Read tetala 1 Koreto 11 Bible Online

1 Koreto 11 - tetala bible

1 Koreto 11

¹Nyumbukuyaki,[51] uku wukuyami Kristu.

²Dimi lambunyandula, ne dia nyu nyatumbuhoka lu akambu tshe, nyatukimelaka ditshelu uku akamanyetsha.

³Keli dimi nangaka nyu mbeya nyati: Ote a pami tshe eli Kristu, la ote a umuntu eli pami; la ote a Kristu eli Unyashungu.

⁴Pami tshe lalomba, kana lata diui lʼote andi ukumbami, ndi ambonyola ote andi.

⁵Keli umuntu tshe lalomba, kana lata diui lʼote andi hakumbami, ambonyola ote. Dikambu ne dieli uku ote andi ambunyama divu.

⁶Naka umuntu hakumbi ote, ndi anya divu diandi. Keli naka dia umuntu minva divu, eko dikambu dia sonyi; ndi akumbi ote.

⁷Mete, kema ololo dia pami nkumba ote andi, ne dia ndi eko efanelu, ndu lutumbu la Unyashungu.[52] Keli umuntu eko lutumbu la pami.

⁸(Pami kuntungama uma le umuntu, keli umuntu kakatungama uma le pami.

⁹Pami kuntungama ne dia umuntu, keli umuntu kakatungama ne dia pami.)[53]

¹⁰Dia dikambu ne, umuntu eko la dikambu dia ndjala la djimbitelu ya diulelu lʼote andi, lu dikambu diʼandjelo.

¹¹(Keli umuntu kundjala aha uma le pami kana pami aha uma le umuntu, le Khumadiondjo.

¹²Ne dia uku akatungama umuntu uma le pami, mbakutama pami uma le umuntu.)

¹³Nyuyalumbuya nyame: eko ololo dia umuntu nomba Unyashungu hakumbi ote uka?

¹⁴Ndu akambu wʼandja vame hawunyetsha ati: Eko sonyi le pami dia ndi ndjala la divu diʼutali?

¹⁵Keli naka umuntu eko la divu diʼutali, uku eli lutumbu landi. Ne dia ndi akoyama divu diandi uku ekumbelu kandi.

¹⁶Keli naka untu ayudja tamu, shu kema la etshelu kekina; kuyanga ekelizia wa Unyashungu kema la to.

¹⁷Dia nyutela dikambu ne, dimi hanyandula. Ne dia nyu nyatusanganaka aha lu akambu wuleki ololo, keli lu akambu wuleki kolo.

¹⁸Dikambu dia ntundu, lamʼatunyusanganaka lʼekelizia, dimi lambuka nti: Diatanelu dieko lʼatei anyu. Ku dimi mbetawoka lukumu lako yema.

¹⁹Ne dia dieli ndu la ditshikitanelu ndjala lʼatei anyu, dia antu wʼololo wenami lʼatei anyu.

²⁰Okone lamʼatunyusanganaka, eko wulu dia nyu nde ma dia Khumadiondjo.

²¹Ne dia lamʼatunyolekaka, untu lʼuntu atutatelaka mbosa ma diandi; omotshi eko la ndjala, ukina umbidjoki a wanu.

²²Ukundi, nyu kema la mvudu ya nyu nde la no loko? Kana nyu nyatonyolaka ekelizia wa Unyashungu, ndu nyatutshaka wane waha la diango sonyi? Ukundi ayumunyutela na? Dimi nyanduli uka? Dimi hanyandula lu dikambu ne.

²³Ne dia lakalungula diui uma le Khumadiondjo, diakamanyutela nti: Khumadiondjo Jesu akose ma lʼutshu wakandafungama.

²⁴Lamʼakanduki lusaka, ndi akadiatula; akati ati: Dimba diami ne, dio dieko dikambu dianyu. Nyutshaki okone, dia nyu mbuhomi.

²⁵Lʼokongo wa ma dia dikolo, ndi akose ndu dikoho; akati ati: Dikoho ne dieli sheki yʼuyuyu[54] lu dikila[55] diami. Nyutshaki okone lamʼayunyudinokaka, dia nyu mbuhomi.

²⁶Lamʼayunyolekaka ma ne, ndu lamʼayunyonokaka dikoho ne, nyu nyayutelaka antu dikambu dia nyoi ka Khumadiondjo, edja ndu lamʼayunduya.

²⁷Okone untu tshe layole ma ne, kana no dikoho dia Khumadiondjo wuhu wahasungana, ndi ayuyala la unungu wa dimba la dikila dia Khumadiondjo.

²⁸Keli untu ayaediki ndame, ku ali ma ne, ano uma lu dikoho ne.

²⁹Ne dia one lale ndu lano, ambuyalela ndu ambuyanwela ndame unungu, naka ndi halimbitela dikambu dia dimba ololo.

³⁰Dia dikambu so, mbatuyalaka antu efula weodu ndu la hemo, ndu mbatuvokaka antu efula lʼatei anyu.

³¹Keli naka shu takayalimbitela shame, ku shu hatulumbuyama.

³²Keli lamʼambutulumbuyama, shu tambusuyama le Khumadiondjo, dia shu tatukanyema kame la wa la kete.

³³Okone, anyami, lamʼayunyusangana la ndjole ma, kanyukunganaki —

³⁴Naka untu la ndjala, ndi atali lakandi — okone hawunyamia lamʼayunyusangana. Dimi layuyusimbula akambu akina lamʼayumuya le nyu.