Read tetala Etsha wa Atumami 4 Bible Online

Etsha wa Atumami 4 - tetala bible

Etsha wa Atumami 4

¹Lamʼakawatelaka antu diui so, elombedi a waki la olombodi wʼetemwelo la Asaduke wakayi le wo.

²Vo waki la kele ne dia vo Waketshaka antu, wakatelaka antu dikambu dia eulwelu kʼuma lu nyoi, ne dia Jesu akulo.

³Vo wakawandi, wakawadji lu lukanu edja ndu la wedi a pindju, ne dia aki dikolo.

⁴Keli antu efula wakuki diui, waketawo. Apami waki uku nunu tanu.

⁵La wedi a pindju, embuledi la dikumanyi la afundji wakasangana la Jerusalema.

⁶Anasi, olombedi a ladiku, aki laawo, ndu Kayifasi, ndu Joani, ndu Alesandere, ndu wa lu khumbu kʼolombedi a ladiku.

⁷Lamʼakawawaeme lʼatei awo, vo wakawambula vati: Uma lu wulu akona, kana lu lukumbu lakona lakanyatshi dikambu ne?

⁸Ku Petero, lakaluli la Nyuma kʼOlolo, akawatela ati: Nyu embuledi wa wudja la dikumanyi,

⁹elo shu tambumbwana dia dikambu diʼololo diutshamedi kanga dimba wodu, dia okone wakakono untu one.

¹⁰Nyu tshe nyeyi, ndu asi Isariyele tshe, nyati: Lu lukumbu la Jesu Kristu yʼusi Nazareta, lakanyadiaki lu utamba a mpeketanya, lakulula Unyashungu uma lu nyoi, ne dia lukumbu lone mbemadi untu one la ntundu kanyu.

¹¹Ndi keli dive diakanyatuni, nyu ambiki a luudu, diakayala ote a tshuku.[25]

¹²Panda kema le untu ukina. Nduku lukumbu lukina la tshina diʼulungu lamboyama le antu, leya ntushimbela.

¹³Lamʼakawenyi dihunga dia Petero la Joani, lamʼakaweyi vati: Haweyi mukanda, antu kʼantu mbewo, vo wakambi, wakawaeyi vati: Waki la Jesu.

¹⁴Lamʼakawenyi untu lakakono emadi la wo, vo kumbeya mvuta nduku diui.

¹⁵Keli lamʼakawawatela vati: Nyumo uma lʼelumbwelu, wakambwana

¹⁶vati: Ukundi atshelasu antu ane? Mete, tshe watuyalaka la Jerusalema, wambena vati: Dikambu dia mamba dieyama, mbakatshi antu ane. Shu hateyi dianguna.

¹⁷Keli dia dikambu ne tadiudianganaki lʼatei wʼantu, tuwaneli shati: Tanyutelaki untu dikambu lu lukumbu lone pundju.

¹⁸Vo wakawaeti, wakakokomiya diaha vo mvuta nduku diui, kuyanga mbetsha antu lu lukumbu la Jesu.

¹⁹Keli Petero la Joani wakâkaluya diui vati: Naka eko ololo lu ashu a Unyashungu dia nyukela uleki mbukela Unyashungu, nyusambuli nyame.

²⁰Ne dia shu hateyi ntsha dikambu dikina, paka mvuta akambu wakatenyi la wakatuki.

²¹Lamʼakawawanela ntu, vo wakakimo, komena lama mbasuya, ne dia antu. Ne dia antu tshe wakatumbulaka Unyashungu dia dikambu diakatshama.

²²Ne dia untu lakawatshela dikambu so dia mamba dia nkono, aki la deku akumi anei.

²³Lamʼakawakimo, vo wakakalula le anyawo, wakasanya akambu tshe wakawatela elombedi a waki la dikumanyi.

²⁴Lamʼakawuki dikambu so, vo waketiia aui awo kame le Unyashungu, wata vati: Khumadiondjo, we kakatungi ulungu la kete, la ashi a waki, la diango tshe dieli loko.[26]

²⁵We kakati uma le Nyuma kʼOlolo lʼunyo wa tshesu Davidi, ukambi aye, wati: Okoko wana wakafunela asi wedja kete? Okoko wana wakakani antu akambu wʼanyanya?

²⁶Khumi ya dikanga ya la kete wakashikikala, Embuledi wakasangana, Dia mbidjela Khumadiondjo sheki, ndu le Ukitami andi wʼiso.[27]

²⁷Mete, lʼusumba one, Herode[28] la Potiyo Pilata,[29] la asi wedja, la asi Isariyele wakasangana dia mbidjela ukambi aye wʼekila Jesu, lakayakiti iso, sheki,

²⁸la dia ntsha akambu wakasonola lunya laye la utema aye ntundu wati: Wayuya.

²⁹Khumadiondjo, kakiane, ulungi aui awo wa dianelu. Usha ekambi aye dia vo mvuta diui la dihunga tshe,

³⁰lamʼasimbulaye lunya laye dia nkonoya antu, tulimbitelu la akambu wa mamba watshami lu lukumbu la ukambi aye wʼekila Jesu.

³¹Lamʼakawalombe, dihuli diakawasangana diakasutshasutshama. Vo tshe wakaludiama la Nyuma kʼOlolo, wakati diui dia Unyashungu la dihunga.

³²Embetawudi waki la utema otoi. Nduku untu lakati ati: Diango dieli la mi, diami mbedio. Keli vo wakasanganya diango diawo tshe kame.[30]

³³Atumami waki la wulu efula wa mvutela antu dia eulwelu ka Khumadiondjo Jesu. Ngandji ka mamba kaki le wo tshe.

³⁴Nduku untu lʼatei awo akahumbi engo. Ne dia wane waki la kambo kana mvudu, wakasundja, wakela diango diakawalungula.

³⁵Vo wakadikitsha la ntundu ka atumami. Vo wakadikaha le untu lʼuntu, uku aki ehumba awo.

³⁶Untu omotshi, lukumbu landi Josefu, lakole atumami ntu vati: Baranaba (kitshimudi ati: Ona lʼekikitshelu), usi Lewi kakindi, akuto la Kupiro.

³⁷Ndi aki la ekambo, akakisundja, akela falanga, akayikitsha la ntundu kʼatumami.