Read tetala Etsha wa Atumami 25 Bible Online

Etsha wa Atumami 25 - tetala bible

Etsha wa Atumami 25

¹Lamʼakakumi Festo lu leke landi la kete, lʼokongo a nshi shatu, ndi akunela uma la Kayisariya, akatshu utsha la Jerusalema.

²Elombedi a waki la antu a waki wʼasi Juda wakasongwela Paulu le ndi. Vo wakesengasenga,

³wakôlombe dia ndi mbatshela ololo dia ntuma Paulu uya la Jerusalema. Vo wakasanguya ntuhulamela lu mbuka dia mbudiaka.

⁴Keli Festo akâkaluya diui ati: Paulu ayulamema la Kayisariya: ndu ati: Dime lutsha ntsho leko.

⁵Wane weli la wulu lʼatei anyu, kawutshu la mi. Naka pami kene eko la munga, kawutosongwele.

⁶Lamʼakadjase Festo lʼatei awo, kumbeta nshi enanei kana dikumi, ndi akatshu utsha la Kayisariya. La wedi a pindju, ndi akadjase lʼelumbwelu, akati dia vo ndja la Paulu.

⁷Lamʼakandayi, asi Juda waki uma la Jerusalema wakemala wudingi, wakosongwela akambu wa wulu efula, wakiwo kumbeya nshikike.

⁸Paulu akayangunela ati: Dimi komonyola elembe wʼasi Juda, kuyanga etemwelo, kuyanga Kayisa.

⁹Keli Festo akalangi nduwana le asi Juda, akâkaluya Paulu diui ati: We ayetawo ntsho la Jerusalema dia ntulumbuyama akambu ane lu ashu ami?

¹⁰Keli Paulu akati ati: Dimi lambemala la ntundu kʼelumbwelu ka Kayisa, dihuli diahimbami numbuyama. Dimi kuntshela asi Juda kolo, weme mbeyaka dikambu so.

¹¹Naka utshi wa kolo mbemi, naka lakatshi dikambu diukukimi mvo, dimi halaseke mvo. Keli lamʼayuyala akambu ane wansongwelawo waha mete, untu heyi nkimomi le wo ne dia mbangenyangenya. Dimi lambukungela Kayisa.

¹²Festo akambwana la embadi; akawutela ati: We ambukungela elumbwelu ka Kayisa; we ayutsho le Kayisa.

¹³Lamʼaketi nshi motshi, khumʼekanga Angiripa la Berenika wakayi la Kayisariya, dia ndjemula Festo.

¹⁴Lamʼakawayala leko nshi efula, Festo akatela khumʼekanga dikambu dia Paulu ati: Untu omotshi eko lindu, lakatshiki Felika.

¹⁵Lamʼakimi la Jerusalema, elombedi a waki la dikumanyi diʼasi Juda wakamvutela dikambu diandi, wakanombe dia dimi mbamia.

¹⁶Dimi lakâkaluya diui nti: Asi Romo kema la etshelu ka nkimo untu ntundu one losongwediwo atayala la ntundu ka wane wosongwedi, ndu atayateketela dikambu diakawosongwela.

¹⁷Lamʼakawasangana lindu, dimi kuntshimbatshimba. Keli la wedi a pindju, dimi lakadjase lʼelumbwelu, lakati dia pami kako ndja.

¹⁸Lamʼakemala wane wakosongwela, vo kumbosongwela akambu wa kolo uku akamakanaka.

¹⁹Keli vo wakambwana diʼakambu wʼotemwelo awo, la dia untu omotshi Jesu lakavu; keli Paulu mvutaka ati: Ndi eko la lumu.

²⁰Dimi lakakanana lama nsambula akambu ako. Lakawumbula nti: We ayetawo ntsho la Jerusalema la ntulumbuyama akambu ane leko?

²¹Keli Paulu akalangi dikambu diandi nsambwama paka le khumʼekanga ka wuki Angusta. Ku dimi lakati nti: Wutshunge, edja ndu lamʼayumutuma le Kayisa.

²²Angiripa akatela Festo ati: Ndu dimi nangaka mbuka diui dia untu oso. Festo akati ati: We ayuka diui diandi lui.

²³La wedi a pindju, Angiripa la Berenika wakayi eyelu ka lukumu. Vo wakoto lʼelumbwelu kame la elombodi a waki wʼalimbi ndu la dihangamendi dia lʼusumba. Festo akati diui, ku wakayi la Paulu.

²⁴Festo akati ati: Khumʼekanga Angiripa, la apami tshe weli la su lone, nyu menaka untu one, asi Juda tshe wakosongwela la ntundu kami la Jerusalema ndu lindu. Vo wakati vati: Kema ololo ndi ntshikila la lumu ntu.

²⁵Keli dimi kumbutana la dikambu dia ndi mvo. Lamʼakandakungela elumbwelu ka khumʼekanga ka wuki Angusta, dimi lakasanguya dia mbutuma le ndi.

²⁶Dimi kema la diui dia shikaa dia nfundela khumemi dikambu diandi. Dia dikambu ne mbuyemi la ndi la ntundu kanyu, ndjekaleka la ntundu ka khumʼekanga Angiripa. Lamʼayundulumbuya, dimi layuyala la diui dia nfunda.

²⁷Ne dia lambukana nti: Kema ololo ntuma usi lukanu, ku aha mvuta akambu wakawosongwela.