Read tetala Etsha wa Atumami 21 Bible Online

Etsha wa Atumami 21 - tetala bible

Etsha wa Atumami 21

¹Lamʼakatatshiki, shu takatshu lu watu, takasimbo utsha la Kose. La wedi a pindju, shu takakumi la Rodo, takunela uma leko utsha la Patara.

²Lamʼakatatani watu watateho utsha la Fonikiya, shu takoto loko, takatshu.

³Lamʼakatenyi Kupiro, shu takatshiki lu lunya la lomoso, takatshu utsha la Suriya, takakumi la Tura, ne dia wakalangi ntundja diango leko.

⁴Shu takatani ambeki, ku taketama leko nshi esambeli. Vo wakatela Paulu uma le Nyuma, diaha ndi mbikamela la Jerusalema.

⁵Lamʼaketi nshi sho, shu takunela, takatshu. Vo tshe, ndu amantu ndu anʼawo, wakatutshindela, edja ndu lamʼakatatumbi uma lʼusumba. Shu takakhuse adui lʼumamu wʼashi, takalombe, takalakana.

⁶Shu takoto lu watu, ku vo wakakalula.

⁷Lamʼakatashidiya lokendo lasu uma la Tura, shu takakumi la Potolemai. Shu takasha anyasu moyo; taketama la wo lushi otoi.

⁸La wedi a pindju, shu takunela, takayi la Kayisariya. Shu takoto lu luudu lʼusambisha Filipo,[124] laki omotshi a lʼesambeli, takahangi lakandi.

⁹Untu ako aki la ana amantu anei wa dimuma, wakataka akambu wahatayi.

¹⁰Lamʼakatahangi leko nshi motshi, umvutshi omotshi, lukumbu landi Angabo,[125] akayi uma la Judiya.

¹¹Lamʼakandayi le su, ndi akose uya wa Paulu, akayakelekawo lʼekulu ndu lʼanya. Ndi akati ati: Nyuma kʼOlolo kata ati: Asi Juda wa la Jerusalema way ikeleka kanga uya one wuhu one, wayukimo lʼanya wʼasi wedja.

¹²Lamʼakatuki akambu aso, shu la akanga a dihuli diako takasengasenga Paulu diaha ndi ntsho la Jerusalema.

¹³Paulu akâkaluya diui ati: Ukundi atshanyu okone, walelanyu, wambatanyu asulu? Dimi hayalongosola dia ntukelekama tshu, keli ndu dia dimi ntuvo la Jerusalema lu lukumbu la Khumadiondjo Jesu.

¹⁴Lamʼakandaseke mbetawo, shu takalembohala; takati shati: Lulangu la Khumadiondjo latshami!

¹⁵Lʼokongo a nshi sho, shu takalongosola diango diasu, takatshu utsha la Jerusalema.

¹⁶Ambeki amotshi wʼuma la Kayisariya wakatshu la su, wakayi la usi Kupiro, lukumbu landi Manasona, umbeki wʼedjedja, dia shu ntuhanga lakandi.

¹⁷Lamʼakatakumi la Jerusalema, anyasu wakatulungula la ongenongeno.

¹⁸La wedi a pindju, Paulu akatshu la su le Jakoba. Dikumanyi tshe diaki laawo.

¹⁹Lamʼakandashili mbasha moyo, ndi akasanyia akambu tshe wakutshela Unyashungu lʼulimu andi lʼatei wʼasi wedja.

²⁰Lamʼakawuki dikambu so, vo wakatumbula Unyashungu. Vo wakawutela vati: Unyasu, we ambena asi Juda nunu efula waketawo. Vo tshe weko la saki kʼelembe.

²¹Vo wambuka vati: We atetshaka asi Juda tshe wa lʼatei wʼasi wedja dia nseka Mose; ambuwatela wati: Tanyahemiaki anʼanyu ehekeli. Tanyuyelaki ditshelu dia ntundu.

²²Katshasu na? mete vo wayusangana lamʼayuwuka vati: We ambuya.

²³Okone utshi uku ayangasu nkutela. Shu teko la apami anei weli la dokoloko.

²⁴Uwaose, uyaedia la wo, uwafuteli, keli wanya divu lʼete awo.[126] Okone antu tshe wayeya vati: Lukumu laye lakawuki, laha mete. Ku vo wayeya vati: We atusimboka, atukitanyiaka elembe.

²⁵Keli ne dia asi wedja waketawo, takatumeia mukanda. Shu takawatela shati: Nyukili diango diadiakelawo dikishi, nyukili ndu dikila, la nyama yakawahini lu kingu, la munanyi.[127]

²⁶Ku Paulu akose apami ako. La wedi a pindju, ndi akayedia kame la wo, akoto lu etemwelo, akatela embadi dia ekukelu ka nshi ya ndjaedia. Ndi akatshikala edja ndu untu lʼuntu akashidiya elambu wakawakimoka le Unyashungu.

²⁷Lamʼakayangi nshi esambeli nshila, asi Juda wʼuma lʼAsiya, lamʼakawenyi Paulu lʼetemwelo, wakatombosha ului wʼantu, ku vo wakawundi.

²⁸Vo wakahangohango vati: Apami wʼasi Isariyele, nyutukimanyia! Ndʼone latetshaka antu tshe lu ahuli tshe. Ndi atonyolaka wudja asu, la elembe ndu dihuli ne. Ndi akayi la asi Ngirika lu etemwelo, ambulanya dihuli ne diʼekila ladiku diʼakambu aso,

²⁹ne dia vo wakatawenyi la Torofimo,[128] usi Efeso, lʼusumba, ku wakakani vati: Paulu akawotshiya lu etemwelo.

³⁰Lundju lakayala lʼusumba wʼutundu, antu wakamote. Vo wakandi Paulu, wakukutula uma lʼetemwelo; kemʼedja, kuki yakadihama.

³¹Lamʼakawayangi mbudiaka, lundju laki lʼusumba wʼutundu wa Jerusalema lakukema le olombodi wʼalimbi.

³²Kemʼedja, ndi akose alimbi la alami, akatshu le wo esadi. Lamʼakawenyi olombodi la alimbi vo wakakimo nkomola Paulu.

³³Ku olombodi akasukana, akawundi. Ndi akati dia vo mbukeleka la molola ehendi. Ndiakambula ati: One na? Utshindi na?

³⁴Lʼatei wʼului wʼantu, amotshi wakahangohango wuhu one, akina wuhu one. Lamʼakindi kumbeya dikambu ololo ne dia lundju, ndi akatidia vo mbela lu luudu lʼalimbi.

³⁵Lamʼakandakumi lu kibandelu, alimbi wakawembe ne dia ngala kʼantu,

³⁶ne dia ului wʼantu wakayayakaka lʼokongo, wayahangohango vati: Wudiaki!

³⁷Lamʼakawayangi mboto la Paulu lu luudu lʼalimbi, ndi akambula olombodi ati: Dimi la wulu wa nkutela diui? Olombodi akawumbula ati: We mbeyaka oteketa wʼasi Ngirika?

³⁸Aha usi Edjibitu keye, lakatombosha antu ntundu, ndu lakatshu lʼantu nunu nei, wetawo vati: Atomboki, lʼusui?

³⁹Paulu akati ati: Usi Juda kemi, usi Taraso ka la Kilikiya, laha usi usumba wʼanyanya. Dimi lambukosengasenga nti: Mvuteli antu ane diui.

⁴⁰Lamʼakandetawo, Paulu akemala lu kibandelu, akahahiya antu lunya. Lamʼakawalembohala tshe, ndi akawatela lʼoteketa wʼasi Heberu ati: