Read tetala Etsha wa Atumami 7 Bible Online

Etsha wa Atumami 7 - tetala bible

Etsha wa Atumami 7

¹Olombedi a ladiku akawumbula ati: Akambu aso mete kewo?

²Ku ndi akati ati: Analingu la wapapa, nyuhukami! Unyashungu a lutumbu akene le tshesu Abarahama, lamʼakindi la Mesopotamiya, ntundu ndi atadjase la Harana.

³Ndi akawutela ati: Umo uma lu kete yaye, uma lʼatei wʼasikaye, utshu lu kete yayumukenya.[32]

⁴Ku ndi akunela uma lu kete ya Kaladiya, akayudjase la Harana.[33] Lamʼakavu shi, Unyashungu akawunya uma leko, akayukitsha lu kete yudjashinyu kakiane.[34]

⁵Ndi kumbusha ukito leko, kuyanga hyuli ya nkitsha dikaka diandi. Lamʼakindi atuti ona, Unyashungu akulaki ati: Dimi layukusha kete nye, we la tukanula taye.[35]

⁶Unyashungu akati ati: Tukanula taye tayuyala lu kete ya kana. Vo wayuwalunga fumbi, wayatshela kolo deku kama nyei.

⁷Unyashungu akati ati: Dimi layulumbuya wudja wayuwuyala fumbi yawo. Lʼokongo diku, vo wayutumba, wayontemola lu dihuli ne.[36]

⁸Ndi akawasha sheki yʼahamelu kʼuhekeli.[37] Okone Abarahama akuti Isaka,[38] akawahemia uhekeli lushi lʼenanei. Isaka akuti Jakoba.[39] Jakoba akuti watshesu dikumi la ahendi.[40]

⁹Watshesu wakuki Josefu kandjema,[41] wakusundja utsha le Edjibitu.[42] Unyashungu aki la ndi.[43]

¹⁰Ndi akushimbela uma lʼasui andi tshe, akawusha kenemo la yimba la ntundu ka Farayo, khumʼekanga ka Edjibitu, ako lakawete umbuledi wʼEdjibitu ndu wa lu luudu landi tshe.[44]

¹¹Ndjala ka kasha kakayala lu kete ya Edjibitu tshe la ya Kanana, ndu asui a waki. Watshesu komena mbu ya nde.[45]

¹²Keli lamʼakuki Jakoba ati: LʼEdjibitu keli mbu ya nde, ndi akatumi watshesu etena ka ntundu.

¹³Lʼetena ka hendi, Josefu akayashula le anangu.[46] Farayo akenyi wudja wa Josefu.[47]

¹⁴Josefu akatumi diui, aketi Jakoba, shi,[48] ndu asikandi tshe, waki antu akumi esambeli la atanu.[49]

¹⁵Jakoba akatshu lʼEdjibitu.[50] Ndi akatuvo[51] ndi la watshesu.

¹⁶Vo wakatole la Shekeme, wakakhunde lu diumbu diakasumbi Abarahama la Shekeme la fesa, uma le ana wa Hamora.[52]

¹⁷Keli lamʼakasukana etena ka nshidiya daka diakalaki Unyashungu Abarahama, antu wakutana, wakafulanela lu Edjibitu;

¹⁸edja ndu lamʼakayala khumʼekanga kekina lʼEdjibitu, laki kumbeya Josefu.[53]

¹⁹Ndi akakesaka wudja asu;[54] wakatshelaka watshesu kolo, dia vo mbikadjaka anʼawo wʼashashi dia vo mvo.[55]

²⁰Lʼeleku kako, kakawuti Mose. Ndi aki dimena diahangone la ntundu ka Unyashungu. Wakulesha ngondo shatu lu luudu la shi.[56]

²¹Lamʼakawawukadja, ona umuntu a Farayo akotongona, akawudia uku onʼandi.[57]

²²Waketsha Mose yimba tshe yʼasi Edjibitu. Ndi aki wulu lu aui andi la lu etsha andi.

²³Keli lamʼakandayala deku akumi anei, kanyi yakayala lʼutema andi dia ntsho dia ntenda anangu, asi Isariyele.

²⁴Lamʼakandenyi usikandi asuwa, ndi akukimanyia; akasombweya one lakasuwaka, akadiaki usi Edjibitu.

²⁵Ndi akakani ati: Asikami wambeya vati: Unyashungu ambashimbela lʼanya ami, keli vo kumbeya osoku.

²⁶La wedi a pindju, ndi akatumbela wane wakalokaka, akahimbi mbashimba; akati ati: Wayone, tuku untu la onangu mbenyu; okoko wana watshanelanyu kolo?

²⁷Keli one lakatshela usikandi kolo, akusukula ati: Akakete umbuledi la umbadi asu na?

²⁸We nangaka ndjakami, uku akayadiaki usi Edjibitu lui?

²⁹Lamʼakuki Mose diui so, ndi akalawo; akayala uku ongendangenda lu kete ya Midiyana,[58] akatuta ana apami ahendi leko.[59]

³⁰Lamʼakakuki deku akumi anei, ondjelo akene le ndi lʼusui wa shenga wa lʼUkungu wa Sinai, lu lumbi la dja lu dikumbu.

³¹Lamʼakenyi Mose dikambu so, ndi akambi dia enelo kako. Lamʼakandasukana dia ntenda, diui diakayi le ndi ati:

³²Dimi Unyashungu a watsheye, Unyashungu wa Abarahama, la Isaka la Jakoba. Ku Mose akadidima, kundjala la dihunga dia dienda.

