Read tetala Etsha wa Atumami 6 Bible Online

Etsha wa Atumami 6 - tetala bible

Etsha wa Atumami 6

¹Lu nshi sho, lamʼakafuli ambeki, asi Juda wa lu leke laki asi Ngirika wakangunangunela asi Heberu, ne dia vo wakakale wadi waki edu awo lu ekahelu ka diango ka la lushi la lushi.

²Atumami dikumi la ahendi waketi ului wʼambeki, wakati vati: Hasungana dia shu nkimo diui dia Unyashungu la ntsha ulimu a mesa.

³Anyasu, nyuyangi apami esambeli akanga a lukumu lʼololo uma lʼatei anyu, wane wuludiami la Nyuma kʼOlolo la yimba, tuwakitsha ladiku dia dikambu ne.

⁴Keli shu tayutetemala lʼulimu wa diui la lʼulimu wa dombelo.

⁵Diui diako diakangenyangenya vo tshe. Vo wakasonola Stefano, lakaluli la mbetawo la Nyuma kʼOlolo, la Filipo, la Porokoro, Nikanora, Timona, Paramena, la Nikolao ka lʼAtioka, laketawo dikambu dia Judasi.

⁶Vo wakawaeme la ntundu ka atumami, wakalombe Unyashungu, wakawahe anya.

⁷Diui dia Unyashungu diakafuli. Ambeki wakafuli la Jerusalema otekoya. Ndu elombedi efula waketawo.

⁸Stefano, lakaluli la ngandji ka mamba la wulu, akatshaka akambu wa mamba a waki la tulimbitelu lʼatei wʼantu.

⁹Keli amotshi uma lʼetemwelo kakawetaka vati: KʼAtshungwami, ndu asi Kurene, ndu asi Alesanderiya, ndu asi Kilikiya la Asiya, wakunela, wakadji la Stefano tamu.

¹⁰Vo kumbeya mbuleka yimba; la Nyuma mbakandateketaka.

¹¹Ku vo waketawuya apami amotshi dia vo mvuta vati: Takawuki atenga Mose la Unyashungu.

¹²Ku vo wakatombosha antu ndu dikumanyi ndu afundji, wakayi le ndi, wakawundi, wakatshu la ndi le embadi.

¹³Vo wakeme emenyi wa kashi, wakati vati: Untu one haheko monyola dihuli diʼekila ne la elembe.

¹⁴Ne dia takawuki ata ati: Jesu usi Nazareta ayulanya dihuli ne, ayukadimula ditshelu diaketsha Mose.

¹⁵Waku tshe wakadjashi lʼului, wakawendi tee, wakenyi elundji kandi uku ka ondjelo.