Read tetala 2 Koreto 12 Bible Online

2 Koreto 12 - tetala bible

2 Koreto 12

¹Hasungana dia dimi ndjatumbula, keli dieli la mi dia ndjatumbula dia waenelo la waenyelo uma le Khumadiondjo.

²Dimi mbeyaka untu omotshi le Kristu lakosama edja ndu lʼulungu a satu, aya uku deku dikumi la nei — kana ndi aki la dimba, haleyi; kana taki la dimba, haleyi; Unyashungu keya.

³Dimi mbeyaka untu ako lakosama utsha lu Paradisu — kana la dimba, kana aha la dimba, haleyi; Unyashungu keya —

⁴ku lakuki akambu wahameyi mvuta, wahakuki untu mvuta.

⁵Dimi layuyatumbula lu dikambu dia untu oso. Keli dimi hayatumbula dikambu diami, tshikima dia weodu ami.

⁶Utumulanga ndjatumbula, tshiki dimi hayala kanga enginya, ne dia layuta akambu wa mete. Keli halatshi osoku, untu talekaki ntumbulami ladiku dia akambu wenandi, kana wukandi, le mi.

⁷Ne dia waenyelo a waki utamanya le mi, la dia dimi ntukuleka ndjatumbula, ku wakambisha engo uku tende lu dimba diami, dikendji dia Satana, ne dia mpenyahenyami, dia dimi ntukuleka ndjambiya.

⁸Dimi lakalombe Khumadiondjo tena satu dia minyiami engo kene.

⁹Ndi akamvutela ati: Ngandji kami ka mamba nkukaka le ye: ne dia wulu ami atukukiamaka lu wodu. Okone dimi layuyatumbula lu wodu ami la ongenongeno efula, ne dia wulu a Kristu ankhukhume.

¹⁰Okone dimi latongenangenaka lu wodu, lu tengo, lu ehumba, lu asui, lu lokonyo, dia dikambu dia Kristu; ne dia lamʼemi wodu kemi la wulu.

¹¹Dimi lambuyala enginya! Nyu nyakambete osoku, ne dia diaki la nyu dia mbeyanyami. Dimi taki lʼokongo wʼatumami wuleki waki, kuyanga mbemi anyanya.

¹²Mete, tulimbitelu tʼutumami takatshama lʼatei anyu lʼeteti, ndu tulimbetelu ndu akambu wa mamba, ndu akambu wa wulu.

¹³Lu akambu akona wakanyaleki ekelizia ekina tshitshe, tshikima lu dikambu ne, dia dimi kundjala wutshu le nyu? Nyunyimanyia munga keso.

¹⁴Nyulungi, one eli etena kamumuyalongosola, kayangami ndja le nyu. Dimi hayala wutshu le nyu, ne dia dimi hayangi diango dianyu, lambunyuyanga nyame. Ne dia ana hawutumbelaka ambutshi diango, keli ambutshi mbatumbelaka ana diango.

¹⁵Dimi layuyala la ongenongeno otekoya dia nkimo diango, ndu ndjakimo, ne dia nyumu yanyu. Naka dimi lambuleka nyulanga, ku nyu hanyunangi yema?

¹⁶Dikambu so diayali osoku, dimi kundjala wutshu le nyu; ne dia lakewo, lakanyose la yewu.

¹⁷Dimi lakanyukesi uma le untu lakamanyutumela uka?

¹⁸Dimi lakakokomiya Tito, lakatumi unyasu la ndi. Tito akanyukesi uka? Shu konkendakenda la Nyima pupu? Shu konkendakenda lu wanya ako?

¹⁹Nyu nyambukana tena tshe nyati: Shu tambuyanga ndjayindja lu ashu anyu? La ntundu ka Unyashungu kateketas le Kristu. Elangimi ami, akambu ane tshe weko dikambu dia nyudia

²⁰Ne dia dimi lambuka woma nti: Lamʼayumukuma le nyu, dimi halunyutana wuhu wayumulanga undu, la nyu hanyuntana wuhu wayunyulanga. Dimi lambuka woma nti: Layutana tamu, kandjema, kele, mbatana, nsudukana, ntendana, enginu, la mindju.

²¹Ntu, lambuka woma nti: Lamʼayumukuma le nyu, Unyashungu ami ayunkitshakitsha la ntundu kanyu. Ku dimi layulela ne dia antu efula wakatshi kolo ntundu, watakadimula etema uma lu akambu wa mindu la munanyi, la saki yʼakambu wa kolo wakawatshaka.