Read tetala Romo 14 Bible Online

Romo 14 - tetala bible

Romo 14

¹Nyulunguli one leli wodu lu mbetawo, tanyamanyaki lu tukanyi.

²Untu omotshi mbetawoka nde wehu tshe wa mbu ya nde. Keli one leli wodu lu mbetawo atolekaka paka akatshikatshi atu.

³One latolekaka wehu tshe wa mbu ya nde, tonyolaki one lahatolekaka. One lahatolekaka wehu tshe wa mbu ya nde, talumbuyaki one latolekaka, ne dia Unyashungu ambulungulaka.

⁴We na, lalumbuya ukambi wʼuntu ukina? Kuyanga ndi kemadi, kuyanga ndi kokwe, oso eli dikambu dia uwandji andi. Mete ndi ayemala, ne dia Khumadiondjo la wulu wa mbemadia.

⁵Untu omotshi atolemiaka lushi lomotshi ladiku dia lukina. Untu ukina atolemiaka nshi tshe pupu. Untu lʼuntu alimbiteli kene ketawondi lu lumu landi.

⁶One latolemiaka lushi, atulolemiaka ne dia Khumadiondjo. One latolekaka wehu tshe wa mbu ya nde, atuyilekaka lu dikambu dia Khumadiondjo, ne dia ndi atukaka Unyashungu lusaka. One lahatolekaka wehu tshe wa mbu ya nde, atuyikilaka lu lukumbu la Khumadiondjo, ne dia ndi atukaka Unyashungu lusaka.[89]

⁷Nduku untu lʼatei asu atuyayalelaka la lumu lu wulu andi ndame, ndu nduku untu atuvokaka lu wulu andi ndame.

⁸Naka shu teko la lumu, keti shu teko la lumu le Khumadiondjo. Naka shu tambuvo, keti shu tambuvo le Khumadiondjo. Okone kana teko la lumu, kana tambuvo, shu teko wa Khumadiondjo.

⁹Kristu akavu, akulo dia mbulela wavo la wasena.

¹⁰Ya we, ukundi alumbuyaye onanyo na? Ukundi wanyolaye onanyo na? Shu tshe tayemala lʼelumbwelu la ntundu ka Unyashungu.[90]

¹¹Ne dia akafundama ati: Khumadiondjo kata ati: Uku wemi la lumu! Adui tshe wayunkhusamela; Nimi tshe yayandula Unyashungu.[91]

¹²Okone shu tshe, untu lʼuntu, tayuyateketela le Unyashungu.

¹³Okone tatulumbwanyaki ntu, keli nyusanguya nyu tshe, diaha untu nkitshiya onangu dive dia mbutakanya kana djewoki ya mbumba.

¹⁴Dimi lambeya ndu lambetawo uma le Khumadiondjo Jesu nti: Nduku engo keli kolo to tame. Keli naka untu ambukana ati: Engo keku keko kolo, to keko kolo le ndi.

¹⁵Naka we ambunyangia onanyo lu mbu ya nde yaleye, keti we hakendakenda lu mbuka ka ngandji. Tutungelaki one lakavwela Kristu elanyelu uma lu mbu ya nde, yaleye.

¹⁶Okone tetawoki dia kene keli ololo le ye mvutama uku engo ka kolo,

¹⁷ne dia diulelu dia Unyashungu diaha lu dikambu dia nde la dia no. Keli dio dieko lu akambu wʼololo, la ki la ongenongeno le Nyuma kʼOlolo.

¹⁸One latukambelaka Kristu ulimu wuhu oso, atongenyangenyaka Unyashungu, ndu atolemiamaka le antu.

¹⁹Naka osoku, tuyeli akambu watutungaka ki, ndu akambu weyasu mbudianya la wo.

²⁰Tulanyaki ulimu a Unyashungu lu dikambu dia mbu ya nde. Mete, diango tshe dieli ololo, keli dieko kolo le untu lale, ku ndi ntakanya akina.

²¹Kema ololo nde unatshi, kana no wanu kana ntsha dikambu dikina, diukuki ntakanya onanyo.

²²Mbetawo keli la ye, uyali la to weme la ntundu ka Unyashungu. Untu laha la dikambu dia ndjalumbuya lu akambu wetawondi, eko la ongenongeno.

²³Keli untu lakandakanua lu kene kalendi, ambanyema, ne dia ndi hali la mbetawo. Akambu tshe wahayi uma lu mbetawo weli kolo.