Read tetala Romo 7 Bible Online

Romo 7 - tetala bible

Romo 7

¹Anyasu, nyu hanyeyi nyati (ne dia lamboteketa le ambeyi wʼelembe): Elembe mbahamelaka untu lamʼekindi la lumu?

²Umuntu lutshukami atukelekamaka lʼelembe wʼumendi lamʼeki umendi la lumu. Keli naka umendi ambuvo, keti ndi ambutshungo uma lʼelembe wʼumendi.

³Ku naka ndi ambutudjase la pami kekina lamʼeki umendi la lumu, wayuweta vati: Kanga munanyi. Keli naka umendi ambuvo, keti ndi ambutshungo uma lʼelembe. Ndi hayala kanga munanyi kuyanga ndi ayutshukama le pami kekina.

⁴Nyu analingu, dikambu so dieko pupu ndu le nyu. Nyu nyakavu lu elembe lu dikambu dia Kristu dia nyu ndjala wa ukina, wa one lakulwama uma lu nyoi, dia shu ntwela Unyashungu elua.

⁵Lamʼakisu lu alimba, elembe wakafudia saki ya kolo dia yo ntsha ulimu lu beke diʼalimba asu, dia shu ntwela nyoi elua.

⁶Keli kakiane, shu tambutshungo uma lʼelembe, tambuvo lu elembe ako wakatakelekami. Okone shu hatuyukamba ulimu la tshina diʼelembe wufundami wʼedjedja, keli shu tatukambaka lu lumu lʼuyuyu le Nyuma kʼOlolo.

⁷Kayututa na? Elembe kolo kewo? Aha osoku. Dimi kumbeya akambu wa kolo, tshikima uma lʼelembe. Utunduyala elembe kumvuta vati: Tokomiyaki,[34] tshiki dimi kumbeya okomiya.

⁸Kolo kakakundja hyuli uma lʼelembe. To kakantungela wehu tshe wʼakambu wʼokomiya. Utunduyala aha elembe, tshiki kolo kakavu.

⁹Dimi laki la lumu ntundu elembe watayi. Keli lamʼakayi elembe, kolo kakulo, ku dimi lakavu.

¹⁰Elembe wakamalungamelaka utsha lu lumu, wambotola utsha lu nyoi.

¹¹Kolo kakatani hyuli, kakankesi[35] uma lʼelembe. To kakandjaki uma lʼelembe ako.

¹²Okone elembe weko ekila, ndu adjangu weko ekila, ololo la uluwanyi.

¹³Undi, akambu wʼololo wakayala engo ka ndjakami? Aha osoku. Kolo kakantungela nyoi uma lu kene keli ololo, dia kolo mbeyama ati: Kolo. Okone kolo kambutamanya nfula uma lʼelembe.

¹⁴Shu mbeyaka shati: Elembe weli uma le Nyuma kʼOlolo, keli dimi leli dimba diakasundjama lu kolo.

¹⁵Dimi haleyi kene katumutshaka. Dimi hatutshaka kene kalangami ntsha, keli latutshaka kene katumuhetshaka[36]

¹⁶Keli naka latutshaka kene kahamalangi ntsha, keti lambetawo nti: Elembe weko ololo.

¹⁷Kakiane akambu ako watumutshaka, aha dime katatshaka, keli kolo keli lʼutema ami, katuntungelakawo.

¹⁸Dimi mbeyaka nti: Nduku engo kʼololo keli lu dimba diami. Dimi leko la lulangu la ntsha ololo, keli wulu wa ntsha akambu wʼololo kemako.

¹⁹Dimi hatutshaka akambu wʼololo walangami ntsha, keli latutshaka akambu wa kolo wahamalangi ntsha.

²⁰Keli naka dimi ntshaka kene kahamalangi, aha dimi katukitshaka, keli kolo keli lʼutema ami katuntungelakato.

²¹Okone lambushula olembe one nti: Lamʼalangami ntsha ololo, ku kolo keko le mi.

²²Dimi ngenangenaka lʼelembe wa Unyashungu umakʼesi utema.

²³Keli dimi lambushula olembe ukina walo la olembe wa lu yimba yami ta lʼatei wa beke dia dimba diami. Olembe ako ambumbete fumbi kʼolembe wa kolo keli lu beke diami dia dimba.

²⁴Omenyi fono mbemi! Akona ayuntshungula uma lu dimba dia nyoi ne.

²⁵Lusaka le Unyashungu uma le Jesu Kristu Khumesu. Okone dime latutshaka elembe wa Unyashungu uma lu yimba yami, keli la dimba, mbatumutshaka uku elembe wʼakambu wa kolo.