Read tetala Etsha wa Atumami 26 Bible Online

Etsha wa Atumami 26 - tetala bible

Etsha wa Atumami 26

¹Angiripa akatela Paulu ati: We la wulu wa mvuta dikambu diaye. Ku Paulu akahahiya lunya, akayateketela ati:

²Khumʼekanga Angiripa, dimi la ongenongeno elo dia ndjateketela la ntundu kaye, diʼakambu tshe wakansongwela asi Juda.

³Dimi lambongenangena utamanya, ne dia we mbeyaka ditshelu diawo la tamu tawo ololo. Okone lambukosengasenga dia we mpukama diui diami okoke.

⁴Asi Juda tshe mbeyaka ditshelu diami umaka dikenda, diaki la mi uma lʼetatelu lʼatei a wudja asu, ndu la Jerusalema.

⁵Lamʼalangawo mvuta diui, vo wambumbeyaka edja vati: Ufarise[139] mbendi, lakaleki ndjela akambu wʼotemwelo asu wulu.

⁶Kakiane, dimi lambemala lane dia numbuyama ne dia elungamelu ka daka diakalaki Unyashungu tshesu.

⁷Wedja asu dikumi la ehendi watukambelaka Unyashungu ulimu wulu ndu lʼutshu ndu la yanyi. Vo watulungamelaka vati: Tayulungula daka diako. Khumʼekanga, asi Juda wambonsongwela ne dia elungamelu kene!

⁸Ukundi akananyu nyati: Dio dieko dikambu diaheyana mbetawoma ati: Unyashungu atululaka wane wakavu?

⁹Mete, ndu dimi lakakani nti: Dieli la mi dia ntshela lukumbu la Jesu yʼusi Nazareta akambu wa kolo efula.

¹⁰Dimi lakatshaka okone ndu la Jerusalema. Lamʼakamalungula wulu uma le elombedi a waki, dimi lakadji ekilami efula lu mvudu ya kanu. Lamʼakawayangaka mbadiaka, dimi laketawoka.

¹¹Tena efula mbakamasuyaka lu temwelo tshe. Dimi lakahimbi dia mbatengia Unyashungu, lakatamanya mbahetsha, lakasuya edja ndu lʼesumba wa lu wedja ekina.[140]

¹²Okone dimi lakatatshokaka utsha la Damaseke lu dikambu ne, la wulu uma le elombedi a waki la diui diawo.

¹³Lamʼakakumi unya lʼatei ote, we khumʼekanga, dimi lakenyi usasi uma lʼulungu, wuleki usasi a unya. Vo wakampetela dimi la wane wakatatshokaka la mi.

¹⁴Shu tshe takako la kete. Ku dimilakuki diui diamvutela lʼoteketa wʼasi Heberu ati: Saulu! Saulu! ukundi ansuyaye na? We ayuhumo dia nsukuya lukulu lʼetamba wa sodi.

¹⁵Dimi lakati nti: Khumadondjo, we na? Ndi akati ati: Dimi Jesu, kasuyaye.

¹⁶Keli unela, emali. Dimi lambenama le ye, dia nkosonola uku ukambi la omenyi wʼakambu wakayamenyi, ndu wayumukenya.

¹⁷Dimi layukushimbela uma le asikaye, ndu uma le asi wedja — wakutumami le wo;

¹⁸dia we nsenya ashu awo, dia vo nkadimo uma lu udjima utsha lu usasi, la uma lu wulu a Satana utsha le Unyashungu; dia vo nungula edimanyelu ka kolo la ukito lʼatei a wane wambukidiama uma lu mbetawo ka dikambu diami.

¹⁹Uma lu akambu aso, we khumʼekanga Angiripa, mbakimi kuntuna nkitanyia enelo kʼuma lʼulungu.

²⁰Ntundu, dimi lakatela wa la Damaseke,[141] ndu wa la Jerusalema,[142] ndu wa lu leke la Judiya tshe, ndu asi wedja nti: Nyukadimuli etema le Unyashungu. Nyutshaki akambu uku ukadimudinyu etema.

²¹Dia dikambu ne, mbakamundi asi Juda lu etemwelo, wakayangi ndjakami.

²²Ne dia Unyashungu akankimanyia, mbemadimi edja ndu elo, latela wa tshitshe ndu wa waki paka akambu wakati amvutshi la Mose vati: Wayuya.

²³Diaki la Kristu dia nsuwa, ku ndi akulo uma lu nyoi.[143] Okone ndi akenya ndu asikandi ndu asi wedja yanyi.[144]

²⁴Lamʼakandayateketela osoku, Festo akati diui dia wulu ati: Paulu, we ambudjo! Ewu kaye kʼutamanya kambukudjuya.

²⁵Keli Paulu akati ati: Shakasaka Festo, dimi kema umbidjoki. Dimi lambuta aui wa mete la yimba.

²⁶Khumʼekanga mbeyaka akambu aso, haluki woma dia mbutelawo. Lambukana nti: Akambu ako hawuwushama, ne dia dikambu ne kuntshama lu usheshe.

²⁷Khumʼekanga Angiripa, we mbetawoka aui wʼamvutshi? Dimi mbeyaka nti: We mbetawoka.

²⁸Angiripa akatela Paulu ati: Lʼetena ka tshitshe, we nkanaka dia mbetemi usika Kristu!

²⁹Paulu akati ati: Kuna etena ka tshitshe kana kʼutali, dimi lambolomba Unyashungu dia we la wane tshe wambuka aui ami elo, wayali uku dimi, paka molola ene etu watshikali.

³⁰Khumʼekanga akunela, ndu umbuledi, ndu Berenika, ndu wane wakadjashi kame la wo.

³¹Lamʼakawamo, vo wakatanela vati: Untu one kuntsha dikambu dia ndi mvo, kuyanga dia mundama lu lukanu.

³²Angiripa akatela Festo ati: Utunduyala untu one kunkungela elumbwelu ka Kayisa, tshiki ndi ambukimwama.