Read tetala 1 Koreto 4 Bible Online

1 Koreto 4 - tetala bible

1 Koreto 4

¹Untu ateyi ati: Ekambi wa Kristu mbesu, la alami wʼakambu wa usheshe wa Unyashungu.

²Ntu le alami, dieli la untu lʼuntu dia ndjala la kolamelu.

³Keli le mi, eko dikambu dia tshitshe, dia dimi numbuyama le nyu kana le antu akina; kuku dimi halayalumbuya.

⁴Dimi haleyi nduku unungu weli la mi, keli dimi hayindjama osoku. Keli Khumadiondjo atunumbuyaka.

⁵Okone tanyulumbuyaki akambu ntundu Khumadiondjo atayi, one layushula akambu wushami wa lu udjima, layushula tukanyi tʼetema. Ku untu lʼuntu ukuyala la diandu diandi uma le Unyashungu.

⁶Anyasu, lakanyufundela akambu ami ndu wa Apolo uku wela dikambu dianyu; dia nyetsha shati: Tanyulekaki ntsho la ntundu kʼakambu wakafundama; diaha unyanyu omotshi ndjambiya lu dikambu diʼuntu omotshi ladiku dia unyandi.

⁷Untu akona ambukutshikitanya? Engo kakona keli la ye, kakiye kunungula? Keli naka we akakilungula, ukundi ayandulaye uku we kunungula?

⁸Nyu nyambulutaka! Nyambongonaka! Nyu nyambuyala uku khumi ya dikanga, aha kame la su! Kuku, dimi nangaka nyu mbulela ndu shu mbulela kame la nyu.

⁹Ne dia dimi lambukana nti: Unyashungu ambutukitsha, shu atumami, lʼokongo wʼantu tshe, uku antu wakawamia dia mvo; ne dia shu tambuyala uku endelu ka wa la kete, ndu lu ashu wa andjelo, ndu lu ashu wʼantu.

¹⁰Shu teli akanga a dinginya ne dia Kristu, keli nyu nyeko akanga a yimba le Kristu. Shu teko weodu, keli nyu nyeko la wulu. Nyu nyeko la lutumbu, keli shu teko la dionyo.

¹¹Edja ndu unya one, shu teko la ndjala, la pusa, ndu utakataka, ndu dikomoki, ndu kema la dihuli dia mbidjase shikaa.

¹²Shu tatukambaka ulimu wulu la anya asu.[20] Lamʼatotengawo, shu tatatshokolaka. Shu tatushikikalaka lamʼatusuyawo.

¹³Lamʼatonyolawo, shu tatasengasengaka. Shu tambuyala uku adiyu wa la kete la mindu ya diango tshe edja ndu kakiane.

¹⁴Dimi hafundi akambu ane dia nyutsha sonyi, keli dia nyewula uku anʼami wa ngandji.

¹⁵Ne dia kuyanga nyu nyeko la elombodi waheyama mbala le Kristu, nyu kema la washenyu efula, ne dia le Kristu Jesu kakamanyuti lu lukumu lʼololo.

¹⁶Okone dimi lambunyosengasenga nti: Nyumbukuyaki?[21]

¹⁷Dia dikambu so, mbakamanyutumela Timote, onʼami la ngandji la kolamelu le Khumadiondjo, dia ndi nyuhula ditshelu diami dieli la mi le Kristu, uku alakanyami antu lʼekelizia lu ahuli tshe.

¹⁸Amotshi wambutakula uku dimi handjuya le nyu.

¹⁹Keli dimi layuya le nyu esadi, naka Khumadiondjo alanga. Dimi layushula wulu a wane wambutakula, aha aui awo atu;

²⁰ne dia diulelu dia Unyashungu diaha lu aui, keli dieko lu wulu.

²¹Alanganyu na? Dimi nkandji le nyu la uhamba, kana la ngandji la utema a memakana?