Read tetala 1 Koreto 7 Bible Online

1 Koreto 7 - tetala bible

1 Koreto 7

¹Lu akambu wakanyafundela, eko ololo le pami, diaha ndi munanda umuntu.

²Keli ne dia munanyi, pami tshe ayali la wadendi hita; la umuntu tshe ayali la umendi hita.

³Umi akitshiya wadendi lamʼalangandi; ndu wadi akitshiya umi lamʼalangandi.

⁴Wadi kema la wulu ladiku dia dimba diandi hita, paka umendi; ndu umi kema la wulu ladiku dia dimba diandi hita, paka wadendi.

⁵Tanyusehianyaki, tshikima nyambulakana etenyi, dia nyu ndjakimo lu dombelo, ku nyayuyala kame ntu; Satana atukunyuhimba ne dia wodu anyu.

⁶Keli dimi lambunyutela aui ane la memakana, aha uku olembe.

⁷Dimi nangaka nti: Antu tshe wutuyala uku dimi. Keli untu lʼuntu eko la ushasha andi uma le Unyashungu, omotshi uhuwo andi, ukina uhuwo andi.

⁸Keli dimi lambutela enyimba la wadi waki edu nti: Eko ololo dia vo ntshikala uku dimi.

⁹Keli naka vo haweyi ndjakimela, watshukani, ne dia ntshukanelu ambuleka songu ka munanyi ololo.

¹⁰Ku le atshukanyi, dimi lambudjanga, keli aha Khumadiondjo, nti: Wadi tanganaki uma le umendi

¹¹(ku lamʼayundangana, ndi atshikali unyimba, kana akaluli le umendi) — umi takimoki wadendi.[30]

¹²Keli le antu akina, aha Khumadiondjo, dimi kata nti: Naka unyasu omotshi eko la wadi laha umbetawudi, la umuntu uku ambetawo mbidjase la ndi, ndi tukimoki.

¹³Naka umuntu eko la umi laha umbetawudi, naka umendi ambetawo mbidjase la ndi, ndi tanganaki uma le umendi.

¹⁴Ne dia umi laha umbetawudi nkidiamaka uma le wadendi; la wadi laha umbetawudi nkidiamaka uma le umendi. Utunduyala aha osoku, tshiki anʼanyu hawukidiama, keli kakiane vo weko ekila.

¹⁵Keli naka laha umbetawudi ayumo, ndi amo; unyasu kana kadiyesu kema uku fumbi lu akambu ane. Unyashungu akateti lu akambu wa ki.

¹⁶We umuntu, we mbeyaka kana we ayushimbela umeye? We umi, we mbeyaka kana we ayushimbela wadeye?

¹⁷Untu lʼuntu akendekende lu akambu wakawusha Khumadiondjo, lamʼakaweti Unyashungu. Osoku mbatumudjangelaka ekelizia tshe.

¹⁸Undi, lʼetena kaketama untu, laso ku ndi ambahemaka uhekeli? Ndi atshikali osoku. Lʼetena kaketama untu, ku ndi atahema uhekeli? Ndi ntahemaki.

¹⁹Mbahema uhekeli eko anyanya, ndu hahema uhekeli eko anyanya, paka nkitanyia elembe wa Unyashungu.

²⁰Untu lʼuntu atshikali lu dikambu diaki la ndi ntundu ndi atetama.

²¹We aki fumbi lamʼakayetama? Yala kaku. Ndu lamʼeyaye ntshungwama, utshungwami.

²²Ne dia untu laketama le Khumadiondjo lamʼakindi fumbi, ndi eko utshungwami wa Khumadiondjo. Okone untu laketama lamʼakindi uyadjasedi, ndi eko fumbi ka Kristu.

²³Nyu nyakasumbama lʼushinga a wulu, tanyuyalaki fumbi yʼantu.

²⁴Anyasu, untu lʼuntu atshikali la Unyashungu lu akambu waki la ndi, lamʼakandetama.

²⁵Dimi kema la olembe a Khumadiondjo ne dia amantu wa dimuma. Keli dimi lambunyutela tukanyi tami, uku one lakukama ketshi uma le khumadiondjo, dia ndjala la kolamelu.

²⁶Okone, ne dia fono keli la su, dimi lambukana nti: Eko ololo le pami dia ndi ntshikala kaku.

²⁷We ambukelekama la wadi? tuyangaki nkelekoma. We ambukelekwama uma le wadi, tuyangaki wadi.

²⁸Keli naka we ambutshuka wadi, we hatshi kolo; naka usekaseka wʼemuma ambutshukama, ndi hatshi kolo. Ku antu ako wayuyala la asui lu alimba. Dimi nangaka nyamela uma lʼasui ako.

²⁹Keli dimi lambunyutela nti: Anyasu, nshi yaya ka nshila. Lʼokongo diku wane weli la wadi wayuyala uku wane waha la wadi.

³⁰Wane walela wayuyala uku wane wahaleli. Wane wangenangena, wayuyala uku wane wahangenangena. Wane wasumba diango, uku wane waha la diango.

³¹Wane wekela diango dia la kete wayuyala uku wane wahadiekela tshe, ne dia efanelu ka kete kayushisho.

³²Keli dimi halangi nyu ndjala la ukananu. One lahatatshuki, atulamaka akambu wa Khumadiondjo, uku weyandi ngenyangenya Khumadiondjo.

³³Keli utshukanyi atulamaka akambu wa la kete, uku weyandi ngenyangenya wadendi,

³⁴ku ndi ambatana. Osoku ndu umuntu laha la umi, ndu usekaseka wʼemuma, vo watulamaka akambu wa Khumadiondjo, dia vo ndjala ekilami lʼalimba ndu lʼetema. Keli utshukami atulamaka akambu wa la kete, uku weyandi ngenyangenya umendi.

³⁵Dimi lambunyutela dikambu ne dia ololo anyu. Aha dia nyutadia lu djunga, keli dia nyu ndjala la akambu wʼusunganyi, la dia nyu mbeya mamema Khumadiondjo aha la ufutanu.

³⁶Keli naka untu nkanaka ati: Ndi heyi ndjakimela utsha le osonami andi, naka pusa kandi ka dimba kambuleka wulu, ndu naka dikambu diako mbeyaka ntsha, ndi atshi uku alangandi; kawo vo ntshukana — dikambu so kema kolo.

³⁷Ku one lakikitala lʼutema, aha la saki, keli ambeya lama ndjakimela, la ambusanguya lʼutema dia mumba usekaseka andi wʼemuma, ndi ambutsha ololo.

³⁸Okone ntshukana, eko ololo; ndu aha ntshukana, eko ololo. Aha ntshukana, ambuleka ntshukana ololo.

³⁹Wadi ambukelekama le umendi lamʼeki umendi la lumu. Keli naka umendi ambuvo, ndi mbeyaka ntshukama le one lalangandi. Keli paka lu lulangu la Khumadiondjo.

⁴⁰Keli tukanyi tami teko okone nti: Ndi ambuleka ngenangena dia ntshikala kaku. Dimi lambukana nti: Ndu dimi leko la Nyuma ka Unyashungu.