Read tetala 1 Koreto 15 Bible Online

1 Koreto 15 - tetala bible

1 Koreto 15

¹Anyasu, kakiane dimi lambunyulimbitshiya lukumu lʼololo laka-manyusambishaka, ndu lakamalungula, lu lako lemadinyu.

²Nyu nyakashimbamela la lukumu lako, naka nyayushikikala lu diui diakamanyusambishaka — kana nyu kumbetawo wetawotawo.

³Ne dia dimi lakatanyutedi dikambu diakamalungula nti: Kristu akavu ne dia kolo yasu, uku wata afundelu.[61]

⁴Ndi akakhundama; akulwama lushi la satu uku wata afundelu.[62]

⁵Ndi akene le Kefasi;[63] lʼokongo diku le ambeki dikumi la ahendi.[64]

⁶Lʼokongo diku, ndi akene le anyasu wuleki kama tshanu lʼetena kame. Etenyi kawo kuleki, weki la lumu edja ndu kakiane, keli amotshi wambuvo.

⁷Ku ndi akene le Jakoba; lʼokongo diku, le atumami tshe.

⁸La ndjihelu, ndi akene ndu le mi,[65] uku le ona uhasa.

⁹Ne dia dimi lambuleka atumami tshe tshitshe, dimi hakuki ololo dia mbetama ati: Utumami, ne dia lakasuyaka ekelizia wa Unyashungu.[66]

¹⁰Keli ne dia ngandji ka mamba ka Unyashungu, mbemi uku wemi one; ngandji ka mamba kandi kakandambisha, taki anyanya. Keli dimi lakaleki tshe ntsha ulimu efula, aha dime, keli ngandji ka mamba ka Unyashungu kaki la mi.

¹¹Okone kana dimi, kana vo, shu tatusambishaka, ku nyu nyaketawo.

¹²Naka wambusambisha dikambu dia Kristu vati: Ndi akulwama uma lu nyoi, ukundi wata amotshi anyu nyati: Nduku eulwelu kʼuma lu nyoi keko?

¹³Utunduyala kema eulwelu kʼuma lu nyoi, tshiki Kristu kumbulwama.

¹⁴Utunduyala Kristu kumbulwama, tshiki esambishelu kasu keko anyanya, ndu mbetawo kanyu keko anyanya.

¹⁵Ee, shu tambutanema emenyi wa kashi wa Unyashungu, ne dia shu takati shati: Unyashungu akulula Kristu, kakindi kumbulula, naka wavo hawulwama.

¹⁶Naka wavo hawulwama, tshiki ndu Kristu kumbulwama.

¹⁷Naka Kristu kumbulwama, keti mbetawo kanyu keko anyanya; nyu nyeki lu kolo yanyu.

¹⁸Ntu, ndu wane wambuvo le Kristu, wambushisho.

¹⁹Naka shu tambulungamela Kristu lamʼekisu la lumu lone lutu, ku shu tambuleka antu tshe nsuyama.

²⁰Keli kakiane Kristu ambulwama uma lu nyoi, ndi keli olonga a wane wakavu.

²¹Ne dia nyoi akayi uma le untu, ndu eulwelu kʼuma lu nyoi kakayi uma le untu.

²²Ne dia antu tshe watuvokaka uma le Adama, wuhu ako mbayuyala antu tshe la lumu uma le Kristu.

²³Keli untu lʼuntu lu dihuli diandi: Kristu olonga a ntundu; lʼokongo, wa wane weli wa Kristu lamʼayunduya.

²⁴Lʼokongo diku, ekumelu kayuya lamʼayundukimo diulelu le Unyashungu Shesu, lamʼayundulanya diulelu tshe, luwandji tshe, diahamelu la wulu tshe.

²⁵Ne dia dieli la ndi mbulela, edja ndu lamʼayundukamela atunyi andi tshe la tshina diʼekulu andi.[67]

²⁶Utunyi a djihelu wayolembiama eli nyoi.

²⁷Ne dia Unyashungu akalembia diango tshe la tshina diʼekulu andi?[68] Keli lamʼakandati ati: Diango tshe diambolembiama, shu mbeyaka shati: Ndi hati one lakayalembiya diango tshe.

²⁸Lamʼayuyala diango tshe diolembiami le ndi, ndu Ona ndame ayolembiama le one lakayalembiya diango tshe, dia Unyashungu ayali la diku dia diango tshe, la lu diango tshe.

²⁹Naka aha osoku, ukundi atutshaka wane watusambishaka antu wakavu? Naka antu wakavu hawulama, okoko wana wabatizamelawo?

³⁰Dikambu diakona diesu lasʼeku la nyoi tena tshe?

