Read tetala 1 Koreto 13 Bible Online

1 Koreto 13 - tetala bible

1 Koreto 13

¹Naka dimi layoteketa lu eteketa wʼantu ndu wʼandjelo, keli laha la ngandji, dimi lambuyala uku ohotela wahumawo, kana uku dinyandja diasakanyawo nga nga.

²Ndu naka layuyala la ushasha wa mvuta aui, naka layeya akambu tshe wa usheshe la bewu tshe, naka layuyala la mbetawo tshe ka nsekola ekungu[59] keli laha la ngandji, anyanya mbemi.

³Naka dimi layukaha diango diami tshe dia mbisha akanga a weula mbu ya nde; naka layukimo dimba diami dia dio ntshumbama, keli laha la ngandji, dikambu so kema waho le mi.

⁴Ngandji keli kanga memakana la ketshi. Ngandji kaha la kandjema, fayaseme, hayambiya,

⁵hatshi akambu wa fumbosonyi, hayangi paka lulangu landi, hadia akambu wa kolo.

⁶Ndi hangenangena lu yenyi, keli atongenangenaka lu mete.

⁷Ngandji atukhukhumeka akambu tshe, atukitshiyaka akambu tshe, atulungamelaka akambu tshe, atukikeka akambu tshe.

⁸Ngandji haheko pundju. Keli ditelu diʼakambu wahatayi diayushisho; eteketa wayushila; bewu diayushisho.

⁹Ne dia shu mbeyaka paka etenyi ketu, tatutaka etenyi ketu.

¹⁰Keli lamʼayuya akambu wʼuluwanyi, akambu wʼetenyi wayushisho.

¹¹Lamʼakimi dikenda, dimi lakateketaka uku dikenda, lakukaka uku dikenda, lakakanaka uku dikenda. Kakiane, dimi lambuyala ekumanyi, lambukimo akambu wa dikenda.

¹²Kakiane, tatenaka lu lulindu uku efanelu, keli lushi loso, tayenana lu dundji. Kakiane dimi mbeyaka etenyi ketu, keli lushi lako, layushihudia tshe, uku akawanshihudia.

¹³Kakiane, ambutshikala mbetawo, la elungamelu, la ngandji. Akambu aso asatu, dikambu diuleki wuki lʼatei awo ku ngandji.