Read tetala Etsha wa Atumami 2 Bible Online

Etsha wa Atumami 2 - tetala bible

Etsha wa Atumami 2

¹Lamʼakayala lushi la Pentekosta,[12] vo tshe waki kame lu dihuli otoi.

²Luhelu lakayi shashimuya uma lʼulungu uku atopepaka lopepe la wulu, ku lakaluli lu luudu tshe lene akawadjashi.

³Nimi yakenama le wo, yakate uku nimi ya dja, ku yakahema ladiku diawo vo tshe untu lʼuntu.

⁴Vo tshe wakaluli la Nyuma kʼOlolo, wakatatela nteketa eteketa ekina uku akateketsha Nyuma.

⁵La Jerusalema kakaladi asi Juda, antu wʼololo, wʼuma lu wedja tshe wa lʼesi ulungu.

⁶Lamʼakawuki luhelu lako, ului wʼantu wakamote kame, wakambi ne dia untu lʼuntu akawauki wateketa oteketa andi.

⁷Vo tshe wakakashimo, wakambi wata vati: Wane tshe wateketa, waha asi Ngalili uka?

⁸Ku ukundi wukasu untu lʼuntu ateketa oteketa asu wa luto?

⁹Asi Paratiya, asi Mediya, asi Elame, la wane wudjashi lu Mesopotamiya, lu Judiya la Kapadokiya, lu Poto la Asiya,

¹⁰lu Furungiya la Pamufuliya, lu Edjibitu la beke dia Libiya dieli lasuki la Kurene, ndu angendangenda wʼuma lu Romo, ndu asi Juda la ambetawudi awo,

¹¹ndu asi Kerete, la asi Arabiya, shu mbaukaka wata etsha a wulu wa Unyashungu lu eteketa asu.

¹²Ku vo tshe wakuki woma, wakakanana; wakambwana vati: Na wuhu wa dikambu ne?

¹³Keli akina wakole, wakati vati: Vo wambudjo wanu wʼuyuyu.

¹⁴Keli Petero akemala ndi la atumami dikumi la otoi, akedia diui diandi; akawatela ati: Nyu asi Juda, ndu nyu wane wudjashi lu Jerusalema, nyeyi dikambu ne, nyuhuke atui lu aui ami!

¹⁵Ne dia antu ane hawudjwi wanu uku akananyu, ne dia unya eki paka eshidi divwa etu.

¹⁶Keli one eko dikambu diakati umvutshi Joele ati:

¹⁷Unyashungu kata ati: Lu nshi yʼekumelu, Dimi layutshulwela antu Nyuma kami, Anʼanyu wʼapami la anʼanyu wʼamantu wayuta akambu wahatayi. Elongo anyu wʼapami wayena waenelo, Esumbi anyu wayena alo.

¹⁸Ee, lu nshi yako dimi layutshulwela Ekambi ami wʼapami la wʼamantu Nyuma kami. Ku vo wayuta akambu wahatayi.

¹⁹Dimi layenya akambu wa mamba ladiku dia ulungu, La tulimbitelu lʼesi ka kete; Dikila la dja, ndu lungi la edinga.

²⁰Unya ayukadimo udjima, Ngondo ayukadimo dikila, La ntundu ka lushi la Khumadiondjo latayi, Lushi lako la wuki ndu la mamba.

²¹Ku lamʼayuyala dikambu so, untu tshe layeta lukumbu la Khumadiondjo, ayushimbamela.[13]

²²Nyu asi Isariyele, nyuki aui ane: Jesu yʼusi Nazareta, untu lakanyulimbitshiya Unyashungu uma lu etsha a wulu la akambu wa mamba, ndu tulimbitelu takatshi Unyashungu uma le ndi lʼatei anyu uku wenanyu,

²³akakimwama uma lʼesangweyu kakasanguyama la yimba yakakani Unyashungu ntundu. Nyu nyakuhane lu utamba a mpeketanya, nyakudiaki lu anya wʼantu wa kolo.[14]

²⁴Keli Unyashungu akawulula,[15] akukelekula uma lu shoko ya nyoi, ne dia nyoi kumbeya mtukimela pundju.