³¹Anyasu, dimi lambushikisha diui dia ndjatumbula kami le nyu, keli le mi uma le Kristu Jesu Khumesu nti: Dimi latuvokaka nshi tshe!

³²Naka dimi lakalo la nyama ta lʼEfeso uku eishelu kʼantu, na waho weli le mi na? Naka wavo hawulwama, tolekaki, tonokaki, ne dia shu tayuvo lui.[69]

³³Tanyukesamaki. Diendje dia kolo diatulanyaka ditshelu diʼololo.

³⁴Nyosene lu akambu wʼololo, tanyutshaki akambu wa kolo, ne dia amotshi haweyi Unyashungu. Dimi lambuta osoku, ne dia nyutsha sonyi.

³⁵Keli omotshi ayuta ati: Ukundi wulwama antu wakavu? Wuhu akona a dimba wayuwuya la dio?

³⁶We nginyanginya! kene kunaye weme lu kete, hatumbi tshikima to kambuvo.

³⁷La kene kunaye, we hune utundu wʼengo, keli we ayune paka wuhu utu, kana wa epunga, kana wuhu ukuia

³⁸Keli Unyashungu atushaka wuhu uku utundu, uku alangandi: wuhu la wuhu utundu awo.

³⁹Emunyi tshe kema pupu, kema wuhu otoi, keli omotshi weli wʼantu, ukina weli wa nyama, ukina wa fudu, ukina wa nsi.

⁴⁰Etundu wa lʼulungu weko, ndu etundu wa la kete weko. Keli lutumbu la diango dia lʼulungu leko lomotshi, lutumbu la diango dia la kete leko lukina.

⁴¹Unya eko la lutumbu lawo; ngondo eko la lutumbu lukina lato. Toto teko la lutumbu lukina lato, ne dia yoto la yoto yambutshikitana lu lutumbu.

⁴²Osoku mbeli eulwelu ka wane wakavu. To kambunema engo kʼehondelo, kambulwama engo kahahonde.

⁴³To kambunema la dionyo; kambulwama la lutumbu. Kambunema la wodu; kambulwama la wulu.

⁴⁴Kambunema dimba ku dimba; kambulwama dimba dia Nyuma. Naka dimba ku dimba dieko, keti ndu dimba dia Nyuma dieko.

⁴⁵Uku ambufundama ati: Untu a ntundu, Adama, akayala kanga lumu.[70] Adama a ndjihelu akayala Nyuma ka mbishaka antu lumu.

⁴⁶Keli one la dimba keli la ntundu, aha one la Nyuma, lʼokongo diku one la Nyuma.

⁴⁷Untu a ntundu eko lu kete, untu a ditshu, untu la hendi eko uma, lʼulungu.

⁴⁸Uku eli one la ta kete, mbeli wane wa la kete; uku eli one la lʼulungu, mbeli wane wa lʼulungu.

⁴⁹Uku wesu lu efanelu ka one la la kete, wuhu ako mbayutuyala lu efanelu ka one la lʼulungu.

⁵⁰Anyasu, dimi lambunyutela nti: Umunyi la dikila haweyi nkita diulelu dia Unyashungu; kuyanga engo kʼehondelo nkita engo kahahonde.

⁵¹Nyulungi, dimi lambunyutela dikambu diush mi! Shu tshe hatulala djo lu nyoi, keli shu tshe tayukadimo,

⁵²esadi, uku kamula ka su, lamʼayuda pungi ka ndjihelu. Ne dia pungi ayuda, antu wakavu wayulwama lʼalimba wahahonde ku shu tayukadimo.[71]

⁵³Ne dia dieli la kene kʼehondelo dia ndota kene kahahonde, dieli la kene ka nyoi dia ndm a kene kaha la nyoi.

⁵⁴Keli lamʼayolota kene kʼehondelo kene kahahonde, lamʼayolota kene ka nyoi kene kaha la nyoi, ku diui diufundami diayushidiyama ati: Nyoi ambo lembiama lʼelekelu.[72]

⁵⁵Nyoi li, elekelu kaye eto na? Nyoi li, wanga aye ewo na?[73]

⁵⁶Wanga a nyoi eko akambu wa kolo; la wulu wʼakambu wa kolo eko elembe.

⁵⁷Keli tuki Unyashungu lusaka, one latutushaka elekelu uma le Khumesu Jesu Kristu.

⁵⁸Okone, anyasu wa ngandji, nyutetemali, nyushikikali, nyutamanya ntsha ulimu wa Khumadiondjo nshi tshe, ne dia nyu mbeyaka nyati: Pa kanyu le Khumadiondjo kema anyanya.