Read tetala 2 Koreto 11 Bible Online

2 Koreto 11 - tetala bible

2 Koreto 11

¹Dimi lutulanga nyu ndjala la mi lu yema ya nginyanginya! Keli nyu nyambuyala la mi wuhu ako!

²Ne dia dimi lambunyuka kandjema, kandjema ka Unyashungu. Ne dia dimi lakanyutshukamia le umi otoi, dia nyukimo uku usekaseka wʼemuma le Kristu.

³Keli dimi lambuka woma nti: Uku akadimbiya ului Eva la lukesu landi,[27] tukanyi tanyu tatukulana uma lʼuluwanyi a mete la pudipudi utsha le Kristu.

⁴Lamʼayuya untu la ndjunyusambisha dia Jesu kina, yakisu kunyusambisha, kana naka nyambulungula nyuma kekina, kakinyu kunungula ntundu, kana lukumu lʼololo lakinyu kumbetawo, nyu nyambuwetawo ololo.

⁵Ne dia dimi nkanaka nti: Dimi kema lʼokongo wʼatumami wuleki waki nduku yema.

⁶Kuyanga dimi haleyi nteketa, keli laha osoku lu ewu. Shu takanyenya dikambu so lu akambu tshe.

⁷Undi, dimi lakatshi kolo lamʼakama-yakitshakitsha dia nyu mbediama, ne dia lakanyusambisha lukumu lʼololo la Unyashungu usambishasambisha?

⁸Dimi lakavi diango diʼekelizia ekina, lakalungula afutu uma le wo dia nyukambela ulimu.

⁹Lamʼakimi la nyu, lamʼakamahumbi, dimi taki la wutshu le untu. Ne dia lamʼakayi anyasu uma la Makedoniya, vo wakakutsha yediko yʼuhumba ami.[28] Dimi lakayashikike nti: Dimi latukuyala wutshu le nyu lu akambu tshe, ku dimi layuyashikike wuhu ako ntu.

¹⁰Uku mete ka Kristu keli le mi, nduku untu ayonembohaya uma lu ndjatumbula kene lu beke diʼAkaya.

¹¹Dikambu diakona? Ne dia hanyulangi? Unyashungu mbeyaka!

¹²Keli akambu watumutshaka, layuwatshaka, ne dia minya dikambu dia ndjatumbula uma le wane walanga dikambu dia ndjatumbula. Ne dia lu akambu wa ndjatumbula, vo wayali uku shu.

¹³Ne dia antu aku weli atumami wa kashi, ekambi wa lukesu, wambuyakadimula uku atumami wa Kristu.

¹⁴Oso kema dikambu dia mamba, ne dia ndu Satana katukadimoka uku ondjelo a yanyi.

¹⁵Okone kema dikambu dia wuki dia ndu ekambi andi nkadimo uku ekambi wʼakambu wʼololo. Ekumelu kawo kayuyala uku etsha awo.

¹⁶Dimi lambuta ntu nti: Untu tamenaki, dimi Paulu, enginya. Keli naka nyu nyambutsha, nyambunungula uku enginya, dieli la mi dia ndjatumbula yema.

¹⁷Akambu watumutaka, halawati uku aui wa Khumadiondjo, keli uku la nginyanginya, lu dikambu ne dia ndjatumbula.

¹⁸Ne dia antu efula watuyatumbulaka lu akambu wa dimba, ndu dimi layuyatumbula.

¹⁹Ne dia nyu, akanga a yimba, nyatukikelaka dinginya lʼongenongeno.

²⁰Nyu nyatukikelaka untu lamʼanyudjandi lu fumbi, lamʼalendi diango dianyu, lamʼanyudjandi, lamʼayambiyandi, lamʼanyokomolandi lu dundji.

²¹Dimi lambuta la sonyi, dia mvuta nti: Shu taki weodu. Keli naka untu la dihunga lu dikambu dimotshi — lambuta la nginyanginya — keti ndu dimi keli la dihunga.

²²Asi Heberu mbewo? Ndu dimi pupu. Asi Isariyele mbewo? ndu dimi pupu. Tukanula tʼAbarahama mbewo? Ndu dimi pupu.

²³Ekambi wa Kristu mbewo? — lambuta uku kanga tshupi — dimi lambaleka lu elimu wuleki efula, lu mvudu ya kanu[29] yuleki efula, lu dikomoki diaheyama mbala, lasuki la nyoi tena efula.

²⁴Asi Juda wakankomola tena tanu, dia eshingo akumi anei akumi anei; tshikima etena otoi, kaki kundjala akumi anei.[30]

²⁵Dimi lakakomwama ehamba[31] tena satu; wakambuki ave[32] etena otoi; lakasuwi tena satu lamʼakaditi watu; laki lʼungunda wʼashi utshu otoi la yanyi otoi.

²⁶Lu kendo tena efula, lu akambu wa wulu lu ekedi, lu akambu wa wulu le apotodi, lu akambu wa wulu le any ami,[33] lu akambu wa wulu le asi wedja,[34] lu akambu wa wulu lu esumba, lu akambu wa wulu lu esui, lu akambu wa wulu lu ashi a waki, lu akambu wa wulu lʼatei anyasu akanga a kashi.

²⁷Lu asui la akambu wa pa, lu esenaki tena efula, la ndjala la pusa, lu dikilelu dia mbu ya nde tena efula, lu tshitshi la utakataka.

²⁸Ladiku dia akambu aso wa dimba, dimi la dikambu dieli wutshu le mi la lushi la lushi, ne dia nkanela ekelizia tshe.

²⁹Akona eli wodu, ku dimi hayala la ndi wodu? Akona ambutakanyema, ku dimi halutshama sonyi?

³⁰Naka dieli la mi dia ndjatumbula, layuyatumbula lu dikambu dia wodu ami.

³¹Unyashungu, Shi Khumadiondjo Jesu, one latutumbwamaka, mbeyaka ati: Dimi halati kashi.

³²La Damaseke, umbuledi wa la tshina dia khumʼekanga Areta akalamaka usumba wa Damaseke ne dia mundami.

³³Keli wakampuluya uma lu didishi lu saka, lu eheli ka lukumbu; lakahandi uma lʼanya andi.[35]