Read tetala Etsha wa Atumami 20 Bible Online

Etsha wa Atumami 20 - tetala bible

Etsha wa Atumami 20

¹Lamʼakashili lundju, Paulu aketi ambeki, akakokomiya, ku ndi akalakana la wo, akunela utsha la Makedoniya.

²Lamʼakandakindula lu beke so, lamʼakandakokomiya, ndi akakumi la Ngirika.

³Ndi akadjase leko ngondo shatu. Lamʼakandalangi nteho utsha la Suriya, asi Juda wakutshwela sheki. Lu dikambu diako, mbakandasanguya dia nkalula, la mbeta uma la Makedoniya.

⁴Wane wakutshindela utsha lʼAsiya, waki Sopatere, usi Beroya, onʼa Purusi; Aristarako, la Sekundo, asi Tesalonika; Ngayo, usi Derebe, la Timote; Tukiko la Torofimo, asi Asiya.

⁵Keli antu aso wakatatela ntsho ntundu, wakatutukunga la Toroa.

⁶Lamʼaketi nshi ya Ma Diaha la Edya, shu takunela uma la Filipi, takoto lu watu, lu nshi tshanu takakumi la Toroa, lene akiwo; takahangi nshi esambeli leko.

⁷Lushi la ntundu la lubingu, shu takasangana dia mbatula ma. Paulu akasanguya munela lamʼayuhuto unya, ndi akateketa la wo. Ndi akatetemala nteketa edja ndu lʼasa ndeki.

⁸Lu luudu la ladiku lakawasangana, aki atala efula.

⁹Olongo a pami omotshi, lukumbu landi Eutuko, akadjashi lu didishi, anyingonyingo la djo ya wulu. Lamʼakatetemala Paulu nteketa, djo yakawundi. Ndi akako uma lu luudu la satu la ladiku, wakotongona ambuvo.

¹⁰Ku Paulu akahulo, akasembemala ladiku diandi, akukhumbatela; akati ati: Tanyudjaki lufungusu, ndi eki la lumu.

¹¹Lamʼakandambela ntu, ndi akatula ma, akali. Ndi akateketa la wo etenyi kʼutali, edja ndu lamʼakahuto unya, ku ndi akunela.

¹²Vo wakayi la olongo a pami la lumu, wakasalangana efula.

¹³Shu takatatela ntsho lu watu, takateho utsha lʼAsose. Shu takakani shati: Tayutakudi Paulu leko, uku akandati. Ndi akalangi mbeta uma leko lʼekulu.

¹⁴Lamʼakandatutani lʼAsose, shu takawotshiya lu watu, takakumi la Mitulene.

¹⁵Shu takunela uma leko lu watu. Lamʼakahuto unya, shu takakumi lasuki la Kiyo. La wedi a pindju ntu, shu takakumi la Samose. Lomo unya, shu takakumi la Mileto.

¹⁶Paulu akasanguya ndekana Efeso lu watu. Ndi kunanga nshisha etena lʼAsiya, ne dia ndi akasamanya dia nkuma la Jerusalema lushi la Pentekosta, naka nkukaka.

¹⁷Lamʼaki Paulu la Mileto, ndi akatumi diui lʼEfeso, aketi dikumanyi diʼekelizia.

¹⁸Lamʼakawayi le ndi, ndi akawatela ati: Nyame mbeyaka wuhu wakimi lʼatei anyu umaka lushi lakamakamela lʼAsiya, edja ndu kakiane.

¹⁹Dimi lakatshelaka Khumadiondjo ulimu la ndjakitshakitsha, la asoi lu ashu, ndu lʼehimba wakayi le mi, ne dia tuseki tʼasi Juda.

²⁰Dimi kumbuka woma wa nyutela akambu tshe wʼololo, lakanyetshaka lʼatei wʼantu, ndu lu luudu la luudu,

²¹latela asi Juda ndu asi Ngirika dia nkadimula etema le Unyashungu, la dia mbetawo khumesu Jesu Kristu.

²²Nyendi, kakiane dimi lambutsho utsha la Jerusalema lʼutema ukelekami: haleyi akambu wayutuyala la mi leko.

²³Tshikima Nyuma kʼOlolo kamenya ati: Kanu la asui mbakukungela lʼusumba la usumba.

²⁴Keli dimi halali lumu lami nti: Ushinga a wulu mbelo, dia nshidiya esakelu kami ka luwangu,[123] la ulimu wakamalungula uma le Khumadiondjo Jesu, dia mvuta lukumu lʼololo la ngandji ka mamba ka Unyashungu.

²⁵Nyulungi, kakiane dimi mbeyaka nti: Nyu tshe wakamakindula lʼatei anyu, lanyusambisha lukumu lʼololo la diulelu dia Unyashungu, hanyuyena elundji kami ntu.

²⁶Okone dimi lambunyutela elo nti: Dimi laha la unungu wa dikila dianyu, nyu tshe,

²⁷ne dia dimi kumbuka woma wa nyutela yimba tshe ya Unyashungu.

²⁸Nyuyalami ololo, ndu nyulami limba tshe ololo, wako wakanyukitsha Nyuma kʼOlolo alami, dia nyu ndesha ekelizia wa Khumadiondjo, wakandasumbi la dikila diandi.

²⁹Dimi mbeyaka nti: Lamʼayumutsho, ndjaundu ya pangu yayoto lʼatei anyu, yayumana limba tshe.

³⁰Antu wayunela uma lʼatei anyu nyame, wayutela antu akambu waha mete, dia nkutula ambeki lʼokongo awo.

³¹Okone nyewo, nyuho lamʼakimi la nyu deku satu. Dimi kunkimo dia nyokokomiya ndu lʼutshu ndu la yanyi la asoi lu ashu.

³²Kakiane, dimi lambunyukimo lʼanya a Unyashungu, la lu diui dia ngandji kandi ka mamba, dieya nyudia, la nyusha ukito kame la wane tshe wambukidiama.

³³Dimi konkomiya fesa ya untu, paunyi kana ahondo.

³⁴Nyame mbeyaka nyati: Anya ane wakankimanyia, ndu wakakimanyia wane waki la mi la diango diakamahumbi.

³⁵Dimi lambunyenya djimbitelu lu akambu tshe. Dieli la nyu dia nkamba okone dia nkimanyia akanga a weodu, la dia nyu mbuho aui wa Khumadiondjo Jesu, wakandati ndame ati: Mbisha, ambuleka nungula otshoko.

³⁶Lamʼakandashili mvuta osoku, ndi akakhuse adui, akalombe la wo tshe.

³⁷Vo tshe wakaleli wulu, wakakhumbatela Paulu lu kingu, wakanonana la ndi.

³⁸Vo wakaleki nyanga, ne dia diui diakandawatela ati: Hanyuyena elundji kami ntu. Vo wakutshindela lu watu.