Read tetala Romo 5 Bible Online

Romo 5 - tetala bible

Romo 5

¹Okone shu tambuyindjama uma lu mbetawo, mbesu la ki lasasu la Unyashungu uma le Khumesu Jesu Kristu.

²Uma le ndi kakatakundja mbuka ka nkuma lu ngandji ka mamba kako kemadisu loko. Shu tatongenangenaka lu elungamelu kasu ka ndjala kame la Unyashungu lu lutumbi landi.

³Ladiku dia dikambu so, shu tatongenangenaka lu asui asu. Shu mbeyaka shati: Asui watutungaka etetemalu.

⁴Etetemalu atutungaka lokewo lʼololo, la lokewo lʼololo latutungaka elungamelu.

⁵Elungamelu hatutsha sonyi ne dia Unyashungu ambutshulula ngandji kandi lʼetema asu uma le Nyuma kʼOlolo kakandatusha.

⁶Lamʼakisu weodu, lamʼakakuki etena kako, Kristu akavwela amonyodi wa Unyashungu.

⁷Eko wulu dia untu mbetawo mvwela untu ololo. Keli untu mbeyaka nkikitsha utema dia mvwela untu ololo undu.

⁸Keli Unyashungu akatenya ngandji kandi ne dia Kristu akatuvwela lamʼakisu antu wa kolo.

⁹Okone tayuleka nshimbamela uma lu kele ka Unyashungu dikambu diandi, ne dia tambuyindjama la dikila diandi.

¹⁰Naka shu takekesanela la Unyashungu lu nyoi ka onʼandi lamʼakisu atunyi, ku lamʼakatekesanela la ndi, shu tayuleka nshimbamela ne dia lumu landi.

¹¹Aha dikambu so tu, keli shu tatongenangenaka le Unyashungu uma le Khumesu Jesu Kristu. Shu tambekesanela la Unyashungu uma le ndi.

¹²Okone uku akayi kolo la kete uma le untu otoi, la nyoi uma lu kolo;[32] ku nyoi akadiangana le antu tshe ne dia antu tshe wakatshi kolo: —

¹³ne dia kolo kakiko la kete ntundu elembe watoyama. Keli naka elembe kema, kolo halema.

¹⁴Keli nyoi akahamela antu uma le Adama edja ndu le Mose. To kakahamela ndu vaku waki kuntsha kolo uku akadiaki Adama olembe. Adama aki djimbitelu ya one lakayayi.

¹⁵Keli ushasha ambutshikitana la kolo kako. Naka antu efula wakavu ne dia kolo kʼuntu otoi, keti ngandji ka mamba ka Unyashungu la ushasha wʼuma lu ngandji ka mamba kʼuntu otoi, Jesu Kristu, wayuleka nfula le antu efula.

¹⁶Ndu ushasha one ambutshikitana la sui diʼuma lu kolo kʼuntu otoi. Uma lʼelumbwelu ka kolo otoi mbakayi mananu, keli ushasha ako wambuya uma lu kolo efula, wambela antu eyindjamelu.

¹⁷Naka nyoi akahamela antu uma lu kolo kʼuntu otoi, keti wane wambulungula wuki wa ngandji ka mamba la ushasha wa diulelu diʼakambu wʼololo lu lumu uma le untu otoi, Jesu Kristu ndame, wayuleka mbulela.

¹⁸Uku akayi mananu le antu tshe uma lu kolo kʼuntu otoi, wuhu ako mbambuya eyindjamelu la lumu le antu tshe uma lu dikambu diʼololo otoi.

¹⁹Uku akayala antu efula kolo uma lʼuhedia wʼuntu otoi, wuhu ako mbayuyala antu efula ololo uma lʼukitanyia wʼuntu otoi.

²⁰Elembe wakayi dia uhedia nfulanela. Keli lamʼakafuli akambu wa kolo, ngandji ka mamba kakaleki nfulanela.

²¹Uku akahamela kolo antu lu nyoi, wuhu ako mbukuki ngandji ka mamba mbulela antu lu akambu wʼololo utsha lu lumu la pundju le Jesu Kristu Khumesu.