Read tetala Romo 11 Bible Online

Romo 11 - tetala bible

Romo 11

¹Dimi lambumbula nti: Unyashungu akatuni wudja andi uka? Aha osoku! Ndu dimi keli usi Isariyele, kanula ya Abarahama, uma lu diuhu dia Bendjamina.[66]

²Unyashungu kuntuna wudja andi wakandeyi ntundu. Nyu hanyeyi kene kata afundelu lu dikambu dia Elidja? Nyu hanyeyi uku akandasengasengela asi Isariyele Unyashungu?

³Ndi akalombe ati: Khumadiondjo, vo wakadiaki amvutshi aye, wakahandjula diakelu diaye, dimi dime kambutshikala! Vo wuyanyangi dia ndjakami.[67]

⁴Diui diakona diakûkaluya Unyashungu? Ndi ati: Dimi lakayalamela antu nunu esambeli, wahatakhusela Bala adui.[68]

⁵Ndu nshi nye, atshikadi amotshi weko, wakasonwama lu ngandji ka mamba ka Unyashungu.

⁶Keli naka esonwelo kako keko uma lu ngandji ka mamba, keti to kema uma lʼetsha. Utunduyala aha osoku, tshiki ngandji ka mamba kema ngandji ka mamba ntu.

⁷Ya ukundi osoku? Asi Isariyele kunkundja kene kakawayangi. Esonami wakakikundja, keli akina wakayala la etema wa lunyu.

⁸Uku akafundama ati: Unyashungu akawasha nyuma kʼutewalu, Ashu wahenyi, la atui wahuki, Edja ndu lushi lʼelo lone.[69]

⁹Davidi akati ati: Dambu diawo diayali suni la djunga, Wawu la difutu diawo.

¹⁰Ashu awo wayali lungi, diaha vo nsena, Unamia ekongo awo pundju.[70]

¹¹Dimi lambumbula nti: Dia nko mbakatakana asi Isariyele uka? Aha osoku. Keli panda kambuya le asi wedja uma lʼekwelo kawo dia mbautsha kandjema.

¹²Naka ekwelo kawo keli ongonyi le wa la kete, la ekikitelu kawo keli ongonyi le asi wedja, ku ekalwelu kawo tshe huleka uka?

¹³Dimi lamboteketa la nyu nyu asi wedja ne dia utumami mbemi le asi wedja. Dimi latutumbulaka ulimu ami wʼusambisha,

¹⁴dia mbutsha asi wudja ami kandjema, la nshimbela amotshi.

¹⁵Naka etunamelu kawo kambuyala ekesanelu le wa la kete, ku ekalwelu kawo hayala uku lumu uma le wavo?

¹⁶Naka kiama ya ma ya minya doka yeli ekila keti ndu ukama pupu. Naka udiu wʼutamba weko ekila, keti ndu tahi yawo pupu.

¹⁷Naka tahi motshi yʼutamba ako yambuhimbwama, la we eko tshamba yʼuweli yambosongama lʼutamba lu dihuli dia tahi yako, dia we ndeshama uma lʼediu ndu uma lu iso kʼuweli,

¹⁸tuyasemaki lʼatei wa tahi kina. Naka we ambuyasema, uho wati: Aha we lutahi katembaka udiu, keli udiu mbatukembaka.

¹⁹We mbeyaka mvuta wati: Tahi yako yakahimbwama dia dimi nsomema lu dihuli diayo.

²⁰Osoku mbedio. Vo wakahimbwama ne dia uhedia awo, keli we atushikikalaka uma lu mbetawo kaye. Tuyasemaki, keli ukaki woma.

²¹Naka Unyashungu kuntshika tahi yʼutamba ako, keti ndi hukutshika ndu we nduku yema.

²²Endaka ololo wa Unyashungu ndu ngala kandi: ndi eko la ngala utsha le waku wakako, keli ololo andi weko le ye, naka we ayokolamela lu ololo andi. Keli naka aha osoku, keti ndu we ayuhimbwama.

²³Naka asi Isariyele wakako hawutetemadi lʼuhedia, ndu vo wayukalula ne dia Unyashungu eko la wulu wa mbasonga ntu.

²⁴Naka we akahimbwama uma lʼutamba wʼuweli watuyalaka lʼukunda, ku we akasongama wuhu waha tutshamaka lʼutamba wʼuweli wʼololo, keti huki tahi nye yʼuma lʼutamba wʼuweli wʼololo dia yo nsongama lʼutamba awo hita?

²⁵Anyasu, ne dia nyutukuyasema uku akanga a yimba, mbalangami nyu mbeya dikambu diushami ne: etenyi kemotshi ka wudja wa Isariyele wambuyala la etema wa lunyu, edja ndu yediko yʼasi wedja mboto lu diulelu yambukuka.

²⁶Okone Isariyele tshe wayushimbamela. Uku akafundama ati: Utshungudi ayuya uma la Siona. Ndi ayunya akambu wa dionyo uma le Jakoba.[71]

²⁷One eli sheki yayumudja la wo Lamʼayumunya kolo yawo.[72]

²⁸Lu dikambu dia lukumu lʼololo mbeli asi Isariyele atunyi wa Unyashungu dikambu dianyu, nyu asi wedja. Keli lu dikambu diʼesonwelo mbewo elangimi dikambu dia watshewo.

²⁹Unyashungu hatukadimulaka eshasha andi la leta landi uma le wane wakandasonola.

³⁰Ndu nyu nyakahediaka Unyashungu edjedja, keli kakiane nyu nyambukama ketshi ne dia uhedia awo.

³¹Ndu vo waki lʼuhedia, keli kakiane uma lu ketshi kakanyukana mbambuwukama ketshi, ndu vo.

³²Unyashungu akadihi antu tshe lʼuhedia awo, dia mbauka ketshi, vo tshe.

³³Ya ndi wuki wʼongonyi wa yimba ndu wa ewu ka Unyashungu li! Ndi dumbwelu diandi diaha manema fundu, la mbuka yandi yaheyama nonda li![73]

³⁴Akona alimbitela yimba ya Khumadiondjo? Akona eli undaki andi?[74]

³⁵Akona akasha Unyashungu engo ntundu, Dia ndi nungamela kekina uma le ndi?[75]

³⁶Ndi kukanga diango tshe; ndu uma le ndi, ndu utsha le ndi, dio tshe diandi mbedio. Lutumbu layali le ndi pundju! Ayah osoku![76]