Read tetala 1 Koreto 6 Bible Online

1 Koreto 6 - tetala bible

1 Koreto 6

¹Lamʼayuyala untu la dikambu le unyandi, ukundi atshondi la ntufunda la ntundu kʼantu wa kolo, aha la ntundu kʼekilami?

²Nyu hanyeyi nyati: Ekilami wavulumbuya wa la kete? Naka nyu nyatulumbuyaka wa la kete, nyu hanyukuki numbuya tukambu tuleki tutshitshe?

³Nyu hanyeyi nyati: Shu tayulumbuya andjelo? Ndi wuhu wayuleka elumbwelu lu akambu wa lumu lone li!

⁴Naka nyu nyayulumbuya akambu wa la kete nye, ku nyu nyayukitsha wane weli anyanya lu ekelizia lʼulimu wa numbuya uka?

⁵Dimi lambunyutela diui ne dia nyutsha sonyi. Ukundi, nduku untu leli la lutui lʼatei anyu leya nsambula akambu lʼatei wʼanyandi?

⁶Keli onangu nfundaka onangu, ku nyati: Ndu la ntundu ka wane wahetawo?

⁷Mete, dikambu so dieko kolo lʼatei anyu, ne dia nyu nyambosongwanela. Undi, taki ololo dia nyu mbetawo mbikike kolo? Undi, taki ololo dia nyu mbetawo nkesama?

⁸Keli nyu nyame nyatutshaka kolo, nyatukesaka ndu anyanyu.

⁹Nyu hanyeyi nyati: Antu wa kolo hawukiti diulelu dia Unyashungu? Tanyuyadimbiyaki: atshi wʼakambu wa sonyi, kuyanga atemodi wa dikishi, kuyanga amunanyi, kuyanga akanga a nende, kuyanga atshi wʼakambu wa sonyi la apami,

¹⁰kuyanga evi, kuyanga akanga wʼekomiya, kuyanga ambidjoki a wanu, kuyanga atenganyi, kuyanga apotwanyi, vo tshe hawukiti diulelu dia Unyashungu.

¹¹Nyu amotshi nyaki asoku. Keli nyu nyakayaedia, nyakakidiama, nyakayindjama lu lukumbu la Khumadiondjo Jesu Kristu, la le Nyuma ka Unyashungu asu.

¹²Dimi la wulu wa ntsha akambu tshe, keli aha akambu tshe mbusunganyi.[27] Dimi la wulu wa ntsha akambu tshe, keli dimi halangi nduku dikambu mbahamelami.

¹³Mbu ya nde ne dia dikundju, la dikundju ne dia mbu ya nde, keli Unyashungu ayalanya vo ahendi: ndu dikundju ndu mbu ya nde. Keli dimba aha ne dia munanyi, keli dieko dia Khumadiondjo, la Khumadiondjo ne dia dimba.

¹⁴Unyashungu lakulula Khumadiondjo, ayutulula ndu shu la wulu andi.

¹⁵Nyu hanyeyi nyati: Alimba anyu weli beke dia Kristu? Dimi layunya beke dia Kristu, la diete uku beke diʼuseka uka? Aha osoku!

¹⁶Nyu hanyeyi nyati: One lamamana la useka, ambuyala la ndi dimba otoi? uku akati Unyashungu ati: Vo ahendi wayuyala otoi.[28]

¹⁷Keli one lamamana la Khumadiondjo, eko la ndi utema otoi.

¹⁸Nyulawo munanyi. Kolo kina yatsha untu, yaha lu dimba, keli one lunana, ambutshela dimba diandi kolo.

¹⁹Nyu hanyeyi nyati: Alimba anyu weko etemwelo ka Nyuma kʼOlolo, keli le nyu,[29] kakanyalungula uma le Unyashungu? Alimba waha wanyu;

²⁰ne dia nyu nyakasumbama la ushinga a wulu. Okone nyutumbuli Unyashungu lu alimba anyu.