Read tetala Etsha wa Atumami 22 Bible Online

Etsha wa Atumami 22 - tetala bible

Etsha wa Atumami 22

¹Analingu la wapapa, nyuki aui ami, walangami nyutela kakiane!

²Lamʼakawuki Paulu awatela lʼoteketa wʼasi Heberu, vo wakaleki nembohala. Ku ndi akati ati:

³Usi Tuda kemi, lakuto la Taraso ka la Kilikiya. Dimi lakuli lʼusumba one lʼekulu wa Ngamaliyeli;[129] wakambetsha elembe a watshesu wulu. Dimi laki la saki lu dikambu dia Unyashungu, uku wenyu la to, nyu tshe elo.

⁴Dimi lakasuya antu wa lu Mbuka kene pulu ndu lu nyoi. Dimi lakakeleka apami la amantu, lakawadji lu kanu.

⁵Ndu olombedi a ladiku eko omenyi, ndu dikumanyi tshe. Dimi lakalungula mikanda uma le wo utsha le anyasu, lakatshu utsha la Damaseke dia mbela ndu waku waki leko lʼekodi uya la Jerusalema, dia ndjasuya.[130]

⁶Lamʼakamatatshokaka osoku, lamʼakamakumi lasuki la Damaseke, unya aki lʼatei wʼote; usasi a wulu uma lʼulungu akampetela shashimuya.

⁷Dimi lakako la kete, lakuki diui diamvutela ati: Saulu, Saulu, ukundi ansuyaye na?

⁸Dimi lakûkaluya diui nti: Khumadiondjo, we na? Ndi akamvutela ati: Dimi Jesu yʼusi Nazareta kasuyaye.

⁹Wane waki la mi, wakenyi usasi mete, keli vo kumbuka diui dia one lakateketaka la mi.

¹⁰Dimi lakawumbula nti: Khumadiondjo, kayumutsha na? Khumadiondjo akamvutela ati: Unela, utshu utsha la Damaseke. Vo wayukutela akambu tshe leko, wakawakosonwela dia we ntsha.

¹¹Dimi kumbeya mena ne dia usasi ako a wulu. Wane waki la mi, wakanombola la lunya. Okone dimi lakakumi la Damaseke.

¹²Pami kemotshi aki leko, lukumbu landi Ananiya, lakakitanyiaka elembe, laki la lukumu lʼololo lʼatei wʼasi Juda tshe waki leko.

¹³Ndi akayi le mi, akemala lasuki la mi; akamvutela ati: Onalingu Saulu, nsena. Ku lʼushidi ako, dimi lakasene, lakawenyi.

¹⁴Ndi akati ati: Unyashungu a watshesu kambukosonola, dia we mbeya lulangu landi, la dia we mena One lʼOlolo, la dia we mbuka diui uma lʼunyo andi.

¹⁵We ayenya antu tshe akambu wakayenyi la wakayuki.

¹⁶Akayakungi na? Unela, ubatizami, uyaotsha kolo yaye, eti lukumbu la Khumadiondjo.

¹⁷Lamʼakamakalula la Jerusalema, lamʼakamalumbaka lʼetemwelo, dimi lakako la yimbatshimba.

¹⁸Dimi lakawenyi amvutela ati: Usamanya, umo esadi uma la Jerusalema, ne dia vo hawetawo diui diamvutaye.

¹⁹Dimi lakati nti: Khumadiondjo, vame mbeyaka okone akamadjaka waku waketawoka lu kanu, la okone akamakomolaka lu temwelo tshe.

²⁰Lamʼakawadiaki Stefano, undakanyi a dikambu diaye, dimi lakemala lasuki, laketawo dikambu diako; lakalami ahondo a wane wakuaiaki.[131]

²¹Ndi akamvutela ati: Umo. Dimi layukutuma etali le asi wedja.

²²Vo wakuhukama edja ndu lu diui so, ku wakahangohango vati: Nyunya untu one la kete! Kema ololo ndi ndjala la lumu.

²³Vo wakahangohango, wakakulula ahondo awo; wakafumbula ditshu lʼulungu.

²⁴Lamʼakawatshi osoku, olombodi a wuki wʼalimbi akati dia vo ndja la ndi lu luudu lʼalimbi, la dia mbokomola eshingo, dia ndi mbeya okone wakawahangohangoki lu dikambu diandi.

²⁵Lamʼakawukeleka ekodi, Paulu akambula olombodi wʼalimbi, lakemadi lasuki la ndi, ati: Nyu la wulu wa nkomola untu leli usi Romo eshingo, la ntundu watawamia?

²⁶Lamʼakuki olombodi wʼalimbi diui diako, ndi akatshu le olombodi a wuki wʼalimbi; akawutela ati: Ayangaye ntsha na? ne dia untu one eko usi Romo.

²⁷Olombodi a wuki akayi, akawumbula ati: Umvuteli, usi Romo keye? Ndi akati ati: Elu.

²⁸Olombodi a wuki akâkaluya diui ati: Dimi lakasumbi wulu wa ndjala usi Romo la falanga efula. Paulu akawutela ati: Dimi leko usi Romo umaka eutwelu.

²⁹Kemʼeuja, wane wakalangi mbumbula, wakutshiki. Ndu olombodi a wuki aki la woma lamʼakandeyi ati: Usi Romo kendi, ne dia ndi akukeleka.

³⁰La wedi a pindju, olombodi a wuki wʼalimbi akalangi nshihudia dikambu diakosongwela asi Juda, akukelekula. Ndi akati dia elombedi a waki la embadi tshe nsangana. Ndi akayi la Paulu, akaweme la ntundu kawo.