Read tetala Etsha wa Atumami 9 Bible Online

Etsha wa Atumami 9 - tetala bible

Etsha wa Atumami 9

¹Saulu akanela ambeki wa Khumadiondjo dia mbadiaka. Ndi akatshu le olombedi a ladiku;

²akolombe mikanda wa ntsho lu temwelo dia la Damaseke, dia ndi mbela wayundutana wa lu Mbuka keso, kana apami kana amantu lu ekodi, uya la Jerusalema.

³Lamʼakandatatshokaka, ndi akakumi lasuki la Damaseke. Usasi wʼuma lʼulungu akohetela shashimuya.

⁴Ndi akako la kete. Ndi akuki diui diawutela ati: Saulu, Saulu, okoko wana wansuyaye?

⁵Ndi akati ati: Khumadiondjo, we na? Ndi akati ati: Dimi Jesu, kasuyaye.

⁶Keli, unela, utshu utsha lʼusumba, wayutukutela dikambu diahumbaye ntsha.

⁷Antu wakatatshokaka la ndi wakemala ki. Vo wakuki diui, keli komena untu.

⁸Saulu akunela uma la kete. Lamʼakadiho ashu andi, ndi komena nduku engo. Vo wakukimela lu lunya, wakolombola edja ndu la Damaseke.

⁹Akayala nshi shatu, ndi komena, konde, kono.

¹⁰La Damaseke kaki umbeki, lukumbu landi Ananiya. Khumadiondjo akaweti lʼenelo ati: Ananiya! Ndi aketawo ati: Khumadiondjo, dimʼone.

¹¹Khumadiondjo akawutela ati: Unela, utshu lʼosese wetawo vati: wʼUsimbwi, lu luudu la Judasi, utumbuli untu, lukumbu landi Saulu, usi Taraso kendi. Ulungi, ndi eko lu nomba.

¹²Ndu Saulu akenyi Ananiya ayoto, awahe anya dia ndi mena.

¹³Keli Ananiya akâkaluya diui ati: Khumadiondjo, antu efula wambumvutela dia pami keso, ne dia akambu wa kolo efula wakandatshela ekilami aye wa la Jerusalema.

¹⁴Ndu lane, ndi la wulu uma le elombedi a waki dia nkeleka tshe watetaka lukumbu laye.

¹⁵Keli Khumadiondjo akawutela ati: Tshoka, ne dia ndi eko usi ulimu lambumusonola, dia ndi ntsho la lukumbu lami la ntundu kʼasi wedja la ka khumi ya dikanga, ndu le asi Isariyele,

¹⁶ne dia dimi layuwenya akambu efula wayundusuwa dia lukumbu lami.

¹⁷Ananiya akatshu, akoto lu luudu. Ndi akawahe anya, akati ati: Onalingu Saulu, Khumadiondjo Jesu ndame, lakene le ye lu mbuka lamʼakayayakaka, kuntumi dia we mena, la dia we ndudiama la Nyuma kʼOlolo.

¹⁸Kemʼedja, diango uku kaya diakamo uma lu ashu andi, ku ndi akenyi. Ndi akunela, akabatizama.

¹⁹Ndi akali, akakikitala. Saulu akatshikala la ambeki waki la Damaseke nshi motshi.

²⁰Kemʼedja ndi akasambisha dikambu dia Jesu lu temwelo ati: Onʼa Unyashungu kendi.

²¹Waku tshe wakuki diui diandi wakambi, wata vati: Aha lakamani wane waketaka lukumbu lone la Jerusalema one? Ndi ambuya lindu dia dikambu diako, dia ndi mbatola wukelekami la ntundu kʼelombedi a waki.

²²Keli Saulu akaluli la wulu, akatewadia asi Juda wakaladi la Damaseke; akawatela hwe ati: Jesu keli Kristu.

²³Lamʼaketi nshi efula, asi Juda wakadji sheki ya ndjaka Saulu.

²⁴Keli Saulu akeyi sheki yawo. Vo wakalami asuku la yanyi ndu lʼutshu dia vo mbudiaka.

²⁵Keli ambeki andi wakawose lʼutshu, wakawomoya lu ushu a lukumbu, wakuhuluya lu saka.[78]

²⁶Lamʼakakumi Saulu la Jerusalema, ndi akayangi mbekesanela la ambeki. Vo tshe wakawuki woma, kumbetawo vati: Umbeki mbendi.

²⁷Keli Baranaba akawose, akatshu la ndi le atumami, akawatela uku akene Khumadiondjo le ndi lu mbuka, la uku akateketa Khumadiondjo la ndi; ndu uku akandasambisha la dihunga lu lukumbu la Jesu la Damaseke.

²⁸Lamʼakindi la Jerusalema, ndi akotoka, akatumbaka la wo.

²⁹Ndi akasambishaka la dihunga lu lukumbu la Khumadiondjo. Ndi akateketa la asi Juda wa lu leke la Ngirika, akadji la wo tamu. Keli vo wakayangaka mbudiaka.

³⁰Lamʼakeyi anyandi dikambu so, vo wakutshindela utsha la Kayisariya, wakutumi utsha la Taraso.

³¹Okone ekelizia wa la Judiya tshe la wa la Nealili ndu wa la Samariya waki ki, wakuli; wakakendakendaka la woma a Khumadiondjo la lu ekikitshelu ka Nyuma kʼOlolo, wakafuli.

³²Lamʼakakindula Petero lu beke tshe, ndi akayi ndu la ekilami wa la Luda.

³³Ndi akenyi untu, lukumbu landi Ayinea, leko, laketama lu tangi deku enanei, ne dia ndi aki la ekhunye.

³⁴Petero akawutela ati: Ayinea, Jesu Kristu ambukokonoya. Eto, olongosole tangi kaye. Kemʼedja ndi aketo.

³⁵Asi Luda tshe la asi Sharona wakawenyi, wakakadimo le Khumadiondjo.

³⁶La Jopa kaki umbeki a umuntu, lukumbu landi Tabita, nkadimula ati: Doroka, kana Lufumbo. Umuntu ako akatshaka akambu wʼololo efula ndu akambu wa ketshi.

³⁷Lu nshi sho, ndi akuki kandji, akavu. Lamʼakawashidiya mbotsha, vo wakawetamia lu luudu la ladiku.

³⁸Luda aki lasuki la Jopa. Ku lamʼakuki ambeki vati: Petero eko leko, vo wakatumi apami ahendi dia ntosengasenga vati: Tutshimbatshimbaki dia ndja le su.

³⁹Petero akunela, akatshu la wo. Lamʼakandakumi, vo wakatshu la ndi lu luudu lako la ladiku. Wadi waki edu tshe wakemala la suki la ndi, walela; wakawenya akoti la ahondo wakatshi Doroka lamʼakindi la wo.

⁴⁰Keli Petero akatundja tshe, akakhuse adui, akalombe, akingiso le udu; akati ati: Tabita, eto. Ku ndi akadihula ashu. Lamʼakandenyi Petero, ndi akasungukala.

⁴¹Petero akoleke lunya, akawunyia. Ndi aketi ekilami la wadi waki edu, akawaenyandi la lumu.

⁴²Dikambu diako diakeyama la Jopa tshe. Antu efula waketawo Khumadiondjo.

⁴³Petero aketama nshi kambi la Jopa laka Simona, olongosodi a dikuhu.