Read tetala 1 Koreto 5 Bible Online

1 Koreto 5 - tetala bible

1 Koreto 5

¹Lukumu lambuya ati: Munanyi keko lʼatei anyu. Wuhu oso kema kuyanga lʼatei wʼasi wedja, ne dia untu omotshi eko la wadi a shi.[22]

²Nyu nyambutakula! Nyu kuningalinga, kunanga minya untu lakatshi dikambu so lʼatei anyu.

³Mete, dimba diami kema lʼatei anyu, keli utema ami weko le nyu. Dimi lakalumbuya one lakatshi dikambu so uku dimi laki leko,

⁴lu lukumbu la Khumadiondjo Jesu. Lamʼasangananyu, utema ami weko la nyu, ndu wulu wa Khumesu Jesu,

⁵dia nyu nkimo untu oso le Satana dia ndi nanya dimba diandi, ne dia utema andi ashimbameli lu lushi la Khumadiondjo Jesu.

⁶Ndjatumbula kanyu kema ololo. Nyu hanyeyi nyati: Edya ka tshitshe mvudiaka ukama a ma tshe?[23]

⁷Nyunya edya kʼedjedja, dia nyu ndjala uku ukama wʼuyuyu waha la edya. Ne dia Kristu, onʼokoko asu wʼElekanelu,[24] akadiakema.

⁸Okone nyeso tuli dambu, diaha la edya kʼedjedja, diaha la edya ka lutunu la akambu wa kolo, keli la ma dia kawo la mete, diaha la edya.[25]

⁹Dimi lakanyufundela lu mukanda ami nti: Tanyosohanaki lʼakanga a munanyi.

¹⁰Dimi halati dia akanga a munanyi wa la kete nye, kuyanga akanga wʼekomiya, kuyanga apotwanyi, kuyanga atemodi wa dikishi, lamʼahumbanyu mumo uma la kete nye.

¹¹Keli dimi lakanyufundela nti: Tanyosohanaki la unyanyu, naka ndi eko umunanyi, kuyanga kanga okomiya, kuyanga otemodi a dikishi, kuyanga otenganyi, kuyanga umbidjoki a wanu, kuyanga opotwanyi — tanyolekaki lʼuntu oso.

¹²Dimi la dikambu dia numbuya antu wa kana uka? Nyu hanyulumbuya wane weli lu ekelizia?

¹³Unyashungu atulumbuyaka antu wa kana. Nyunya untu a kolo oso uma lʼatei anyu.[26]