Read tetala 1 Koreto 12 Bible Online

1 Koreto 12 - tetala bible

1 Koreto 12

¹Anyasu, dimi halangi nyu munga dikambu dia Nyuma.

²Nyu mbeyaka nyati: Lamʼakinyu asi wedja, nyu nyakanganyiama le dikishi diku dia nyumi, uku akanyalombwama.

³Okone dimi lambunyutela nti: Nduku untu lambuta uma le Nyuma ka Unyashungu ati: Jesu ambudjama mananu; ndu, nduku untu leya mvuta ati: Jesu keli Khumadiondjo, paka uma le Nyuma kʼOlolo.

⁴Wehu efula wa eshasha weko, keli Nyuma eli otoi.

⁵Wehu efula wa dikambelu weko, keli Khumadiondjo eko otoi.

⁶Wehu efula wʼelimu weko, keli Unyashungu eko otoi. Ndi atutshaka akambu tshe le antu tshe.

⁷Keli untu lʼuntu amboyama enyelo ka Nyuma, ne dia mbakundjiya waho.

⁸Ne dia omotshi amboyama diui dia yimba uma le Nyuma; ukina diui diʼewu uma le Nyuma kako.

⁹Omotshi mbetawo uma le Nyuma kako; ukina eshasha wa nkonoya antu, uma le Nyuma otoi;

¹⁰ukina etshelu kʼakambu wa mamba; ukina etelu ka diui; ukina eshihudielu ka nyuma. Ukina wehu ekina wʼeteketa; ukina ekadimwelu kʼeteketa.

¹¹Keli Nyuma otoi katutshaka akambu aso tshe. Ndi atukahanyaka le untu lʼuntu uku aiangandi.[56]

¹²Ne dia uku eli dimba otoi, ndu edio la beke efula, la btke dia dimoa, kuyanga mbedio efula, dieko dimba otoi; osoku mbeli ndu Kristu.[57]

¹³Shu tshe takabatizama lu Nyuma otoi dia shu ndjala dimba otoi — asi Juda kana asi Ngirika, kana fumbi kana wuyadjasedi — shu tshe takanoshama uma le Nyuma otoi.

¹⁴Ne dia dimba diaha leke otoi, dio dieko beke efula.

¹⁵Naka dikaka diayuta ati; Ne dia dimi kema lunya dimi kema leke la dimba; okone dio diaha leke la dimba uka?

¹⁶Ndu naka tui ayuta ati: Dimi laha su, dimi kema leke la dimba; okone dio diaha leke la dimba uka?

¹⁷Utunduyala dimba tshe diayali su, lendi ututukaka? Utunduyala dimba tshe diayali tui, lendi ututononaka?

¹⁸Keli kakiane Unyashungu ambukitsha beke tshe lu dimba, uku akandalangi.

¹⁹Utunduyala dio tshe diayali leke otoi, ku lendi utuyala dimba?

²⁰Keli kakiane dio dieko beke efula, keli dimba otoi.

²¹Su hadieyi mvutela lunya ati: Dimi kema la ye uhumba. Ntu, ote heyi mvutela ekulu ati: Dimi kema la nyu uhumba.

²²Aha osoku, keli beke diku dia dimba dienasu shati: Dio mbuleki wodu, dieko uhumba.

²³La beke diku dia dimba dienasu shati: Dio nemiamaka yema tshitshe, dio mbalekasu nemia efula; beke diasu dia dingeno diatuyalaka la kenemo utamanya.

²⁴Keli beke diasu diʼamena hadiuhumbi. Keli Unyashungu akasanganya beke dia dimba, akaleki nemia leke lahumba,

²⁵ne dia diatanelu diatukuyala lu dimba; keli dia beke dia dimba dialamani pupu.

²⁶Naka leke lomotshi lambusuwa, keti beke tshe nsuwa la lo. Naka leke lomotshi lambolemiama, keti beke tshe ngenangena la lo.

²⁷Okone nyu nyeko dimba dia Kristu, la untu lʼuntu eko leke ladio.

²⁸Unyashungu ambukitsha amotshi lu ekelizia, ntundu atumami, la hendi amvutshi, la satu embetsha[58] ku atshi wʼakambu wa mamba, ku akonodi la ekimanyidi la embuledi, la ateketshi a wehu wʼeteketa.

²⁹Atumami mbewo tshe uka? Amvutshi mbewo tshe? Embetsha mbewo tshe? Atshi wʼakambu wa mamba mbewo tshe?

³⁰Vo tshe mbeli la eshasha wa nkonoya? Vo tshe mbateketa wehu wʼeteketa? Vo tshe mbeli ekadimudi wʼeteketa?

³¹Keli nyutetemali nyanga eshasha wuleki waki. Dimi layunyenya mbuka kuleki ololo.