Read tetala Romo 3 Bible Online

Romo 3 - tetala bible

Romo 3

¹Diese diakona dieli lu ndjala usi Juda? Kana waho akona weli lʼahemelu kʼuhekeli?

²Lu akambu efula: dikambu dia ntundu, wakawasha okende wʼelembe wa Unyashungu.

³Naka amotshi tawaki la kolamelu, laso dikambu? Uhedia awo ayudimula kolamelu ya Unyashungu?

⁴Aha osoku: Ee, Unyashungu atanemi la mete, kuyanga le untu tshe leli kanga kashi. Uku akafundama ati: Ne dia we uyindjami lu aui aye, La we ndjala undeki lamʼeye lʼelumbwelu.[12]

⁵Keli naka kolo yasu yambokenene ololo a Unyashungu, kayututa na? Unyashungu eli kolo lamʼayundutokendela la kele uka? (Dimi lambuta uku wata antu).

⁶Aha osoku. Ya ukundi ayulumbuya Unyashungu wa la kete?

⁷Keli naka kashi kami kambufudia mete ka Unyashungu, ndu lutumbu landi, ya ukundi wanumbuyawo uku utshi wa kolo?

⁸Ku okoko wana wahatatutshaka akambu wa kolo dia nfudia akambu wʼololo uku atutuma-manyiaka antu amotshi watukanaka vati: Osoku mbatututaka? Ololo mbamia lu dikambu so.

⁹Ya ukundi? Shu asi Juda ndeka antu akina ololo? Nduku yema, ne dia dimi lakatela asi Juda lʼasi Ngirika nti: Nyu tshe nyeko la tshina dia wulu wʼakambu wa kolo.

¹⁰Uku akafundama ati: Nduku untu leli ololo, kuyanga otoi.

¹¹Nduku untu lamana akambu fundu, Nduku untu latuyangaka Unyashungu.

¹²Vo tshe wambunganela, vo tshe wambutsho lu kolo. Nduku untu lʼatei awo latutshaka ololo, nduku otoi.[13]

¹³Weudi awo weli uku waumbu wa hwe. Vo watukesanaka la nimi yawo.[14] Lolengo la dikhuha leko la tshina diʼelomo awo.[15]

¹⁴Enyo awo weko too la edjelu ka mananu la lutunu.[16]

¹⁵Ekulu awo watutshokaka luwangu la ntutundja dikila.

¹⁶Elanyelu la fono watuyalaka lu mbuka yawo.

¹⁷Vo hawulimbitela mbuka ka ki.[17]

¹⁸Woma wa Unyashungu kemako la ntundu kawo.[18]

¹⁹Shu mbeyaka shati: Aui tshe wata elembe, watutelaka wane weli la tshina diʼelembe, dia enyo tshe wadihami, la wa la kete tshe wayali la tshina diʼelumbwelu ka Unyashungu.

²⁰Nduku untu ayuyindjama lu ashu wa Unyashungu[19] lu etsha wʼelembe, ne dia ewu kʼakambu wa kolo katuyakaka uma lu elembe.

²¹Keli kakiane ololo a Unyashungu waha uma lʼelembe ambenyama, kuyanga elembe la avi wʼamvutshi weko emenyi awo,

²²ne dia ololo wa Unyashungu uma lu mbetawo le Jesu Kristu[20] le wane tshe watuwetawoka. Nduku etshikitanelu keli lʼasa usi Juda la usi Ngirika,

²³ne dia antu tshe wakatshi kolo, hawukumi lu yediko ya lutumbu la Unyashungu.

²⁴Vo wambuyindjama anyanya uma lu ngandji kandi ka mamba, uma lʼetshungwelu keli le Kristu Jesu.

²⁵Ndʼako lakakitsha Unyashungu uku ulambu wa nambwela antu wa kolo, la mbetawo ka lu dikila diandi, ne dia ntenya ololo wa Unyashungu, ne dia ndi akendjula akambu wa kolo wakatshama ntundu.

²⁶Okone ndi ambutenya ololo andi lʼetena kene, ne dia ndi atuyindjaka one latetawoka Jesu.

²⁷Lendi eli dikambu dia shu ndjasema ntu? Dikambu so diambumo. Uma lu olembe akona? Uma lʼetsha asu uka? Kema, keli uma lʼolembe wa mbetawo.

²⁸Shu mbetawoka shati: Untu atuyindjamaka uma lu mbetawo kandi, aha uma lʼetsha wʼelembe.

²⁹Ukundi, Unyashungu eli Unyashungu wʼasi Juda atu? Undi, ndi kema Unyashungu, ndu wʼasi wedja? Elu, ndu wʼasi wedja.

³⁰Naka Unyashungu eko wame,[21] ndi ayuyindja one lakahema uhekeli uma lu mbetawo kandi, ndu one laki kumbahema uhekeli uma lu mbetawo kandi.

³¹Okone shu tambete elembe anyanya ne dia mbetawo? Aha osoku, keli shu tambushikike elembe.