Read tetala Etsha wa Atumami 19 Bible Online

Etsha wa Atumami 19 - tetala bible

Etsha wa Atumami 19

¹Lamʼaki Apolo la Koreto, Paulu akayi lʼEfeso. Lamʼakandeti lu beke diʼakuna, ndi akatani ambeki amotshi leko.

²Ndi akawambula ati: Lamʼakanyetawo, nyu nyakalungula Nyuma kʼOlolo? Vo wakawutela vati: Kema; shu tatuki dia Nyuma kʼOlolo.

³Ndi akawambula ntu ati: Lu na akanyambatizama? Vo wakati vati: Lu batiza ka Joani.

⁴Paulu akati ati: Joani akabatizaka antu la batiza kʼekadimwelu kʼetema. Ndi akatekika antu ati: Nyetawo one layayi lʼokongo ami, Jesu ndame.[121]

⁵Lamʼakawuki diui so, vo wakabatizama lu lukumbu la Khumadiondjo Jesu.

⁶Lamʼakawahe Paulu anya, vo wakalungula Nyuma kʼOlolo. Vo wakateketa lʼeteketa ekina, wakati akambu wahatayi.

⁷Vo tshe waki uku apami dikumi la ahendi.

⁸Paulu akoto lʼetemwelo, akatelaka antu diui la dihunga ngondo shatu. Ndi akateketaka la wo dia mbaetawuya akambu wa diulelu dia Unyashungu.

⁹Keli lamʼakakikitala amotshi, lamʼakawayala la ehedia, lamʼakawonyola Mbuka lu ashu wʼantu, ndi akamo uma lʼatei awo, akanya ndu ambeki, akateketa la wo la lushi la lushi lu wekelu a Turano.

¹⁰Ndi akatshaka osoku deku pendi, okone antu tshe wa lʼAsiya wakuki diui dia Khumadiondjo, ndu asi Juda ndu asi Ngirika.

¹¹Unyashungu akatshi akambu wa mamba wuleki lʼanya wa Paulu.

¹²Okone vo wakatshu la tambala la ahondo waki la ndi lu dimba le akanga a hemo. Ku hemo yakashili, edienge wakatumbi.

¹³Keli asi Juda amotshi, atundjishi wʼedienge, waketetaka, wakahimbi mbeta lukumbu la Khumadiondjo Jesu le akanga wʼedienge; wata vati: Dimi lambunyutshibela lu lukumbu la Jesu latusambishaka Paulu.

¹⁴Ana esambeli wʼusi Juda, lukumbu landi Skeva, olombedi a wuki, mbakatshaka osoku.

¹⁵Odienge akâkaluya diui ati: Dimi mbeyaka Jesu; dimi mbeyaka Paulu, keli nyu wa na?

¹⁶Ku kanga odienge akawamamela, akaleki wulu vo ahendi, akalembia, ku vo wakalawo uma lu luudu lako etakataka la puta lu alimba.

¹⁷Dikambu so diakeyama le asi Juda la asi Ngirika tshe wakadjashi lʼEfeso. Vo tshe wakuki woma, ku lukumbu la Khumadiondjo Jesu lakatumbwama.

¹⁸Ndu wane waketawo ntundu, wakayi, wakashula kolo, wakati akambu wakawatshaka.

¹⁹Akanga wʼaloho efula wakasanganya abuku awo, wakatshumbi lu ashu wʼantu tshe. Lamʼakawali ushinga awo, vo wakedika uku tenyi dia fesa nunu akumi atanu.

²⁰Okone diui dia Khumadiondjo diakaleki nfula wulu.

²¹Lʼokongo wʼakambu aso, Paulu akasanguya dia mbeta la Makedoniya lʼAkaya utsha la Jerusalema. Ndi akati ati: Lamʼayumuyala leko, dieli la mi dia mena ndu la Romo.

²²Lamʼakandatumi wane wakukimanyiaka ahendi, Timote la Erasto, la Makedoniya, ndame akatshikala lʼAsiya yema.

²³Lu nshi sho, aki lundju efula, ne dia Mbuka keso.

²⁴Ne dia untu omotshi lukumbu landi Demeteriyo, utshudi a fesa, lakatshaka tundju tufanyi la etemwelo kʼAratemi,[122] akashaka asi ulimu ulimu efula.

²⁵Ndi akasanganya la wane waki la wo ulimu pupu; akawatela ati: Wayone, nyu mbeyaka nyati: Ulimu one mbeli ongonyi asu.

²⁶Nyu menaka ndu nyu mbukaka nyati: Aha lane la Efeso atu, keli lasuki la Asiya tshe, untu one Paulu ambetawuya antu efula, ambakadimula etema; ambuta ati: Dite-molatemola diakawatshi lʼanya, kema ditemolatemola.

²⁷Aha ne dia ulimu asu utu mbayanga ndjala kolo, keli ndu ne dia etemwelo ka etemolatemola ka wuki ka umuntu Aratemi kuyanga ndjala anyanya. Wambuyanga mbunya lu lutumbu landi latotemolaka Asiya tshe, la wa la kete tshe.

²⁸Lamʼakawuki diui so, vo wakadanganela la kele, wakahangohango wata vati: Aratemi wʼasi Efeso keli wuki!

²⁹Okone usumba tshe wakaluli too lʼufutanu. Lamʼakawandi Ngayo la Aristarako, asi Makedoniya, atshindedi wa Paulu lu lokendo, vo wakamote lʼutema otoi lu dihuli diʼendelu kʼakambu.

³⁰Lamʼakayangi Paulu mboto lene aki antu ako, ambeki wakusike.

³¹Antu a waki imotshi wa lʼAsiya, engenyi andi, wa-kutumela diui; wakosengasenga vati: Totoki lu dihuli diku diʼendelu.

³²Wakahangohango amotshi okone, akina okone, ne dia ului tshe aki ufutanu utu. Leke lʼantu lakaleki wuki, kumbeya kene kakawamote.

³³Vo wakatundja Alesandere uma lʼului wʼantu, ku asi Juda wakaweme la ntundu kʼantu. Alesandere akahahiya lunya, akalangi nteketa le wudja.

³⁴Keli lamʼakaweyi vati: Usi Juda kendi, vo tshe wakahangohango pupu uku eshidi ehendi vati: Aratemi wʼasi Efeso keli wuki!

³⁵Lamʼakalembohaya ufundji a lʼusumba ului wʼantu, ndi akawatela ati: Nyu asi Efeso, untu akona aheyi ati: Usumba wʼasi Efeso mbeli ulami wʼetemwelo kʼAratemi a wuki, ndu wa dive diʼekila diakako uma lʼulungu?

³⁶Ne dia antu haweyi manguna dikambu ne, okone ndeka ololo nyu mbidjase ki. Tanyutshaki dikambu esadi.

³⁷Nyu nyakayi la apami ane lindu, waha apotodi a diango uma lu etemwelo, kuyanga atengi wa etemolatemola kasu ka umuntu.

³⁸Okone naka Demeteriyo la asi ulimu andi weko la untu dikambu, nshi ya numbula yeko, ndu embuledi weko. Vo watufundanaki.

³⁹Keli lamʼayunyuyala la dikambu dikina, wayudishidiya lu lusanganya latutusanganaka uku etshelu kasu.

⁴⁰Mete, shu tambuyanga nsongwamela ne dia lundju lʼelo, ne dia nduku diui diakayadi, diukukisu mvuta lu dikambu diakamotshi ului one.

⁴¹Lamʼakandashili mvuta aui aso, ndi akadianganya.