²⁵Ne dia Davidi akati lu dikambu diandi ati: Dimi lakenaka Khumadiondjo nshi tshe la ntundu kami, Ne dia ndi eko lu lunya lami la pami. Dimi ntukusutshasutshama.

²⁶Okone utema ami aki la ongenongeno, La lulimi lami lakangenangena. Dikambu dikina, dimba diami diayu tshikala la elungamelu;

²⁷Ne dia we hutshika lumu lami lʼUdimu a Pengandu, We hakimo laye lʼEkila dia ndi mponda.

²⁸We akamenya mbuka ka lumu; We ayundudia la ongenongeno uma lʼelundji kaye.[16]

²⁹Analingu, dimi mbeyaka nyuhunwela dikambu dia tshesu Davidi nti: Ndi akavu, akakhundama; diumbu diandi dieko lʼatei asu edja ndu elo.

³⁰Ndi aid umvutshi; akeyi ati: Unyashungu akutshibela ati: Dimi layudjasha kanula motshi yʼuma lʼutema aye lu kiti kaye ka diulelu. [17]

³¹Ndi akenyi dikambu ne ntundu, akati dia eulwelu ka Kristu, ndi kuntshikama lʼUdimu a Pengandu, dimba diandi komponda.

³²Unyashungu akulula Jesu ako. Shu tshe teko emenyi wa dikambu diako.

³³Okone ndi akambiyama la lunya la pami la Unyashungu, ndu akalungula daka dia Nyuma kʼOlolo uma le Shi; ndi akaditshulula uku wenanyu la wukanyu.

³⁴Ne dia Davidi kumumbela lʼulungu, keli ndi ndame akati ati: Khumadiondjo akatela Khumemi ati: Udjase lu lunya lami la pami,

³⁵Edja ndu lambete atunyi aye kihuna kʼekulu aye.[18]

³⁶Okone khumbu tshe ka Isariyele weyi mete vati: Unyashungu aketi Jesu ako, lakanyadiaki lu utamba a mpeketanya ati: Khumadiondjo la Kristu.

³⁷Lamʼakawuki diui so, vo wakanyangi wulu lʼetema awo, ku wakambula Petero la atumami akina vati: Anengesu, kayututsha na?

³⁸Petero akawatela ati: Nyukadimuli etema, nyubatizami nyu tshe untu lʼuntu lu lukumbu la Jesu Kristu, ne dia edimanyelu ka kolo yanyu, ku nyu nyayulungula ushasha wa Nyuma kʼOlolo.

³⁹Ne dia daka dieko le nyu, le anʼanyu, ndu wa lʼetali tshe, wayeta Khumadiondjo Unyashungu asu le ndi.

⁴⁰Ndi akawatela aui akina efula, akalaki ati: Nyuyashimbeli uma lu lolonga la kolo lone!

⁴¹Ku wane waketawo diui diandi, wakabatizama. Lushi lako, antu uku nunu satu wakasanganyema kame la wo.

⁴²Vo wakakolamela lu wetshelu wa atumami, ndu lu ekesanelu kawo, ndu lu diatwelu dia ma, ndu lu dombelo.

⁴³Woma akawandi vo tshe. Atumami wakatshi akambu wa mamba efula ndu tulimbitelu.

⁴⁴Wane tshe waketawo, waki kame, ndu wakasanganya diango tshe kame.[19]

⁴⁵Vo wakasundja dikambo diawo, ndu diango diawo, wakadikahanya le antu tshe uku akahumbi untu lʼuntu.

⁴⁶Vo wakakolamelaka mbukana lushi la lushi lu etemwelo, wakatolaka ma lu mvudu yawo. Vo wakalekaka ma diawo la ongenongeno ndu lʼetema wa lukahu.

⁴⁷Vo wakandula Unyashungu, wakalemiama le antu tshe. Ku la lushi la lushi, Khumadiondjo akasanganyaka wane wakashimbamelaka kame la wo.