Read tetala Etsha wa Atumami 17 Bible Online

Etsha wa Atumami 17 - tetala bible

Etsha wa Atumami 17

¹Lamʼaketi Paulu la Silasi lʼAfipoli la Apoloniya, vo wakakumi la Tesalonika, lene aki etemwelo kʼasi Juda.

²Paulu akoto la wo loko, uku aki etshelu kandi. Ndi akateketa la wo akambu wʼuma lu afundelu nshi yʼekila shatu.

³Ndi akalimbitshiyawo, akati ati: Diaki ia Kristu dia nsuwa, la dia ndi mbulo uma lu nyoi; Jesu one lanyutelami, ndi keli Kristu.

⁴Amotshi waketawo, wakasangana la Paulu la Silasi; ndu ului a wuki wʼasi Ngirika wʼololo, ndu amantu wa lukumu la wuki.

⁵Keli asi Juda wakuki kandjema, wakose antu wa kolo amotshi uma lʼatei wʼantu kʼantu, wakasanganya ului, wakatombosha usumba. Vo wakoto lu luudu la Jasona la wulu, wakayangi mbatundja le antu.

⁶Lamʼakiwo kumbatana, vo wakakutula Jasona la anyawo amotshi, wakatundja la ntundu ka ewandji wʼusumba. Vo wakahangohango vati: Antu ane wambungayula wa la kete tshe wambukuma ndu lindu!

⁷Keli Jasona ambalungula. Vo tshe hawukitanyia elembe wa Kayisa, ndu watutaka vati: Khumʼekanga kekina keko, Jesu.

⁸Okone vo wakahindja etema wʼantu la wa ewandji wʼusumba lamʼakawuki akambu aso.

⁹Lamʼakawalungula okole uma le Jasona la akina, vo wakakimo.

¹⁰Kemʼedja anyawo wakatumi Paulu la Silasi utsha la Beroya lʼutshu. Lamʼakawakumi, vo wakoto lʼetemwelo kʼasi Juda.

¹¹Antu aso wakaleki wa la Tesalonika ololo, ne dia vo waketawo diui lʼuhetu: wakayangiayangia la lushi la lushi lu afundelu, kana akambu ane mete kewo.

¹²Ku efula waketawo, ndu amantu wʼasi Ngirika akanga a lukumu, ndu apami efula.

¹³Keli lamʼakeyi asi Juda wa la Tesalonika vati: Paulu ambusambisha diui dia Unyashungu ndu la Beroya, vo wakatshu ndu leko. Vo wakatombosha la wakangayula antu.

¹⁴Kemʼedja anyawo wakatumi Paulu, dia ndi ntsho lʼashi a wuki. Silasi la Timote wakatshikala leko.

¹⁵Keli atshindedi wa Paulu wakakumi la ndi pulu ndu lʼAtena. Lamʼakawalungula diui ati: Silasi la Timote wayi le mi esadi, vo wakatshu.

¹⁶Lamʼakawakungaka Paulu lʼAtena, utema andi akahindi efula lamʼakandenyi usumba ambulula too la dikishi.

¹⁷Lu temwelo, ndi akateketa lʼasi Juda la antu wʼololo, ndu la lushi la lushi, le wane wakasanganaka la ndi la kituka.

¹⁸Anangi a yimba wʼasika Epikuro la wʼasika Stoa amotshi wakayudja la ndi tamu. Amotshi wakati vati: Eyokayoka kene, katandi na? Akina vati: Ndi nfanaka la umvutshi a ditemolatemola diʼangendangenda, ne dia ndi akasambisha Jesu la eulwelu.

¹⁹Vo wakukimela, wakatshu la ndi lʼAreopango. Vo wakawumbula vati: Shu nkukaka mbeya wetshelu one wʼuyuyu wasambishaye?

²⁰ne dia we ambuya la akambu amotshi wʼeyuyu, wukasu. Ku shu nangaka mbeya akambu ako okone wewo.

²¹Asi Atena tshe la angendangenda waki loko, kuntsha nduku dikambu dikina, paka mvuta la mbuka dikambu diʼuyuyu.

²²Paulu akemala lʼAreopango, akati ati: Nyu asi Atena, lu akambu tshe, dimi lambena nti: Nyu nyeko atemodi wa wulu.

²³Ne dia lamʼakamatetaka, dimi lakenyi diango diatemolanyu, lakenyi ndu ediakelu kaki la efundelu kene ati: “Le Etemolatemola Kahaweyi.” Kene katemolanyu kahanyeyi, dimi layunyulimbitshiyato.

²⁴Unyashungu kakatungi kete la diango tshe dieli loko, ne dia ndi keli Uwandji wʼulungu la kete. Ndi hatudjaseka lu temwelo diakatshama lʼanya,

²⁵kana anya wʼantu mbukimanyia kuyanga ndi mpumbaka engo, ne dia ndame katushaka tshe lumu, luwi, la diango tshe.[119]

²⁶Uma le untu otoi kakandatungi wedja tshe, dia vo mbidjase ladiku dia kete tshe. Ndi akakahanya deku diawo diakandalongosola, ndu elelu wʼedjaselu kawo;

²⁷dia vo wayangi Unyashungu, watawamamba dia vo mbena, keli ndi kema etali uma le untu la untu.

²⁸Le ndi kesu la lumu. Shu tambokendakenda, tambuyala; Uku akafundi ndu afundji anyu vati: Ndu shu mbeli anʼandi.

²⁹Ne dia shu teko ana wa Unyashungu, kema ololo shu nkana shati: Unyashungu uku paunyi mbendi, kana fesa, kana dive diakawasele lu yimba la tukanyi ta untu.

³⁰Unyashungu akendjula tena diʼakanga a dinginya. Keli kakiane, ndi ambutela antu tshe lu ahuli tshe ati: Nyukadimuli etema.

³¹Ne dia ndi akasonola lushi la numbuya wa la kete, uku elumbwelu kʼololo lʼanya wʼuntu lakandasonola. Ndi akenya antu tshe dikambu ne, ne dia ndi akawulula uma lu nyoi.

³²Lamʼakawuki dia eulwelu ka wane wakavu, amotshi wakole. Keli akina wakati vati: Katudiuki ntu.

³³Ku Paulu akamo uma la le wo.

³⁴Keli amotshi wakumamema, waketawo. Omotshi Diyonusiyo, usi Areopango, la umuntu lukumbu landi Damari, ndu akina kame la wo.