Read tetala Etsha wa Atumami 8 Bible Online

Etsha wa Atumami 8 - tetala bible

Etsha wa Atumami 8

¹Saulu aketawo dia vo mbudiaka. Lushi lako wakatatela nsuya ekelizia wa la Jerusalema wulu. Vo wakahandjwama lu beke tshe dia Judiya la Samariya, tshikima atumami mbakatshikala.

²Antu wʼololo mbakakhunde Stefano. Vo wakuleli efula.

³Keli Saulu akalanya Ekelizia. Ndi akoto lu luudu la luudu, akakutula apami la amantu, akawadji lu lukanu.[75]

⁴Wane wakadiangana, wakakindula lu dihuli la dihuli, watasambisha diui dia lukumu lʼololo.

⁵Filipo akatshu lʼusumba wa Samariya, akawatela dikambu dia Kristu.

⁶Lamʼakuki, ndu lamʼakenyi antu tulimbitelu takatshaka Filipo, vo wakahukama aui wakandati lʼutema otoi,

⁷ne dia edienge waki lʼetema wʼantu efula, wakatumbi, wakahangohango wulu. Akanga a dikhunye efula la waki tshumbi, wakakono.

⁸Ku ongenongeno efula akayala lʼusumba ako.

⁹Keli pami kemotshi, lukumbu landi Simona, lakatshaka akambu wʼaloho la ntundu lʼusumba ako, akambiaka asi Samariya; akayati ati: Untu a wuki kemi.

¹⁰Vo tshe wakuhukama, ndu wa tshitshe ndu wa waki, wakati vati: Untu one eko wulu a Unyashungu, wetawo vati: Wuki.

¹¹Vo wakuhukama, ne dia ndi akawambia la aloho andi edja.

¹²Keli lamʼakawetawo Filipo lakasambishaka dia lukumu lʼololo la diulelu dia Unyashungu la lukumbu la Jesu Kristu, apami la amantu wakabatizama.

¹³Ndu Simona ndame aketawo. Ndi akabatizama, akatshikala la Filipo. Ndi akambi lamʼakandenyi tulimbitelu la akambu wa mamba a waki wakatshama.

¹⁴Lamʼakuki atumami waki la Jerusalema vati: Asi Samariya wambetawo diui dia Unyashungu, vo wakatumela Petero la Joani.

¹⁵Lamʼakawakumi, vo wakalombela dia vo nungula Nyuma kʼOlolo.

¹⁶Ne dia laso, ku Nyuma kʼOlolo atahulo le wo, tshikima batizama tshu lu lukumbu la Knumadiondjo Jesu.

¹⁷Petero la Joani wakawahe anya, ku vo wakalungula Nyuma kʼOlolo.

¹⁸Lamʼakenyi Simona ati: Ahelu kʼanya ka atumami kambuwasha Nyuma kʼOlolo, ndi akawasha falanga,

¹⁹ati: Nyumbisha ndu dimi wulu one, dia untu tshe layumahe anya, ku ndi nungula Nyuma kʼOlolo.

²⁰Keli Petero akawutela ati: Fesa yaye yavu la ye! ne dia we ambukana wati: Dimi layulungula ushasha a Unyashungu la falanga.

²¹We kema la etenyi kana leke lu dikambu ne, ne dia utema aye kema ololo lu ashu a Unyashungu.

²²Okone ukadimuli utema uma lu kolo kene, olombe Khumadiondjo, kana ndi ayukudimanyia tukanyi ta utema aye.

²³Ne dia dimi lambena nti: We eko la losongu lʼululu ndu lu dimama diʼakambu wa kolo.

²⁴Simona akûkaluya diui ati: Nyonombele Khumadiondjo, akambu wutshinyu tawuyalaki le mi.

²⁵Lamʼakawashili menya la mvutela antu diui dia Khumadiondjo, vo wakakalula la Jerusalema; wakasambisha lu ngelu efula yʼasi Samariya lukumu lʼololo.

²⁶Keli ondjelo wa Khumadiondjo akatela Filipo ati: Unela, utshu utsha lu leke la diku dia kushi, lu mbuka kuyi uma la Jerusalema utsha la Ngaza. Dihuli diako dieko shenga.

²⁷Ndi akunela, akatshu. Nyulungi, kanga olenga, usi Etiyopiya, aki untu a wuki lʼokongo a Kandake, khumʼekanga ka umuntu kʼasi Etiyopiya. Ndi kaki ulami a diango diandi tshe, akayi la Jerusalema dia ndjotemola.

²⁸Ndi akatakalulaka udjashi lu pusupusu, atali buku dia umvutshi Isaya.

²⁹Nyuma akatela Filipo ati: Usukani, utuhumani la pusupusu keku.

³⁰Filipo akasamanya utsha le ndi, akawuki ala buku diʼumvutshi Isaya. Ndi akawumbula ati: We nimbitelaka kene kalaye?

³¹Ku ndi akûkaluya diui ati: Ukundi eyami nimbitela, aha paka untu konombodi? Ndi akasengasenga Filipo ati: Mbela, yudjase la mi.

³²Etenyi kʼafundelu kakandalaka, kaki okone ati: Ndi akalombwama utsha lu dihuli diatuwudiakaka nyama uku okoko; Uku ona okoko ambolembohala la ntundu kʼuhimbudi a diosa. Okone ndi kunfula unyo andi.

³³Uma lʼekitshakitshamelu kandi, wakanya elumbwelu kandi. Akona ayokondwela wa lu lolonga landi? Ne dia wakokosola lumu uma la kete.[76]

³⁴Kanga olenga akatela Filipo ati: Dimi lambukolomba nti: Umvuteli dia umvutshi akona watandi? Ndame, kana untu ukina?

³⁵Filipo akafula unyo, akatatela uma lʼafundelu kako, akusambisha lukumu lʼololo la Jesu.

³⁶Lamʼakawatatshokaka lu mbuka, kanga olenga akati ati: Enda, tuku ashi ane! Kakona kanshimba dimi mbatizama?

³⁷Filipo akati ati:[77] Naka we ambetawo lʼutema aye tshe, keti we ayubatizama. Ndi akûkaluya diui ati: Dimi lambetawo nti: Jesu Kristu eko Onʼa Unyashungu.

³⁸Ndi akati ati: Eme pusupusu. Vo ahendi wakoto lu ashi, ndu Filipo ndu kanga olenga. Ndi akubatiza.

³⁹Lamʼakawatumbi uma lʼashi, Nyuma ka Khumadiondjo akatole Filipo amʼakina. Kanga olenga kumbena ntu, ne dia ndi akatshu, atangenangena.

⁴⁰Keli Filipo akenama la Azoto. Ndi aketi lu esumba tshe, edja ndu lamʼakandakumi la Kayisariya, atasambisha lukumu lʼololo.