Read tetala 2 Koreto 5 Bible Online

2 Koreto 5 - tetala bible

2 Koreto 5

¹Shu mbeyaka shati: Lamʼayuhandjo luudu la dimba diasu dia la kete, shu teko la luudu lʼuma le Unyashungu, luudu laki kumpikama lʼanya, lo leko pundju lʼulungu.

²Mete, lamʼekisu lu luudu lone, shu tatukhumaka akhumu, tambukumbula dia shu nkumbama la edjaselu kasu kʼuma lʼulungu.

³Lamʼayutolota osoku, shu hatutanema etakataka.

⁴Ne dia mete, shu ane weli lu luudu lone tatukhumaka akhumu ne dia wetshu, aha dia shu ndjala etakataka, keli dia shu ndotshama dia kene keli nyoi menama le kene keli lumu.

⁵One lakatolongosola dia dikambu ne eli Unyashungu, lakatusha okole a Nyuma.

⁶Okone shu tatuyalaka la dihunga nshi tshe. Shu tambeya shati: Lamʼekisu lʼalimba, shu kema laka Khumadiondjo,

⁷ne dia shu tatokendakendaka la mbetawo, aha la loseno.

⁸Okone shu teko la dihunga, tambuleka nanga mumo uma lu dimba, dia shu ndjala laka Khumadiondjo.

⁹Uma lu dikambu so, shu tatulangaka mbongenyangenya, kana shu teko la dimba, kana taha la dimba.

¹⁰Ne dia dieli la su, shu tshe, dia menama la ntundu kʼelumbwelu ka Kristu,[13] dia untu lʼuntu nungula akambu uku akandatshi lamʼakindi lu dimba, kana ololo kana kolo.

¹¹Ne dia shu mbeyaka woma wa Khumadiondjo, shu tambetawuya antu, keli shu tambeyama le Unyashungu. Dimi lambulungamela nti: Tambeyama ndu le khumʼetema yanyu.

¹²Shu hatuyaeyanya le nyu ntu, keli shu tambunyutshikela dihuli dia nyu ndjatumbula lu dikambu diasu, ne dia nyu ndjala la wulu wa nkaluya diui le waku watuyatumbulaka lu ashu wʼantu, aha uma lʼetema.

¹³Naka shu tambudjo la yimba, dikambu so dieko dia Unyashungu. Naka shu la yimba yʼololo, dikambu so dieko dianyu.

¹⁴Ne dia ngandji ka Kristu atutosedingaka, ne dia shu mbetawoka shati: Otoi kakavwela tshe, okone tshe wakavu.

¹⁵Ndi akavwela tshe, ne dia waku weli la lumu, tawuyalaki la lumu dia dikambu diawo vame, keli dia one lakavwela, lakulwama dikambu diawo.

¹⁶Okone umaka kakiane, shu hateyi untu lu wuhu wa dimba, uku akateji Kristu lu wuhu wa dimba, shu hatuweyi osoku ntu.

¹⁷Okone naka untu eko le Kristu, ndi ambuyala etungamelu kʼuyuyu. Akambu wʼedjedja wambetaka, enda, akambu tshe wambuyala eyuyu.

¹⁸Keli akambu tshe weli uma le Unyashungu, lakayaekesanyia la su ndame uma le Kristu, ndu lakatusha ekambelu kʼekesanelu;

¹⁹ati: Unyashungu aki le Kristu dia mbekesanyia wa la kete la ndi, aha mbalela ediakelu kawo kʼelembe, keli akatukitshiya diui diʼekesanelu.

²⁰Okone shu teko akendji wa Kristu, uku akanyosengasenga Unyashungu lʼenyo asu. Shu tambunyosengasenga dia dikambu dia Kristu shati: Nyekesaneli la Unyashungu.

²¹One laki kumbeya akambu wa kolo, Unyashungu akawete uku ulambu wʼakambu wa kolo dia dikambu diasu; ne dia shu ndjala uku ololo a Unyashungu lʼutema andi.