Read tetala 2 Koreto 1 Bible Online

2 Koreto 1 - tetala bible

2 Koreto 1

¹Paulu, utumami a Kristu Jesu uma lu lulangu la Unyashungu, la unyasu Timote. Le Ekelizia ka Unyashungu keli la Koreto,[1] ndu le ekilami tshe weli lʼAkaya tshe:

²Ngandji ka mamba kayali la nyu, ndu ki kʼuma le Unyashungu Shesu, la uma le Khumadiondjo Jesu Kristu!

³Lutumbu layali le Unyashungu Shi Khumesu Jesu Kristu, Shesu ka ketshi, Unyashungu wʼekikitshelu tshe;

⁴latutukikitshaka lu asui tshe, dia shu mbeya nkikitsha akina lu asui awo lʼekikitshelu kakatukikitsha Unyashungu.

⁵Ne dia uku atutuyalaka la asui efula le Kristu, mbatutuyalaka la ekikitshelu efula uma le Kristu.

⁶Naka shu tambusuyama, oso eli ne dia ekikitshelu kanyu la panda kanyu. Naka shu tambukikitshama, oso eli ne dia ekikitshelu kanyu, katutungaka shikikelu ka eteti lʼasui watusuyawo.

⁷Elungamelu kasu le nyu kambushikikala, ne dia shu mbeyaka shati: Uku ambunyusuyama la su, okone nyambukikitshama la su.

⁸Anyasu, shu nangaka nyu mbeya dikambu diʼasui wakatundi lʼAsiya,[2] la wutshu wutamanya, wuleki wulu asu, wakatukutute; ku takakani shati: Tayuvo.

⁹Keli shu taki la manyema ka nyoi lʼatei asu, diaha shu ndjalungamela, keli dia shu nungamela Unyashungu, latululaka wakavu.

¹⁰Ndi lakatutshungula uma lu nyoi keku ka wuki, ayututshungulaka. Shu tambulungamela shati: Ndi ayututshungula ndu kakiane.

¹¹Ndu nyu nyambutukimanyia la dombelo dianyu, ne dia antu efula watukeli Unyashungu luaka, ne dia ushasha wakatusha antu efula.

¹²Shu tambuyatumbula lu dikambu ne; ndu khumʼutema keli omenyi asu ati: Shu takakendakenda lʼatei a wa la kete, djekaleka lʼatei anyu, lu ekila la mete ka Unyashungu; aha lu yimba yʼantu, keli lu ngandji ka mamba ka Unyashungu.

¹³Shu hatunyufundela akambu akina, paka akambu walanyu la weyanyu. Dimi lambulungamela nti: Nyu nyayuwaeya edja ndu lʼekumelu,

¹⁴uku akanyateyi etenyi nyati: Shu teli lutumbu lanyu, la nyu nyeko lutumbu lasu, lu lushi la Khumesu Jesu.

¹⁵Ne dia elungamelu kene, mbakamasanguya ndja le nyu la ntundu, ne dia nyu ndjala la ongenongeno ukina.

¹⁶Dimi lakalangi mbeta le nyu utsha la Makedoniya,[3] la uma la Makedoniya ku nkalula le nyu ntu, ku nyu ndekiyami lu lokendo lami utsha la Judiya.

¹⁷Lamʼakamasanguya osoku, dimi laki la uhakuhaku uka? Akambu wakamasanguya ntsha, lakasanguya uku lu akambu wa dimba, dia dimi mvuta nti: Elu, la Kema, lu etena otoi?

¹⁸Keli uku eli Unyashungu la kolamelu, diui diasu le nyu kundjala Elu la Kema.

¹⁹Ne dia Jesu Kristu, Onʼa Unyashungu, lakatanyusambisha, ndu dimi ndu Silivano ndu Timote,[4] ndi taki Elu la Kema; le ndi ndjalaka Elu nshi tshe.

²⁰Ne dia alaka tshe wa Unyashungu watutanaka Elu kawo le ndi. Okone ndu Ayali Osoku ndjalaka le ndi, dia Unyashungu ntumbwama.

²¹Unyashungu ambutushikike kame la nyu le Kristu, ambutukita iso.

²²Ndi ambutudja djimbitelu, ambutusha Nyuma okole lʼetema asu.

²³Keli dimi lambeta Unyashungu uku omenyi lu lumu lami nti: Dimi lakaseke ndja la Koreto, ne dia latukuyunyuhangwela.

²⁴Shu hatahamela mbetawo kanyu, keli teko ekimanyidi wʼongenongeno anyu, ne dia nyu nyambushikikala lu mbetawo kanyu.