³³Khumadiondjo akawutela ati: Unya sabata uma lʼekulu aye, ne dia dihuli diemadiye dieko kete yʼekila.

³⁴Mete, dimi lambena asui wʼantu ami weli lʼEdjibitu. Dimi lambuka akhumu awo. Dimi lambuhulo dia ndjashimbela. Yaka lindu, nkutumi lʼEdjibitu.[60]

³⁵Mose, one lakawatuni vati: Ambukete umbuledi la umbadi na? Unyashungu akutumi dia ndi ndjala umbuledi la ushimbedi. Ndi akatshi dikambu ne la lunya lʼondjelo wakene le ndi lu dikumbu.

³⁶Untu ako akatumbi la wo, lamʼakandatshaka akambu wa mamba la tulimbitelu lʼEdjibitu,[61] edja ndu lʼUduwa a Tilili,[62] ndu lʼusui wa shenga deku akumi anei.[63]

³⁷Mose ako lakatela asi Isariyele ati: Unyashungu ayunyutundjiya umvutshi uma lʼatei wʼanyanyu uku dimi.[64]

³⁸Ndʼako kaki la ekelizia lʼusui, la ondjelo wakateketaka la ndi lʼUkungu wa Sinai,[65] ndu la watshesu. Ndʼako kakalungula elembe wa lumu dia ntusha.

³⁹Watshesu kunkitanyia aui andi, keli wakusukula. Etema awo wakakalula lʼEdjibitu.

⁴⁰Vo wakatela Arona vati: Ututsheli ditemolatemola dia ntsho la ntundu kasu. Ne dia shu hateyi okone wambuyala Mose one[66] lakatutundja uma lu kete yʼEdjibitu.

⁴¹Lu nshi sho, vo wakatshi efanelu kʼosongo a ngombe, wakalambula ekishi kako elambu. Vo wakangenangena dia elimu wʼanya awo.[67]

⁴²Keli Unyashungu akawaediya okongo, akakimo dia vo nkambela ului a diango dia lʼulungu ulimu. Uku akafundama lu abuku ati: Nyu khumbu ka Isariyele, Lamʼakinyu lʼusui deku akumi anei, Nyakanambula nyama ya ludiaka la elambu ekina uka?

⁴³Nyakembe etumbu ka Moloka, Ndu yoto ya etemolatemola Refana, Dikishi diakanyatshi dia ditemola; Dimi layunyotola lʼokongo a Babilona.[68]

⁴⁴Watshesu waki la etumbu ka omenyi lʼusui, uku akadjanga one lakateketaka la Mose ati: Ukitshi uku efanelu kakayenyi.[69]

⁴⁵Lʼetena kawo, watshesu ndu Jashua wakakiela[70] lamʼakawakumi lu kete yʼasi wedja, wane wakanya Unyashungu uma lu ashu a watshesu, edja ndu lu nshi ya Davidi,

⁴⁶ako lakalemiama lu ashu wa Unyashungu, akalombe dia ndi ntanela Unyashungu a Jakoba edjaselu.[71]

⁴⁷Keli Solomona akuhikela luudu.[72]

⁴⁸Keli KhumʼUlungu hatudjaseka lu mvudu yakawahiki lʼanya, uku akati umvutshi ati:

⁴⁹Ulungu eli kiti kami ka diulelu, Kete yeli kihuna kʼekulu ami. Wuhu akona wa luudu wayunyumpikela? mbata Khumadiondjo. Kana dihuli diakona diatumuyalaka?

⁵⁰Undi, lunya lami kuntsha diango ne tshe uka?[73]

⁵¹Nyu akanga wʼete wulu, nyeli la etema la atui wuhedia. Nyu nyatutunaka Nyuma kʼOlolo nshi tshe. Nyatutshaka uku akatshaka watshenyu.[74]

⁵²Umvutshi akona waki watshenyu kumbusuya? Vo wakadiaki wane wakati ntundu vati: One leli Ololo, ayuya. Kakiane nyu nyambuyala afungi la andjaki andi.

⁵³Nyu nyakalungula elembe uku akandjanga ondjelo, keli nyu kumbekitanyia.

⁵⁴Lamʼakawuki aui aso, etema awo wakaluli too la ududu, wakayalumata lu dikambu diandi.

⁵⁵Keli ndi akaluli la Nyuma kʼOlolo, akendi lʼulungu tee, akenyi lutumbu la Unyashungu, la Jesu emadi lu lunya la pami la Unyashungu.

⁵⁶Ndi akati ati: Enda, dimi lambena ulungu ambudiho la Onʼa untu emadi lu lunya la pami la Unyashungu.

⁵⁷Keli vo wakahangohango, wakadihi atui, wakukhunguswela kame.

⁵⁸Vo wakutundja uma lʼusumba, wakatuwuka ave. Emenyi a dikambu so wakakitsha ahondo awo lʼekulu wa olongo a pami, lukumbu landi Saulu.

⁵⁹Lamʼakawuki Stefano ave, ndi akalombe ati: Khumadiondjo Jesu, ulunguli lumu lami.

⁶⁰Ku ndi akakhuse adui, akati la diui dia wulu ati: Khumadiondjo, takitshiyaki kolo kene. Lamʼakandati diui so, ndi akavu.