Read tetala Romo 2 Bible Online

Romo 2 - tetala bible

Romo 2

¹We wuhu wʼuntu tshe latulumbuyaka akina, we hukundja luha, ne dia lu akambu watuyulumbuyaka akina, we atuyamiaka la wo,[7] ne dia weme latulumbuyanyaka atutshaka pupu.

²Shu mbeyaka shati: Elumbwelu ka Unyashungu katedimaka lʼakambu wa mete le waku watutshaka akambu wa wuhu oso.

³We untu latulumbuyaka waku watutshaka akambu wa wuhu oso la we atutshaka pupu, we nkanaka wati: We ayuhanda elumbwelu ka Unyashungu uka?

⁴We latonyolaka ongonyi wʼololo wa Unyashungu, la ndjakimela kandi, ndu memakana kandi, we heyi wati: Ololo andi mbatukolombolaka utsha lʼekadimwelu kʼutema?

⁵Keli uma lu hyukihuki yaye la utema aye a lunyu, we atuyamotshiyaka kele lu lushi la kele ndu lʼelumbwelu kʼololo ka Unyashungu.

⁶Ndʼako kayufuta untu lʼuntu uku etsha andi:[8]

⁷lumu la pundju le wane watuyangaka lutumbu, kenemo la lumu lahalana uma lu eteti kawo ka ntsha ololo.

⁸Keli mananu la kele wayuyala le akanga a tusulanyi wahatukitanyiaka akambu wa mete, keli watukitanyiaka akambu wa kolo.

⁹Asui la okei le untu tshe latutshaka kolo ntundu le usi Juda, ku le usi Ngirika.

¹⁰Keli lutumbu, kenemo, la ki le untu tshe latutshaka ololo, ntundu le usi Juda, ku le usi Ngirika.

¹¹Ne dia la ntundu ka Unyashungu kema shonodi.[9]

¹²Waku tshe wakatshi kolo lamʼakiwo kumbeya elembe, wayuvo uku wane waha la elembe. Keli wane tshe wakatshi kolo lamʼakaweyi elembe, wayulumbuyama lʼelembe.

¹³Ne dia aha ambuki wʼelembe mbeli ololo lu ashu wa Unyashungu, keli wane watutshaka elembe mbayuyindjama.

¹⁴Lamʼatutshaka asi wedja waha la elembe akambu wedimi la elembe vame, ku kuyanga vo kema la elembe, ku vo ndjadjelaka elembe,

¹⁵ne dia watenyaka antu etsha wʼelembe wufundami lʼetema awo, la khumʼetema yawo yeli emenyi. Tukanyi tawo tambuwamia kuyanga tambayindja.

¹⁶Akambu aso wayutumba, uku wata lukumu lʼololo la Jesu Kristu latumusambishaka, lu lushi layala Unyashungu akambu wa usheshe wʼantu.

¹⁷Keli naka we atuyaetaka usi Juda, atekamaka elembe, atuyasemaka lu ekesanelu kaye la Unyashungu,

¹⁸atulimbitelaka lulangu landi, ndu atongenangenaka lu akambu wʼololo ne dia we aketshama elembe,

¹⁹atuyambiyaka dia ndjala olombodi wʼakanga a tutshungu, usasi a wane weli lu udjima,

²⁰umungudi wʼakanga a dinginya, leli la utundu wa ewu la wa mete uma lʼelembe —

²¹ndu we atetshaka akina, okoko wana wahayayaetsha weme? We latetshaka untu wati: Tuvaki, ku weme mvuaka?

²²We latutelaka akina wati: Tanyunanaki, ku weme munanaka? We latenaka dikishi wononyi, ku weme mingulaka diango diʼekila?

²³We latuyasemaka lʼelembe, ku weme monyolaka Unyashungu lʼediakelu kʼelembe?

²⁴Lukumbu la Unyashungu lambonywama lʼatei wʼasi wedja dikambu dianyu,[10] uku akafundama.

²⁵Mete, ahemelu kʼuhekeli mbeyaka ndjala ekimanyelu le ye naka we atukitanyiaka elembe. Keli naka we atudiakaka elembe, ahemelu kaye kʼuhekeli keko anyanya.

²⁶Naka untu lahahema uhekeliatukitanyiaka elembe, hahema kandi kʼuhekeli hadiema uku ahemelu kʼuhekeli le ndi uka?

²⁷Naka wane wahahema uhekeli lu alimba awo watukitanyiaka elembe, vo hawukulumbuya we latudiakaka elembe, kuyanga we eli la aui wʼelembe ndu ahemelu kʼuhekeli?

²⁸Ne dia untu kema usi Juda, ne dia akambu watenamaka lʼandja. Ahemelu kʼuhekeli ka lʼutema kema kene kambenama lu dimba.

²⁹Keli untu eli usi Juda dia akambu wa lʼutema. Ahemelu kʼuhekeli ka mete keli ka lʼutema[11] uma le Nyuma, aha la aui. Diandu diandi diaha uma le antu. Dio dieli uma le Unyashungu.