Read tetala Etsha wa Atumami 28 Bible Online

Etsha wa Atumami 28 - tetala bible

Etsha wa Atumami 28

¹Lamʼakatahandi, shu takeyi shati: Disenga ne mbetawo vati: Malata.

²Asendji wa leko wakatuki ngandji efula. Vo wakatohetshiya dja, wakatulungula shu tshe, ne dia mvula akatatela ndo ndu akayala tshitshi.

³Keli lamʼakasanganya Paulu ekanda ka kunyi ka munga lu dja, ului akatumbi uma loko ne dia luhaladi la dja, akulumata lu lunya.

⁴Lamʼakenyi asendji ului a kolo alendalenda lu lunya landi, vo wakatanela vati: Mete, untu one undjakanyi mbendi. Ndi ambuhanda ashi a wuki, keli sambu kʼololo hetawo dia ndi ntshikala la lumu.

⁵Keli vo wakalungamela vati: Ndi ayuda, kana ayoko la kete shashimuya, ayuvo.

⁶Keli lamʼakawalungamela edja, komena nduku dikambu diakayala le ndi, vo wakakadimula tukanyi; wakati vati: Unyashungu mbendi.

⁷Lasuki la lamʼakiwo, kaki kete yʼuntu a wuki a lu kete sho, lukumbu landi Pubiliyo; ndi akatulungula, akatuhangia nshi shatu la kenemo.

⁸Shi Pubiliyo aketama la hemo ka dungi la sawu ka dikila. Paulu akoto lene akindi, akalombe, akawahe anya, akokonya.

⁹Lamʼakandatshi osoku, akina waki la hemo lu kete sho, wakayi, wakakono.

¹⁰Vo wakaleki ntolemia; lamʼakatatshu, vo wakotshiya diango diakatahumbi lu watu.

¹¹Lamʼaketi ngondo shatu, shu takoto lu watu wa la Alesanderiya waketema lu kete sho lu ngondo ya tshitshi, djimbitelu yawo yaki Ana wa Diasa.

¹²Shu takakumi la Sirakuse, takatshikala leko nshi shatu.

¹³Takatshimbi uma leko, takakumi la Rengiyo. Lamʼaketi lushi otoi, lopepe lʼuma ladiku dia kushi lakapepe. Lu lushi la hendi, takakumi la Puteoli.

¹⁴Shu takatani anyasu leko. Vo wakatosengasenga dia shu ntshikala la wo nshi esambeli. Okone shu takakumi la Romo.

¹⁵Lamʼakuki anyasu wa la Romo lukumu lasu, vo wakayi la ndjutusangela lu Kituka kʼApiyo la lu Pangu Shatu. Lamʼakawaenyi Paulu, ndi akuki Unyashungu lusaka, akakikitala.

¹⁶Lamʼakawakumi la Romo, waketawo dia Paulu mbidjase ndame, ndi la dimbi diakiilamaka.

¹⁷Lamʼaketi nshi shatu, Paulu aketi dihangamendi diʼasi Juda. Lamʼakawayi, ndi akawatela ati: Anyasu, kuyanga dimi kuntshela antu kolo, kundjaka ditshelu dia watshesu, keli lakakimwama lʼanya wʼasi Romo, lakayala usi lukanu umaka Jerusalema.

¹⁸Lamʼakawamumbula, vo wakalangi ntshungulami, ne dia dimi taki la dikambu dia mvo.

¹⁹Keli lamʼakatuni asi Juda dikambu so, diaki la mi dia nkungela elumbwelu ka Kayisa,[145] keli dimi taki la dikambu dia nsongwela wudja asu.

²⁰Dia dikambu ne mbakamanyetshi, dia dimi nyena ndu dia nteketa la nyu; dimi lambukelekama la molola one, ne dia elungamelu ka Isariyele.

²¹Vo wakawutela vati: Shu kunungula mikanda uma la Judiya dia dikambu diaye. Nduku unyasu akayi lindu dia nkudimula kana nteketa diui dia kolo lu dikambu diaye.

²²Keli shu nangaka mbuka uku akanaye dia otemwelo one. Shu mbeyaka shati: Lu ahuli tshe, antu mvutaka aui wa kolo lu dikambu diawo.

²³Lamʼakawusunwela lushi, efula wakayi lakandi. Ndi akalimbitshiya dikambu umaka pindju edja ndu la dikolo; akawatela dia diulelu dia Unyashungu; akawaenya dikambu dia Jesu, uma lʼelembe a Mose ndu uma lʼaui wʼamvutshi.

²⁴Amotshi waketawo akambu wakandati, amotshi wakatuni.

²⁵Vo kombedimia aui kame, wakamo lamʼakawatela Paulu diui diame ati: Nyuma kʼOlolo akatela watshenyu dikambu dia mete lʼunyo wʼumvutshi Isaya ati:

²⁶Tshoka le antu ane, uwateli wati: Mbuka nyayuka, ku hanyushihudia; Mena nyayena, ku hanyenyi:

²⁷Etema wʼantu ane wambuyala wetshu, Atui awo wambuyala puki, Vo wambudiha ashu awo, Ne dia vo watukena la ashu awo, Watukuka lʼatui awo, Watukushihudia lʼetema awo, Watukukadimo, dia dimi mbakonoya.[146]

²⁸Okone nyeyi nyati: Panda kene ka Unyashungu kambutumama le asi wedja ndu vo wayukiuka. [147]

²⁹Lamʼakandati aui aso, asi Juda wakamo, wakadjana tamu efula.

³⁰Paulu akadjase deku pendi etundu lu luudu lone lakandafutaka, akalungula antu tshe wakayakaka le ndi.

³¹Ndi akasambisha dia diulelu dia Unyashungu; akawaetshaka akambu wa Khumadiondjo Jesu Kristu la dihunga tshe. Nduku untu akushimbi.