Read tetala Etsha wa Atumami 18 Bible Online

Etsha wa Atumami 18 - tetala bible

Etsha wa Atumami 18

¹Lʼokongo wʼakambu aso, Paulu akamo lʼAtena, akayi la Koreto.

²Ndi akatani usi Juda omotshi, lukumbu landi Akula, wakawuti lu leke la Poto, akayi tshinyi tshitshe uma lʼItaliya, la wadendi Piriskila, ne dia Kolodiyo akadji olembe ati: Asi Juda tshe wamo uma lu Romo. Paulu akatshu le wo.

³Ndi akadjase la wo, ne dia o wakatshaka wuhu wame wʼulimu. Vo wakatshaka ulimu, ne dia vo waki atshi wa mvudu yʼapema.

⁴Ndi akateketa lu etemwelo nshi yʼekila tshe, akayangi mbetawuya asi Juda la asi Ngirika.

⁵Lamʼakakumi Silasi la Timote uma la Makedoniya, Paulu akayakimo tshe lʼulimu wa nsambisha, etsha asi Juda ati: Jesu keli Kristu.

⁶Lamʼakawahangakala, lamʼakawotenge, ndi akanyinginya ahondo andi; akawatela ati: Dikila dianyu diayali lʼete anyu! Dimi kema la dikambu. Umaka kakiane, dimi layutsho le asi wedja.

⁷Ndi akamo uma leko, akatoto lu luudu lʼuntu, lukumbu landi Titiyo Justo, otemodi a Unyashungu; luudu landi laki lasuki la etemwelo.

⁸Kirispo, uwandji wʼetemwelo, aketawo Khumadiondjo, ndu wa lu luudu landi tshe. Lamʼakuki asi Koreto efula aui wa Paulu, vo waketawo, wakabatizama.

⁹Khumadiondjo akatela Paulu lu enelo lʼutshu ati: Tukaki woma, otekete, tolembohalaki;

¹⁰ne dia dimi leko la ye, nduku untu layukahe lunya dia nkutshela kolo: ne dia dimi la antu efula lʼusumba one.

¹¹Ndi akadjase leko utundu wʼeleku la ngondo shamalu, aketshaka antu diui dia Unyashungu.

¹²Keli lamʼaki Ngaliyo, umbuledi a wuki wa lʼAkaya, asi Juda wakahangakaela Paulu, wakatshu la ndi la ntundu kʼelumbwelu.

¹³Vo wakati vati: Untu one ambetawuya antu dia ntemola Unyashungu utshikitanyi lʼelembe.

¹⁴Lamʼakayangi Paulu nfula unyo, Ngaliyoakatela asi Juda ati: Nyu asi Juda, utunduyala dikambu dia kolo kana dia fumbosonyi mbedio, tshiki lutuka diui dianyu.

¹⁵Keli naka akambu aso weko paka diʼaui, kumbu la elembe anyu, eko dikambu dianyu. Dimi halangi ndjala umbadi wʼakambu a wuhu oso.

¹⁶Ku ndi akawatshanya uma lʼelumbwelu.

¹⁷Ku vo tshe wakandi Sostene, umbuledi wʼetemwelo, wakokomola lʼelumbwelu. Keli Ngaliyo akatewala lu akambu aso tshe.

¹⁸Paulu akatshikala leko nshi efula lʼokongo wa dikambu so. Ndi akalakana la anangu, ku ndi la Piriskila la Akula wakatshu lu watu utsha la Suriya. Ndi akatanyisha divu la Kenekerea, ne, dia ndi akatadji dokoloko.[120]

¹⁹Vo wakayi lʼEfeso, ku ndi akatshiki leko. Keli ndame akoto lʼetemwelo, akateketa lʼasi Juda.

²⁰Lamʼakawolombe vati: Umudjase la su yema, ndi kumbetawo.

²¹Keli ndi akalakana la wo; akawatela ati: Naka Unyashungu alanga, dimi layukalula le nyu ntu. Ndi akamo uma lʼEfeso, akoto lu watu.

²²Lamʼakandakumi la Kayisariya, ndi akatshu, akatasha ekelizia moyo, ku ndi akatshu lʼAtiyoka.

²³Lamʼakandadjase leko yema, ndi akunela, akakindula lu leke la Ngalatiya, la Firungiya, atakikitsha etema wʼambeki tshe.

²⁴Usi Juda omotshi, lukumbu landi Apolo, lakuto lʼAlesanderiya, akayi lʼEfeso. Ndi akesaka efula lʼunyo, akeyaka afundelu ololo.

²⁵Untu ako aketshaka dia mbuka ka Khumadiondjo. Ndi aki la saki lʼutema, akataka, aketshaka akambu wa Jesu ololo, kuyanga ndi akeyi paka batiza ka Joani.

²⁶Ndi akatatela mvuta diui la dihunga lʼetemwelo. Keli lamʼakuki Piriskila la Akula aui wakandataka, vo wakawose, wakulimbitshiya mbuka ka Unyashungu ololo.

²⁷Lamʼakandayangi ntsho lʼAkaya, anyandi wakakikitsha utema andi, wakafundela ambeki dia vo mbulungula. Lamʼakandakumi, ndi akaleki nkimanyia wane waketawo uma lu ngandji ka mamba,

²⁸ne dia ndi akâkaluya asi Juda aui la wulu lu seke, awaenya lu afundelu ati: Jesu keli Kristu.