Read tetala Etsha wa Atumami 5 Bible Online

Etsha wa Atumami 5 - tetala bible

Etsha wa Atumami 5

¹Keli pami kemotshi, lukumbu landi Ananiya la wadendi Safira wakasundja etshi ka kete.

²Ndi akashe etenyi kʼushinga, ndu wadendi akeyi dikambu diako. Ndi akela etenyi kemotshi, akakikitsha la ntundu kʼatumami.

³Keli Petero akawutela ati: Ananiya, ukundi ambulula uhimbanyi lʼutema aye, dia we nkesa Nyuma kʼOlolo, la dia we mbishe etenyi kʼushinga wʼekambo?

⁴Lamʼaki ekambo lʼanya aye, to taki ekambo kaye uka? Lamʼakayakisundja, ushinga ato tawaki ushinga aye? Ukundi akayakani yimba dia dikambu ne lʼutema aye na? We hakeshi antu, Unyashungu kukeshiye.

⁵Lamʼakuki Ananiya aui aso, ndi akako, akavu. Woma wa mamba akandi antu tshe wakuki diui diako.

⁶Elongo wʼapami wakunela, wakawombe la ahondo, wakatumbi la ndi, wakatukhunde.

⁷Lamʼaketi unya uku tenyi satu, wadendi akoto. Ndi kumbeya dikambu diakatshama.

⁸Petero akawutela ati: Umvuteli kana nyu nyakasundjisha ekambo lʼushinga one. Ndi akati ati: Elu, lʼushinga uku.

⁹Keli Petero akawumbula ati: Ukundi akanyasangi lulimi dia mpimba Nyuma ka Khumadiondjo? Enda, wanya a waku wakakhunde umeye weko la suku, vo wayutumba la ye.

¹⁰Kemʼedja, ndi akako la ntundu kandi, akavu. Elongo wʼapami wakoto, wakutani ambuvo, wakatumbi la ndi, wakatukhunde la le umendi.

¹¹Ekelizia tshe wakuki woma efula, ndu wane tshe wakuki akambu aso.

¹²Atumami wakatshi tulimbitelu efula la akambu wa mamba lʼatei wʼantu. Vo wakasangana lʼutema otoi lu mbalasa ka Solomona.

¹³Antu akina kundjala la dihunga dia mboto lʼului awo. Keli antu wakalemia.

¹⁴Embetawudi, elui wʼapami la wʼamantu, wakatafulanelaka le Khumadiondjo.

¹⁵Dia dikambu so, vo wakela akanga a hemo lʼesese, wakakitsha lu tangi la poi, vati: Lamʼayeta Petero, didjidji diandi diayukumba omotshi.

¹⁶Antu efula wʼuma lu esumba waki lasuki la Jerusalema wakasangana, wakela akanga a hemo, ndu wane wakahenyahenyama la edienge. Vo tshe wakakono.

¹⁷Keli olombedi a ladiku akunela, ndu waki la ndi tshe waki lu leke la Asaduke, wakaluli la kandjema.

¹⁸Vo wakandi atumami, wakawadji lu lukanu.

¹⁹Keli ondjelo wa Khumadiondjo akadihula kuki ya luudu la lukanu lʼutshu, akatundja; akawatela ati:

²⁰Nyutshu, nyutemali lʼetemwelo, nyututeli antu aui tshe wa Lumu lone.

²¹Lamʼakawuki diui so, vo wakoto lu etemwelo la lokese, waketsha antu. Keli olombedi a ladiku, la wane waki la ndi, wakasanganya embadi, ndu ului tshe wa dikumanyi diʼasi Isariyele, akatumi diui lu luudu la lukanu dia ndja la wo.

²²Keli lamʼakayi asi mbalasa vo kumbatana lu luudu. Vo wakakalula, wakati vati:

²³Takatanyi luudu la lukanu ludihami ololo, la alami wemadi lu asuku. Keli lamʼakatadihudi, shu hatutanyi nduku untu loko.

²⁴Lamʼakuki olombodi wʼetemwelo la elombedi a waki aui aso, vo wakakanana efula dikambu diawo, vati: Ukundi ayuyala dikambu so na?

²⁵Untu omotshi akayi akayuwatela ati: Enda, antu wakanyadji lu lukanu ane wemadi lʼetemwelo, wetsha antu.

²⁶Ku olombodi la asi mbalasa wakawaela aha la khudu, ne dia vo wakuki antu woma vati: Watukutuka ave.

²⁷Lamʼakawawaela, vo wakawaeme la ntundu kʼembadi. Ku olombedi a ladiku akawatela ati:

²⁸Shu takanyokokomiya shati: Tanyetshaki antu lu lukumbu lone. Enda, nyu nyambukutsha Jerusalema la wetshelu anyu, nyu nyangaka ntukitshiya dikila dia untu one lʼete asu.[31]

²⁹Keli Petero la atumami wakâkaluya diui vati: Dieli la su dia nkitanyia aui wa Unyashungu, aha aui wʼantu atu.

³⁰Unyashungu a watshesu akulula Jesu lakanyahane lʼutamba, lakanyadiaki.

³¹Unyashungu akawedia la lunya landi la pami, dia ndi ndjala Olombodi la Ushimbedi, dia mbisha asi Isariyele ekadimwelu kʼetema la edimanyelu ka kolo.

³²Shu teko emenyi wa akambu aso. Ndu Nyuma kʼOlolo, kakasha Unyashungu waku watukitanyiaka, eko omenyi.

³³Keli lamʼakawuki diui so, vo wakuki kele ka wulu, wakalangi mbadiaka.

³⁴Keli Ufarise omotshi, lukumbu landi Ngamaliyele, akemala lʼatei wʼembadi. Ndi aki umbetsha wʼelembe, akalemiama le antu tshe; akati ati: Watukutumba yema.

³⁵Ku ndi akawatela ati: Nyu asi Isariyele, nyutukukana yimba dia ntshela antu ane dikambu.

³⁶Ne dia nshi ya ntundu, Tudasi akunela, akati ati: Dimi untu a wuki. Apami uku kama nyei wakumamema, ku ndi akadiakema. Tshe wakuyelaka, wakahandjo. Dikambu diawo diakayala anyanya.

³⁷Lʼokongo andi, Judasi yʼusi Ngalili akunela lu nshi ya nfunda kumbu yʼantu, akakutula antu amotshi lʼokongo andi, ndu ndi akavu. Waku tshe wakukitanyia, wakahandjo.

³⁸Kakiane, dimi lambunyutela nti: Nyangani uma le antu ane, nyuwaete. Naka dikambu ne kana ulimu one weko uma le antu, ayuyala anyanya.

³⁹Keli naka dio dieli uma le Unyashungu, nyu hanyeyi mbalembia: nyutukuyala uku wane walosha Unyashungu ta.

⁴⁰Vo waketawo diui diandi. Lamʼakaweti atumami, vo wakakomola; wakakokomiya vati: lanyutaki diui lu lukumbu la Jesu, ku wakakimo.

⁴¹Ku vo wakamo uma la ntundu kʼembadi, watangenangena ne dia vo wakakuki dia monywama dia lukumbu loso.

⁴²La lushi la lushi lu etemwelo ndu la wakawo, vo kumpeko mbetsha antu la nsambisha Lukumu lʼOlolo vati: Jesu keli Kristu.