi dia ndi mpukana akambu wakad Paulu.

¹⁵Lamʼakandashili mbatizama, ndi la wa lu luudu landi, ndi akatosengasenga ati: Naka nyu nkanakami nyati: Dimi leko la kolamelu le Khumadiondjo, nyuyi lakami, nyuyuhangi. Ku ndi akatetawuya.

¹⁶Lamʼakatatatshokaka utsha lu dihuli dia dombelo, shu takasangana la fumbi kʼusekaseka, laki la nyuma ka doho, lakakundjiyaka akhumendi diango efula uma lʼaloho andi.

¹⁷Ndi akatuyeli, shu la Paulu, ayahangohango ati: Antu ane weko ekambi wa Unyashungu KhumʼUlungu, wambunyutela dia mbuka ka panda.

¹⁸Ndi akatshaka osoku nshi efula. Keli Paulu akanyangi wulu, akasikiso, akatela nyuma kako ati: Dimi lambukutela lu lukumbu la Jesu Kristu nd: Utumbi uma le ndi. Lʼushidi oso, nyuma kako akatumbi.

¹⁹Keli lamʼakenyi akhumendi one lakawashaka waho ambutumba, vo wakandi Paulu la Silasi, wakakutula utsha la kituka lu ashu wʼembuledi.

²⁰Lamʼakawawaela le embadi, vo wakati vati: Antu ane wʼasi Juda wambutamanya ntombosha usumba asu.

²¹Vo wambutetsha ditshelu dieli olembe dia shu nungula kana dikitanyia, shu asi Romo.

²²Ului wʼantu wakakungutanela. Embadi wakati ahondo awo, wakati vati: Wakomole eshingo.

²³Lamʼakawakomola ekomola efula, vo wakawadji lu lukanu. Vo wakakokomiya ulami a lukanu wulu vati: Alami ololo!

²⁴Lamʼakanduki uku akawawutela, ndi akawadji lu luudu la lʼetei, akawadji ekulu lu mbeti.

²⁵Keli lʼasa ndeki, Paulu la Silasi wakalombaka, wakimbelaka Unyashungu esambu. Asi lukanu wakahukamaka.

²⁶Shashimuya, kete yakadidima wulu; ku tshina dia luudu la lukanu diakasukasuka. Kemʼedja kuki tshe yakadiho. Ekodi wʼuntu la untu wakakeleko.

²⁷Ulami akemo. Lamʼakandenyi kuki ya lukanu hwe, ndi akasomola yombo, akayangi ndjadiaka; akakani ati: Asi lukanu wambulawo.

²⁸Paulu akahangohango ati: Tuyatshelaki kolo! shu tshe teko.

²⁹Ndi akati ati: Nyela ewa. Ndi akoto lu luudu adidima la woma, akayakosha la ntundu ka Paulu la Silasi.

³⁰Ndi akatundja; akati ati: Wayone, kahumbami ntsha dia dimi nshimbamela?

³¹Vo wakati vati: Etawo Khumadiondjo Jesu, ku we ayushimbamela, ndu wa lu luudu laye.

³²Vo wakawutela diui dia Khumadiondjo, ndi la wane waki lu luudu landi tshe.

³³Ndi akawaose lʼushidi ako wʼutshu, akotsha wimbo awo wʼeshingo. Kemʼedja ndi akabatizama, ndu antu andi tshe.

³⁴Ndi akatshu la wo lakandi, akawasha ma. Ndi akangenangena efula, ndi la wa lu luudu landi tshe ne dia ndi ambetawo Unyashungu.

³⁵Lamʼakahuto unya, embadi wakatumi tusangema vati: Watundja antu aku.

³⁶Ulami a lukanu akatutela Paulu ati: Embadi wambutuma diui vati: Wanyukimo. Nyutumbi, nyutshu la ki.

³⁷Keli Paulu akawatela ati: Vo wakatokomola, shu asi Romo, lu ashu wʼantu tshe, watatulumbuya, wakatudjisha lu lukanu. Ya ukundi ayangawo ntutundja lu usheshe? Aha osoku! Wayi vame la ndjututundja.

³⁸Tusangema wakatutela embadi aui aso. Lamʼakawuki vati: Asi Romo mbewo, vo wakuki woma.

³⁹Ku vo wakayi, wakasengasenga. Lamʼakawatundja, vo wakalombe dia ntumba uma lʼusumba.

⁴⁰Lamʼakawatumbi uma lu lukanu, vo wakoto lu luudu la Ludiya. Lamʼakawenyi anyawo, vo wakakikitsha etema, wakatshu.