Read tetala Romo 6 Bible Online

Romo 6 - tetala bible

Romo 6

¹Kayututa na? Shu tayutetemala lu kolo dia ngandji ka mamba nfulanela uka?

²Aha osoku. Shu ane wakavu lu kolo, ukundi ukukisu mbidjase loko ntu?

³Nyu hanyeyi nyati: Shu ane tshe wakabatizama le Kristu Jesu, takabatizama ndu lu nyoi kandi?

⁴Lu batiza kakatakhundama la ndi lu nyoi. Okone uku akulwama Kristu uma lu nyoi lu lutumbu la Shi, mbukukisu nkendakenda lu lumu lʼuyuyu.[33]

⁵Naka shu takayala kame la ndi lu nyoi, keti shu tayuleka ndjala kame la ndi lu eulwelu kandi.

⁶Shu mbeyaka shati: Utundu asu wʼedjedja wakadiakema kame la ndi lu utamba a mpeketanya ne dia dimba diʼakambu wa kolo nanyema, diaha shu ndjala fumbi yʼakambu wa kolo ntu.

⁷Ne dia one lambuvo ambutshungo uma lu kolo.

⁸Keli naka shu takavu kame la Kristu, shu mbetawoka shati: Tayuyala kame la ndi la lumu.

⁹Shu mbeyaka shati: Kristu akulwama uma lu nyoi; ndi hayuvo ntu. Nyoi hawahamela ntu.

¹⁰Ne dia nyoi kakandavu, ndi akavu luvo otoi lutu dia akambu wa kolo, keli ndi eko la lumu le Unyashungu.

¹¹Okone nyu nyame nyuyaete uku wane wambuvo lu kolo ndu uku wane la lumu le Unyashungu uma le Kristu Jesu.

¹²Tanyetawoki kolo mbahamela alimba anyu wukuvo, dia nyu nkitanyia saki yato.

¹³Tanyukimoki beke diʼalimba anyu lu kolo uku dihumo dia ta diʼakambu wa kolo. Keli nyuyakimo le Unyashungu uku antu wambulo uma lu nyoi. Nyukimo alimba anyu le Unyashungu uku dihumo dia ta diʼakambu wʼololo.

¹⁴Akambu wa kolo hawuyunyahamela, ne dia nyu kema la tshina diʼelembe, keli nyeko la tshina dia ngandji ka mamba.

¹⁵Ya ukundi? Tayutsha akambu wa kolo ne dia shu kema la tshina diʼelembe, keli teko la tshina dia ngandji ka mamba? Aha osoku.

¹⁶Nyu hanyeyi nyati: Naka nyu nyambuyakimo le untu omotshi uku fumbi dia mbukitanyiaka, nyu nyeli fumbi ya one latunyukitanyiaka kana yʼakambu wa kolo utsha lu nyoi, kuyanga yʼukitanyia utsha lu akambu wʼololo?

¹⁷Keli lusaka le Unyashungu, ne dia kuyanga mbakinyu fumbi ya kolo ntundu, nyu nyakayukitanyia utundu wa wetshelu wakawanyetsha lʼutema otoi.

¹⁸Nyu nyambuyala fumbi yʼakambu wʼololo.

¹⁹Dimi lamboteketa uku atoteketaka antu ne dia wodu wʼalimba anyu. Naka nyakakimo beke diʼalimba anyu uku fumbi yʼakambu wa mindu la kolo ladiku dia kolo, ku kakiane nyuleki nkimo beke diʼalimba anyu uku fumbi yʼakambu wʼololo dia nyu nkidiama.

²⁰Lamʼakinyu fumbi yʼakambu wa kolo, nyu nyaki la ndjadjasela lu akambu wʼololo.

²¹Lʼetena keso, waho akona wakanyakundja uma lu akambu wa kolo wukanyu sonyi elo? Ne dia ekumelu kʼakambu aso eko nyoi.

²²Keli kakiane nyambutshungwama uma lu akambu wa kolo, nyambuyala fumbi ya Unyashungu. Waho walungulanyu lu dikambu ne eli ekidiamelu, ku lʼekumelu lumu la pundju.

²³Ne dia difutu dia akambu wa kolo eli nyoi, keli ushasha a Unyashungu eli lumu la pundju le Kristu Jesu Khumesu.