Read tetala Romo 12 Bible Online

Romo 12 - tetala bible

Romo 12

¹Anyasu, dimi lambunyosengasenga uma lʼakambu wa ketshi wa Unyashungu nti: Nyulambuli alimba anyu uku ulambu wa lumu, la wʼekila, la wa ngenyangenya Unyashungu. Wuhu oso mbukukinyu ntsha.

²Tanyuyafanyaki la akambu wa la kete nye. Keli nyuhilwami lu yimba yʼuyuyu, kanyeyi okone weli lulangu la Unyashungu, lʼololo latongenyangenyaka, ndu lʼuluwanyi.

³Uma lu ngandji ka mamba kakawamboya, dimi lambunyutela nyu tshe nti: Untu tatamanyaki ndjakanela, keli aludiami la tukanyi ta ndjakitshakitsha uku yediko ya mbetawo yakakahanya Unyashungu le untu lʼuntu.

⁴Uku wesu la beke efula lu dimba diame, la beke diako kema la ulimu otoi,

⁵osoku mbesu shu antu efula, mbambutuyala dimba otoi le Kristu.[77] La shu tshe, untu lʼuntu eko etenyi ka dimba diako.

⁶Shu teko la eshasha wutshikitanyi uku ngandji ka mamba kakawatuki. Okone one leli la ushasha wa mvuta akambu wahatayi, awati uku eli yediko ya mbetawo kandi.

⁷One lambetama lʼulimu wʼusambisha ayakimo lu ulimu andi wʼusambisha; one latetshaka ayakimo lʼulimu andi a wetshelu;

⁸la one latulakaka antu, lu ulimu andi wʼelakelu. One latukimoka eshasha, ekimo lʼutema otoi. One latukimanyiaka antu, akimanvia lʼutema otoi. One latukaka antu ketshi, awauki ketshi lʼongenongeno.[78]

⁹Ngandji kayali la mete. Nyutuni kene keli kolo, nyukimeli kene keli ololo wulu.

¹⁰Nyukani ngandji uku untu lʼonangu; nyolemianya.

¹¹Tanyukitakitaki lu saki yanyu pundju, nyohetaki ngaingai la Nyuma; nyukambelaki Khumadiondjo ulimu.

¹²Nyongenangenaki lu elungamelu; nyuyali la memakana lu asui; nyutetemalaki nomba.

¹³Nyukanelaki ekilami lu ehumba awo; nyulungulaki angendangenda ololo.

¹⁴Nyotshokole wane watunyusuyaka.[79] Nyatshokole, tanyuwadjaki mananu.

¹⁵Nyongenengene la wane wangenangena; nyuleli la wane walela.

¹⁶Nyuyali lʼutema otoi. Tanyudjaki tukanyi tanyu lu akambu wa ndjambiya. Tanyuyambiyaki keli nyekesaneli la wane wukitshikitshi. Tanyuyalaki la utaku.[80]

¹⁷Tanyukaluyaki untu kolo lu kolo, keli nyudjaki tukanyi lu akambu weli nemo lu ashu wʼantu tshe.

¹⁸Lu wedi anyu, nyutshaki akambu tshe weyanyu ntsha, dia mbidjase la antu tshe ki.

¹⁹Anyasu wa ngandji, tanyuyasombweyaki; nyutshikeli kele ka Unyashungu dihuli. Ne dia wakafundi vati: Somboya keli dikambu diami. Dimi layulemanya la wo, mbata Khumadiondjo.[81]

²⁰Keli, naka utunyi aye eko la ndjala, uwusha mbu ya nde; naka ndi la pusa, uwusha dia no. Lamʼayuyutsha osoku, keti we ambuwahatanyia akalanga wa dja waheta lʼote.[82]

²¹Tolembiamaki lʼakambu wa kolo, keli olembia akambu wa kolo lʼakambu wʼololo.