Read tetala 2 Koreto 10 Bible Online

2 Koreto 10 - tetala bible

2 Koreto 10

¹Dimi Paulu lambunyosengasenga dia memakana la kenemo ka Kristu — dimʼako lukitshikitshi la ntundu kanyu lamʼemi la nyu, keli amakina dimi ndjalaka la di anga lu dikambu dianyu! —

²Ee, lambunyosengasenga nti: Dimi hanyenya dihunga lu elungamelu keli la mi le akina, watutalaka uku ntu watokendakendaka lu akambu wa dimba.

³Kuyanga shu tatokendakendaka lakambu wa dimba, shu hatolo ta uku dia dimba,

⁴ne dia dihumo diasu dia ta diaha dia dimba, keli dio dieko la wulu wa Unyashungu wa mpandjula wembe wa ta.

⁵Shu tatuhandjulaka tukanyi, ndu engo ka ladiku tshe katosemanelaka la ewu ka Unyashungu, tatolembiaka tukanyi tshe, dia to ndjala la ukitanyia le Kristu.

⁶Shu tayuyalongosola dia nsomboya uhedia tshe lamʼayukuka ukitanyia anyu.

⁷Nyu nyatendaka akambu wenanyu. Naka untu ambuyaekama ati: Usika Kristu kemi, ndi amuyaenda uku endi usika Kristu, ndu shu pupu.

⁸Kuyanga dimi lambuyatumbula kambi ne dia wulu asu, wakatusha Khumadiondjo ne dia nyudia, aha dia nyuhandjula, dimi halutshama sonyi.

⁹Dimi ntenamaki uku untu layanga nyutsha woma lu mikanda ami.

¹⁰Ne dia vo mvutaka vati: Mikanda andi weko wutshu la wulu, keli eyelu kandi lʼutundu, eko wodu; la diui diandi dieko anyanya.

¹¹Untu uku eyi dikambu ne ati: Uku wesu lu aui wa mikanda lamʼahasu laawo, osoku mbayutuyala ndu lu etsha asu lamʼesu laawo,

¹²ne dia shu kema la dihunga dia ndjadia kana ndjaedimia la antu akina watuyandulaka. Keli vame watuyaedikelaka, watuyaedimiaka, vo kema la yimba.

¹³Keli shu hatulangi ndjatumbula uleki yediko, tayuyatumbula uku yediko yʼulelu yakatusha Unyashungu uku yediko yasu, yambukuma le nyu.

¹⁴Shu hatutambi ulelu, kuyanga mbakisu kunkuma le nyu, ne dia shu takakumi le nyu, ntundu la lukumu lʼololo la Kristu.

¹⁵Shu hatulekana ulelu asu, dia ndjatumbula lʼulimu wʼantu akina. Keli tambulungamela shati: Lamʼayula mbetawo kanyu, shu tayutumbwama lʼatei anyu lʼulelu asu, dia shu ntsha ulimu wuleki wuki,

¹⁶ne dia nsambisha wa lu beke dikina dieli la wedi anyu lukumu lʼololo, hatuyatumbula lu leke lʼuntu ukina lu akambu wakandatshi.

¹⁷Keli one latuyatumbulaka, ayatumbuli le Khumadiondjo.[26]

¹⁸Ne dia aha untu latuyandulaka, kambetawoma, paka one landula Khumadiondjo.